Rábade

Rábade é un concello da provincia de Lugo, pertencente á comarca de Lugo. Segundo o IGE en 2014 tiña 1604 habitantes (1668 no 2006, 1668 no 2005, 1630 no 2004, 1626 no 2003).

Rábade

Localización
43°06′43″N 7°37′07″O
Estado	España
Comunidade autónoma	Galicia
Provincia	Provincia de Lugo
Capital	Rábade
Poboación
Poboación	1.503 (2023) (300,6 hab./km²)
Xeografía
Superficie	5 km²
Altitude	400 m
Comparte fronteira con	Begonte Outeiro de Rei
Creación	1925
Organización política
• Alcalde	Francisco Xosé Fernández Montes
Eleccións municipais en Rábade
Identificador descritivo
Código postal	27370
Fuso horario	UTC+01:00
Código INE	27056
Páxina web	rabade.org

Onomástica

O topónimo Rábade podería ter orixe no termo hispano-árabe rabaḍ, co significado de "barrio, suburbio", que deu tamén o termo arrabalde.^[1] O xentilicio é «rabadés/esa» ou «rabadense».^[2]

Demografía

Censo total 2014	1604 habitantes
Menores de 15 anos	171 (10,66 %)
Entre 15 e 64 anos	998 (62,22 %)
Maiores de 65 anos	435 (27,12 %)

Xeografía

O concello de Rábade está integrado na comarca de Lugo, no cuadrante nordés de Galicia. Situado a 13,5 km de Lugo, o concello limita cos de Begonte polo norte e oeste, e Outeiro de Rei polo leste e sur.

A súa reducida extensión territorial, de 5,2 km², correspóndese con tan só un 0,41 % da comarca, sendo o segundo concello máis pequeno de Galicia^[3]. Ten unha alta densidade de poboación. Está constituído por unha única parroquia e entidade de poboación, a vila de Rábade. Rábade experimentou unha progresiva transformación orientada a converterse nun importante centro de comunicacións e núcleo de servizos, sendo especialmente importante o seu crecemento nas décadas de 1970 e 1980.

Se ben o Nomenclátor de Galicia só recolle o núcleo da vila de Rábade, a parroquia abrangue tamén os lugares do Campo, A Ponte, Regabaixo, Tras do Regueiro e Vilardeseo.^[4]

Historia

Rábade figura nos itinerarios medievais, concretamente nos traxectos que unían Vilalba e Rábade, por un lado, e Rábade e Parga por outro, na vía romana entre Betanzos e Lugo. Na idade media está datada a ponte antiga de Rábade, concretamente nos séculos XIII-XIV, e sobre esta ponte estableceuse a portaxe ou pago por dereito de paso.

Trala División territorial de España en 1833 Rábade integrouse primeiro no concello de Outeiro de Rei en 1835, e posteriormente no de Begonte, logo da reforma de 1840. En 1925 Rábade converteuse en concello independente ó segregarse de Begonte.

En 1875 inaugurouse o tramo Lugo–A Coruña da liña Palencia-A Coruña, con estación en Rábade, aínda en servizo actualmente. A vila está tamén atravesada pola estrada N-VI, e en paralelo a ela pasa a autovía A-6.

Festas

• Feiras os días 2 e 22 de cada mes.
• Festas patronais, os días 22 e 23 de xaneiro.
• Festas da Asunción de María, o 15 de agosto.

Galería de imaxes

Artigo principal: Galería de imaxes de Rábade.

• 
  Unidade de atención primaria
• 
  Estación de tren de Rábade
• 
  Ara aos Lugoves
• 
  Rábade, placa altimétrica
• 
  Ponte Vella sobre o río Miño

Lugares de Rábade

Para unha lista completa de todos os lugares do concello de Rábade vexa: Lugares de Rábade.

Parroquias

Galicia | Provincia de Lugo | Parroquias de Rábade
Rábade (San Vicenzo)

Notas

1. Martínez Lema, Paulo (2018). Toponimia de Begonte e Rábade. A Coruña: Real Academia Galega. p. 72-73. ISBN 978-84-947823-2-9.
2. Costas González, Xosé-Henrique (2016). Os xentilicios de Galicia e dos outros territorios de lingua galega (PDF). Vigo: Universidade de Vigo. p. 56. ISBN 978-84-8158-706-7.
3. Só por diante de Mondariz-Balneario, con 2,3 km².
4. Martínez Lema, Paulo (2018). Toponimia de Begonte e Rábade. A Coruña: Real Academia Galega. ISBN 978-84-947823-2-9.

Véxase tamén

Wikimedia Commons ten máis contidos multimedia na categoría:  Rábade

Bibliografía

• Núñez Castro, Cristina (2003). De Rapati a Rábade. O municipio de Rábade e a evolución histórica do seu territorio. Concello de Rábade.