Feal readbrún

Feal readbrún is in kleur dy't yn 'e regel beskôge wurdt as in tint fan brún. It is in wat ferbleke brún mei in dizenich read-oranjige swym. By additive kleurminging (bgl. op tillefyzjes en kompjûterskermen) is feal readbrún in tertiêre kleur, dy't oanmakke wurdt troch it mingen fan alle trije primêre kleuren (read, grien en blau). By subtraktive kleurminging (bgl. yn 'e druktechnyk) is it in ek in tertiêre kleur, dy't yn teory produsearre wurdt troch de trije primêre kleuren maginta, giel en syaan te fermingen. Yn 'e praktyk wurdt lykwols ornaris ynstee fan syaan gebrûk makke fan swart, om't dat bettere resultaten jout.

feal readbrún
kleurkoördinaten
heksadesimaal	#80461B
RGBª (r, g, b)	(128, 70, 27)
CMYKº (c, m, y, k)	(0, 45, 79, 50)
ª) normalisearre nei [0-255] (byte) º) normalisearre nei [0-100] (%)

Russet

Wylst 'feal readbrún' in wat bombidich omskriuwende beneaming is, hat it Ingelsk in echte namme foar dizze kleur: russet. It ierst oerlevere gebrûk fan russet as oantsjutting foar dizze kleur datearret fan 1562. Oarspronklik ferwiisde russet nei in grouwe eigenspûne wollene stof, kleure mei in mingsel fan wede en miede dy't it in feale grizige of readbrune tint joech. Sok materiaal waard yn 'e Midsiuwen troch sljochtwei folk yn it Keninkryk Ingelân brûkt om harren klean fan te meitsjen. Earmen wiene ta it dragen fan russet ferplichte troch in wet dy't oannommen waard yn 1363.

Om't it yn 'e natoer in hjerstkleur is, waard russet neitiid yn 'e Ingelske literatuer gauris assosjearre mei fertriet of earnst. Yn dy betsjutting brûkte de grutte toanielskriuwer William Shakespeare it yn komeedzje Leafde's Lêst Net Leanne (5e bedriuw, 1e sêne), wêryn't er it personaazje Biron, dy't foarútsjocht nei in libben fan spyt, sizze lit: "Henceforth my wooing mind shall by expess'd / In russet yeas and honest kersy noes."

Sjoch ek

• brún
• read
• readbrún
• fealbrún

Boarnen, noaten en referinsjes