早年生平
慧遠嗰本籍係山西嗰雁門樓煩縣,俗姓係賈氏。佢冇出家嗰時間就已經係「博綜六經,尤善老莊」。但一日佢聽得東晉高僧道安嗰《般若經》嗰講法,陡然大悟,話「儒道九流,皆糠粃可」。佢仰上就同得佢嗰老弟慧持皈依佛門,削髮為僧。末後佢俚同得道安到中原一帶弘法,逢到許時間中原大亂,道安拕前秦將軍苻丕捉得嘍,𠵹道安就叫慧遠到江南一帶接得弘揚佛法,哈話「不依國主,則法事難立」。
入贛弘法
慧遠一行人來到江西,拕廬山嗰山水風景迷到嘍。佢俚尋到江州刺史桓玄,得到佢嗰資助後,慧遠到公元384年做起東林寺。同時間,慧遠哈特派佢嗰弟子法淨、法領到天竺西域取經,而且同住嘚長安嗰鳩摩羅什時常往來書信,探討經義,更假請得僧伽提婆、佛馱跋陀羅箇滴子印度高僧遊歷江西,到廬山傳法譯經,譯得《阿毘曇心論》四卷、《三法度論》二卷、《修行方便禪經》箇滴子經卷。故係冇幾久,廬山就成為許時間南方佛教嗰中心。
白蓮社
慧遠嗰盛名招來一大批嗰當世名士,像豫章嗰雷次宗、彭城嗰劉遺民、建昌嗰周續之、南陽嗰宗炳、張詮、張野箇幫子人。公元402年,慧遠同得佢俚組起「白蓮社」,話係有123隻人許多,名士有18隻。故係𠵹唐朝成型嗰淨土宗又號做「蓮宗」。宋朝嗰時間,淨土僧人就認定慧遠係本宗嗰始祖,東林寺係總本山。
佛法理論
慧遠至大嗰理論成就係佢嗰《沙門不敬王者論》。許時間桓玄係長江流域嗰霸主,係人都怫佢。桓玄先頭下令甄別寺院、淘汰僧尼,但箇都冇動到慧遠嗰所在,佢話「廬山為道德所居」。
慧遠發表嗰《沙門不敬王者論》,裡頭話「天地雖以生生為大,而未能令生者不死。王侯雖以存存為功,而未能令存者無患。」「涅槃不變,以化盡為宅,三界流動,以罪苦為場。化盡則因緣永息,流動則受苦無窮。」
慧遠哈覺得佛教同嘚儒教殊途同歸,佢話「道法之與名教,如來之與周孔,發致雖殊,潛相影響,出處誠異,終期則同。」
公元412年,慧遠接得寫正《萬佛影銘》,哈到廬山刻石立佛影。箇進一步搦佢嗰「形盡神不滅」嗰理論具體化,佢到《萬佛影銘》裡頭話「廓矣大象,理玄無名。體神入化,落影離形。」同時間佢邀得一大埲嗰名僧大儒到廬山參加佢嗰佛會,當世高士謝靈運幫佢寫得《萬佛影頌》,佢儒生嗰身份也表達出慧遠「佛儒合一」嗰思想。箇篇頌文裡頭話:「夫大慈宏物,因感而接。接物之緣,端緒不一。難以形檢,易以理測。」
後世評價
唐·崔黯話:
“ | 吾聞嶺南之山峻而不秀,嶺北之山秀而不峻,而廬山為山,峻而秀兩有之。五老窺湖,懸泉墜天。粳香藥靈,鳥閑獸善。煙嵐之中,怳有絳節。白鶴使人觀之而不能回眸也。且金陵六代,代促時薄,臣以功危,主以疑慘。潯陽為四方之中,有江山之美。慧遠豈非得計於此而視於時風邪!然鷙者搏膻,襲者拘素,前人不暇自歎者多,則遠師故為賢矣。是山也以遠師更清,遠師也以是山更名。[1] | ” |
宋·李覯話:
“ | 噫!漢代初傳佛道,西域人得立寺都邑以奉其神。……當是時,謂之何哉?處國之神而已。及東晉、宋氏,其法乃大。蓋慧遠居廬山,名雖為釋,實挾儒術,故宗少文就之考尋文學,周續之通《五經》、《五紼》而事之,雷次宗亦從而明《三禮》、《毛詩》。儒者嘗為弟子,其人得不尊乎。[2] | ” |
內文註腳
參考資料
Wikiwand in your browser!
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.