Lorenzo Sanz

Lorenzo Sanz Mancebo, nado en Madrid o 9 de agosto de 1943 e finado na mesma cidade o 21 de marzo de 2020, foi un empresario español. Exerceu como o 14º presidente do Real Madrid, cargo que ocupou entre 1995 e 2000, e foi tamén propietario do Málaga CF.

Lorenzo Sanz

Biografía
Nacemento	(es) Lorenzo Sanz Mancebo 9 de agosto de 1943 Madrid, España
Morte	21 de marzo de 2020 (76 anos) Hospital Universitario Fundación Jiménez Díaz, España
Causa da morte	COVID-19
14º Presidente do Real Madrid Real Madrid CF
26 de novembro de 1995 – 16 de xullo de 2000 ← Ramón Mendoza – Florentino Pérez →
Datos persoais
Relixión	Catolicismo
Actividade
Ocupación	futbolista, promotor inmobiliario
Período de actividade	1985 -
Deporte	fútbol
Familia
Fillos	Lorenzo Sanz Durán, Francisco Sanz Durán, Fernando Sanz
Descrito pola fonte	Lorenzo Sanz, Who Led Comeback of Real Madrid, Dies at 76 (en)

Traxectoria

Na súa mocidade xogou ao fútbol como porteiro en varios equipos modestos de Madrid, entre eles o Puerta Bonita.^[1] Como empresario fixo fortuna no sector inmobiliario e da construción. Estivo vencellado a Fuerza Nueva, partido de extrema dereita do que xestionaba a publicidade.^[2]

En 2018 foi condenado a tres anos de cárcere e ao pago dunha multa de 1,2 millóns de euros pola ocultación a Facenda de ingresos por valor de 6 millóns de euros.^[3]

Presidencia do Real Madrid

Foi directivo do Real Madrid de 1985 a 1995. O 26 de novembro de 1995 converteuse no 14º presidente do Real Madrid despois de que Ramón Mendoza se vise obrigado a dimitir polos problemas económicos, sociais e deportivos do club. Sanz intentou darlle a volta ao club fichando estrelas como Davor Šuker e Predrag Mijatović. En 1998 o equipo volveu gañar a Liga de Campións 32 anos despois, e repetiu título no ano 2000.^[1]

Tras os dous triunfos na Liga de Campións, Sanz celebrou eleccións anticipadas para a presidencia do club en 2000, pero perdeunas ante Florentino Pérez.^[4] En 2006 presentouse unha vez máis ás eleccións para a presidencia do Real Madrid, quedando en cuarto lugar, por detrás de Ramón Calderón, Juan Palacios e Juan Miguel Villar Mir.^[5]

En xullo de 2006 comprou o Málaga CF e colocou como presidente ao seu fillo Fernando.^[6] Vendeu o club en 2010 a un investidor catarí por un importe de 50 millóns de euros.^[7]

Vida persoal

Casou con María Luz Durán Muñoz, coa que tivo cinco fillos. O maior deles, Lorenzo, foi xogador de baloncesto e membro do Real Madrid, mentres que Paco e Fernando foron futbolistas, chegando a xogar ambos na Primeira División.^[8] A súa filla Malula casou co futbolista galego Míchel Salgado.^[1]

Faleceu por COVID-19 na noite do 21 de marzo de 2020 aos 76 anos de idade.^[1]

Notas

1. Ortego, Enrique (21 de marzo de 2020). "Muere de coronavirus Lorenzo Sanz, el presidente de la Séptima y Octava Copas de Europa del Real Madrid". El País (en castelán). Consultado o 28 de marzo de 2022.
2. "Lorenzo Sanz". El Mundo (en castelán). Consultado o 28 de marzo de 2022.
3. "La Justicia condena a Lorenzo Sanz a tres años de cárcel y una multa de 1,2 millones por fraude". El Mundo (en castelán). 7 de novembro de 2018. Consultado o 28 de marzo de 2022.
4. "Lorenzo Sanz, Who Led Comeback of Real Madrid, Dies at 76". The New York Times (en inglés). 22 de marzo de 2020. ISSN 0362-4331. Consultado o 28 de marzo de 2022.
5. "Ramón Calderón gana las elecciones del Real Madrid". Cadena SER (en castelán). 2 de xullo de 2006. Consultado o 28 de marzo de 2022.
6. "Fernando Sanz se presenta a plantilla del Málaga como nuevo presidente" (en castelán). 1 de agosto de 2006. Consultado o 28 de marzo de 2022.
7. "Málaga readies itself for top table". El País (en inglés). 2 de agosto de 2011. Consultado o 28 de marzo de 2022.
8. Miguélez, José (7 de xuño de 1999). "Las confesiones de Paco Sanz" (en castelán). ISSN 1134-6582. Consultado o 28 de marzo de 2022.

Véxase tamén

Ligazóns externas

• Biografía no sitio web do Real Madrid. Arquivado dende o orixinal o 27 de xuño de 2013 (en castelán).