Alejandro Rodríguez Cadarso

Alejandro Rodríguez Cadarso, nado en Noia o 21 de agosto de 1887 e finado en Lubián (Zamora) o 15 de decembro de 1933, foi un médico e político galego que chegou a ser reitor da Universidade de Santiago de Compostela.

Alejandro Rodríguez Cadarso

Biografía
Nacemento	21 de agosto de 1887 Noia, España
Morte	16 de decembro de 1933 (46 anos) Lubián, España
Causa da morte	morte accidental, accidente de tráfico
Lugar de sepultura	cemiterio de Boisaca
Deputado nas Cortes republicanas
20 de xullo de 1931 – 9 de outubro de 1933 Lexislatura: I lexislatura da Segunda República Española Circunscrición electoral: A Coruña
Deputado nas Cortes republicanas
Lexislatura: II lexislatura da Segunda República Española Circunscrición electoral: A Coruña
Reitor da Universidade de Santiago de Compostela
Datos persoais
Educación	Universidade de Santiago de Compostela
Actividade
Lugar de traballo	Madrid
Ocupación	político, médico
Familia
Pai	Jesús María Rodríguez Vázquez
Irmáns	José Rodríguez Cadarso

Deputados galegos de 1931. Ramón Suárez Picallo, Daniel Vázquez, Rodríguez Cadarso, Castelao, Nóvoa Santos, Antón Villar Ponte, Poza Juncal, Otero Pedrayo e Antón Alonso Ríos.

Homenaxe a Alejandro Rodríguez Cadarso no lugar onde faleceu xunto ás Hedradas, Lubián.

Traxectoria

Alejandro Rodríguez Cadarso naceu nunha familia burguesa. O seu pai era o doutor santiagués Jesús María Rodríguez Vázquez, e a súa nai era Manuela Cadarso Ronquete, que era ó mesmo tempo sobriña carnal do capitán noiés Luis Cadarso Rey, que finou na batalla de Cavite (Filipinas) na Guerra hispano-estadounidense en 1898. Casou en 1911 e tivo numerosa descendencia.

En 1916 obtivo a Cátedra de Técnica Anatómica da Universidade de Sevilla e a de Anatomía Descritiva na Universidade de Santiago^[1]. En 1925 publicou un estudo sobre a arteria carótide no Journal of Anatomy^[2]. Fundou o Instituto de Estudios Portugueses e foi vicerreitor da Universidade de Santiago desde o 4 de novembro de 1929 e reitor desde o 29 de marzo de 1930^[3], deputado (1931-1933) pola ORGA, caracterizouse polo seu apoio á autonomía de Galicia. Como reitor pretendeu ligar a Universidade coa cultura galega e coa sociedade galega en xeral, favorecendo a súa modernización^[4], e desenvolveu a Residencia de Estudantes (un dos colexios maiores leva o seu nome, o CM Rodríguez Cadarso) e o Campus Sur ^[5].

Morreu aos 46 anos, cando preparaba o seu discurso de ingreso na Real Academia Galega, nun accidente de automóbil na estrada Villacastín-Vigo preto da localidade zamorana das Hedradas (Lubián) cando se dirixía a unha conferencia en Madrid, xunto co médico e profesor Francisco Bacariza Varela.^[6][7]. Soterrárono no cemiterio de Boisaca.

Vida persoal

Casou con Cristina Ladrón de Guevara Enríquez, e tiveron nove fillos,^[8] entre eles Víctor, Manuel e Antonio Rodríguez-Cadarso Ladrón de Guevara.

Predecesor: Luís Blanco Rivero

Reitor da Univ. de Santiago  1930 - 1933

Sucesor: Ricardo Montequi Díaz de Plaza

Notas

1. Bugallo, Ánxela ([2012]) "Alejandro Rodríguez Cadarso. O impulsor da modernización científica e educativa da Universidade" CCG.
2. "A Rare Case of Tortuosity of the Internal Carotid Artery" Arquivado 01 de agosto de 2013 en Archive.is, publicado no Jornal of Anatomy.
3. Antón Capelán Rey, Contra a Casa da Troia, 1994, páx. 101
4. Baldomero Cores Trasmonte, Ciencia e galeguidade na II República, 1989, páx. 205
5. "Agrelo calificó a Rodríguez Cadarso de hombre conciliador y luchador". La Voz de Galicia. 8 de outubro de 2004.
6. "Un desgraciado accidente de automóvil causó la muerte a los señores Rodríguez Cadarso y Bacariza". El Eco de Santiago (en castelán). 16 de decembro de 1933. p. 1.
7. Henrique Alvarellos (6 de maio de 2018). "O barranco da morte de Rodríguez Cadarso". La Voz de Galicia.
8. Daniel (20 de xaneiro de 2016). "La familia Rodríguez Cadarso". El rincón de la genealogía (en castelán).

Véxase tamén

Wikimedia Commons ten máis contidos multimedia na categoría:  Alejandro Rodríguez Cadarso

Bibliografía

• Reguera López, A. et al.. "Rodríguez Cadarso, Alejandro" en Gran Enciclopedia Galega.
• "Rodríguez Cadarso, Alejandro" en Diciopedia do século 21, t. 3, p. 1824.
• "Rodríguez Cadarso, Alexandre" en Diccionario enciclopédico galego universal, t. 53, p. 67.
• "Rodríguez Cadarso, Alexandre" en Dicionario biográfico de Galicia, t. 3. p. 178.
• R. Bermejo, M. (2008): Rodríguez Cadarso. Un reitor para un país. Universidade de Santiago de Compostela.

Outros artigos

• Bugallo, Á. "O impulsor da modernización científica e educativa da Universidade" Álbum da Ciencia, CCG.

Ligazóns externas

• "Alejandro Rodríguez Cadarso". Álbum da Ciencia do Consello da Cultura Galega.