![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/9/97/25K15pA9Def4sec_Arman_4_Box1.png/640px-25K15pA9Def4sec_Arman_4_Box1.png&w=640&q=50)
ARMAN (arqueas)
From Wikipedia, the free encyclopedia
Os organismos ARMAN (siglas en inglés de Archaeal Richmond Mine Acidophilic Nanoorganisms ou Nanoorganismos Acidófilos Arqueanos da Mina Richmond) son un tipo de arqueas de tamaño diminuto descubertas nunha mina extremadamente ácida situada no norte de California (Mina de Iron Mountain ou Mina Richmond) por Brett Baker no laboratorio de Jill Banfield na Universidade de California, Berkeley. Estes novos grupos de arqueas atopados, que foron denominados ARMAN-1, ARMAN-2 (Candidatus Micrarchaeum acidiphilum ARMAN-2 ), e ARMAN-3, pasaran indetectados en estudos previos da comunidade de organismos desa mina baseados na PCR porque os ARMANs teñen varias faltas de correspondencia cos cebadores ou primers normalmente usados nas PCR para os xenes do ARNr 16S. Posteriormente, Baker et al.[1] detectáronos noutro estudo utilizando unha secuenciación polo método da escopeta (shotgun) da comunidade. Os tres grupos de ARMAN representan tres liñaxes únicas que son ramas moi iniciais dentro da árbore das arqueas Euryarchaeota. Os seus xenes de ARNr de 16S presentan diferenzas do 17% entre os tres grupos. Antes do seu descubrimento todas as arqueas que se descubriran na Iron Mountain pertencían á orde Thermoplasmatales (por exemplo, Ferroplasma acidarmanus), que non son ARMAN. Posteriormente foron atopados organismos ARMAN noutras partes do mundo.
- Para o escultor Armand Pierre Fernández ver Arman.
ARMAN (liñaxes acidófilas non cultivadas) | |||||
---|---|---|---|---|---|
![]() | |||||
Clasificación científica | |||||
|
![](http://upload.wikimedia.org/wikipedia/commons/thumb/9/91/Iron_Mountain_Mine_red.jpg/320px-Iron_Mountain_Mine_red.jpg)
Aínda que os tres grupos de ARMAN foron considerados dentro dos Euryarchaeota, unha árbore xenómica máis completa das arqueas asignounos ao novo superfilum DPANN.[2] Os grupos de ARMAN agora comprenden filos profundamente diverxentes denominados Micrarchaeota e Parvarchaeota.[3]