Tesouro da Apadana

O tesouro da Apadana é un conxunto de moedas que se descubriu baixo as caixas de pedra que contiñan as táboas fundacionais do palacio de Apadana, en Persépole, a capital do Imperio Aqueménica, no actual Irán.^[1]

Tesouro da Apadana
Tipo	Moedas aqueménidas e gregas
Data	-515
Cultura	Imperio Aqueménida
Características
Materiais	Prata e ouro
Descuberta
Localización	Apadana de Persépole, Irán 29°56′6″N 52°53′24″L
Descubridor/a	Erich Schmidt
Data	1933

As moedas foron descubertas en escavacións realizadas en 1933 por Erich Schmidt, en dous depósitos, cada un deles localizado baixo senllas caixas. O depósito deste tesouro, que aparentemente formaba parte do ritual de fundación do palacio da Apadana, está datado cara a 515 a.C.^[1]

As táboas fundacionais

As táboas de ouro e prata recuperadas das caixas de pedra contiñan unha inscrición trilingüe de Darío I (522-486 a.C.) en persa antigo, elamita e acadio, que describe o seu imperio en termos xeográficos:^[1]

“

Darío o gran rei, rei de reis, rei de países, fillo de Histaspes, aqueménida. O rei Darío di: este é o reino que posúo, desde os sacas que están alén de Sogdiana ata Kush, e desde Sind ata Lidia. Isto é o que Ahura Mazda, o maior dos deuses, dispuxo para min. Que Ahura Mazda me protexa a min e a miña real casa! —Inscrición de Darío I.[2]

”

O tesouro da Apadana

As moedas achadas no tesouro da Apadana son:

• Depósito nordeste: catro creseidas lixeiras de ouro —da ceca de Sardes—, un tetradracma de Abdera, e un estatero de Exina.^[1]
• Depósito sueste: catro creseidas lixeiras de ouro (da ceca de Sardes), tres siclos dobres de Chipre —un atribuído a á ceca de Lapetos, outro á de Paphos e outro a unha ceca incerta—.^[1]

As creseidas atopáronse en moi bo estado de conservación, o que confirma que foran cuñadas recentemente baixo o dominio aqueménida. O depósito non contiña ningún exemplar de dáricos nin de siclos, o que tamén suxire claramente que estas moedas típicas da cuñaxe aqueménida só comezaron a cuñarse máis tarde, despois de 515 a.C.^[3]

• 
  Estatero de ouro ou creseida (ca. 545-520 a.C.) de tempos de Darío I, do tipo das oito creseidas achadas no tesouro. Ceca de Sardes.^[1][4]
• 
  Estatero de prata de Exina (ca. 550-530 a.C.), achado no tesouro .^[1][5]
• 
  Didracma de Abdera (ca. 540/535-520/515 a.C.), achado no tesouro.^[1][6]
• 
  Dobre siclo de prata chipriota da ceca de Lapetos, achada máis tarde preto do tesouro. Fin do século VI-principios do V a.C.^[7]
• 
  Estatero de prata chipriota de ceca incerta, achada no tesouro. Século V a.C.^[8]

Simbolismo

Segundo o numismático Martin Price, as moedas do tesouro da Apadana non deberon ser seleccionadas polo lugar que representaban, senón máis ben polo significado simbólico da súa tipoloxía. O león que ataca o touro na creseida licia tiña un simbolismo obvio para os aqueménidas; o grifón do didracma de Abdera puido ser utilizado como gardián simbólico do ouro, e a tartaruga da moeda de Exina puido ser elixida como símbolo do poder marítimo.^[9]

Notas

1. Zournatzi, A. (2003).
2. "DPh, four tablets from Persepolis". Livius.org.
3. Fisher, W. B. et al. (1968). Páxina 617.
4. "Kings of Lydia. Time of Cyrus to Darios I. Circa 545-520 BC. AV Stater". Classical Numismatic Group (CNGcoins.org).
5. "Islands of Attica, Aegina. Circa 550-530/25 BC. AR Stater". Classical Numismatic Group (CNGcoins.org).
6. "Thrace, Abdera. Circa 540/35-520/15 BC. AR Didrachm". Classical Numismatic Group (CNGcoins.org).
7. "Cyprus, Lapethos. Late 6th-early 5th century BC. AR Stater – Double Siglos". Classical Numismatic Group (CNGcoins.org).
8. "Cyprus, Uncertain. Late 6th-early 5th centuries BC. AR Stater". Classical Numismatic Group (CNGcoins.org).
9. Root, M. C. (1989). Páxina 50.

Véxase tamén

Wikimedia Commons ten máis contidos multimedia na categoría:  Tesouro da Apadana

Bibliografía

• Fisher, W. B. et al. (1968). The Cambridge History of Iran. Cambridge University Press. ISBN 9780521200912
• Root, M. C. (1989). "The Persian archer at Persepolis: aspects of chronology, style and symbolism". En Revue des Études Anciennes. 91-1-2. Páxinas 33- 50.
• Zournatzi, A. (2003). "The Apadana Coin Hoards, Darius I, and the West". En American Journal of Numismatics. 15. American Numismatic Society. Páxinas 1-28.

Outros artigos

• Moeda aqueménida
• Moeada da Antiga Grecia
• Tesouro de Cabul