Gonârs

Gonârs al è un comun intal Friûl di Mieç, che al dì di vuê al fâs part de provincie di Udin e al à 4.637 abitants.

Gonârs
Non uficiâl par talian	Gonars
Provincie	Udin
Part	Friûl di Mieç
Altitudin	21 m s.n.m
Superficie	19,90 km²
Popolazion	4.637 ab.
Densitât	233 ab/km²
Frazions	Favuîs, Ontagnan, Burdighe, Mulins
Comuns confinants	Bagnarie, Bicinins, Cjasteons di Strade, Palme, Porpêt, Sante Marie la Lungje, Tor di Zuin
CAP	33050
Prefìs telefonic	0432

La grafie dal non

La prime version normalizade dal non fate dal OLF e jere Gonars cence l'acent lunc su la a. Cheste grafie e lave daûr des regulis di normalizazion (la a e à daûr dôs consonantis).

Dal rest il probleme di pronuncie nol è dai furlans ma dut câs dai marilenghe talians che a fasin fature a disilu just (tant che par esempli i nons dai comuns di Cormons, Comelians e v.i.) e dut câs lis cuestions di grafie a saressin pe lenghe taliane.

Il comun al à però fat proteste ricuardant sei la scriture tradizionâl sei la origjin etimologjiche dal non. L'ARLeF i à dât reson e duncje si pues doprâ ancje la grafie Gonârs.

Sportel pe lenghe furlane

Gonars al è un dai comuns che al à creât un sportel pe lenghe furlane, cul jutori de leç 482/99. Lis sôs ativitâts a son chês de promozion de lenghe furlane, de traduzion di documents ancje pai citadins e de gjestion dai finanziaments dâts fûr cu la leç. Il sît dal comun al è dal dut bilengâl.

Storie

Preistorie e protostorie

I segns plui antîcs che a dimostrin la presince dal om te Basse Furlane a van indaûr al Mesolitic: a son imprescj piçui fats cun sclesis di siliç, che si doprave par armâ lis pontis des frecis pe cjace. Chescj reperts a testemonein che la basse planure furlane e jere frecuentade di piçui grups di oms che tra il 8000 e il 7000 p.d.C. a vivevin cu la cjace dai grancj mamifars dal bosc (cierfs, cenglârs e vie indenant) e cjapant sù plantis salvadiis. Si crôt che al fos un periodi cuant che te planure furlane al ves di jessi un grant bosc plen di rôi, frassins, faiârs e plen ancje di flums, risultivis e di sfueis. Po, tal 5000 p.d.C., cuant che aromai il rapuart dal om cul ambient e il sisteme di doprâ il teritori a jerin cambiâts, lis primis comunitâts di contadins e di arlevadôrs neolitics a colonizarin cheste zone, a ocuparin la planure butant jù i arbui, brusant tocs grandonons dal vecjo bosc e ae fin a lavin a cirî gnovis tieris. Dut câs la presince e l'impat dal om neolitic in chescj teritoris no forin costants e chest lu dimostrin lis diferencis tra i sîts archeologjics de zone. No vin testemoneancis archeologjichis di rilêf par chel che al rivuarde i timps dopo, ven a stâi la Ete dal Ram e la Ete dal Bronç antîc (fin ai prins secui dal II mileni p.d.C.). Invezit e je documentade e si cognòs une vore ben la Ete dal Bronç antîc tal rest de Italie dal nord: cheste e je la epoche des palafitis e dai grancj vilaçs fats sù palificazions, dulà che a son a stâ comunitâts che si son insediadis in maniere stabile intun teritori definît e a vivon in gracie des ativitâts agriculis dal arlevament di pioris e cjavris, oltri che di cjace e di racuelte. Invezit il teritori furlan al presente carateristichis diferents rispiet al rest da la Italie setentrionâl: no si sa che a sedin stadis palafitis e, ancje se a son ogjets di bronç che a somein dal dut a chei che a jerin tal rest de Italie dal nord, a son ancje ogjets di ceramiche che invezit a sintin la influence de culture balcaniche danubiane. Invezit si à la documentazion di insediaments e vilaçs cu la Ete dal Bronç Medi (cirche 1700 p.d.C.): l'insediament di Porpêt al è di chest periodi. Al jere su di une piçule culine e al jere difindût sedi di elements naturâi (il flum Cuar a nord e un grant sfuei ta chês altris bandis), sedi dal intervent dal om che lu sierà fasint sù une palade dople e un teraplen. Cun di plui al jere un centri impuartant pe produzion metalurgjiche e forsit al è propite par chest che al fo l'unic insediament a sorevivi, dopo de nassite dai vilaçs de Ete dal Bronç medi, ae crisi che e cjapâ la plui part de Italie setentrionâl. Di cheste crisi la planure furlane no rivà a vignî fûr fin al timp de colonizazion fate dai Romans. Lis testemoneancis che a rivuardin la Ete dal Fier (scomençant cul secul VIII p.d.C.) a son scjarsis: i pôcs insediaments (Porpêt, Palaçûl e Cjarlins) a jerin dilunc dai flums principâi e pluitost dongje dal mâr. Duncje la ocupazion de planure e jere rare, ma i reperts a fasin crodi che e fos un sisteme diferent di insediament rispiet ae Ete dal Bronç medi e resint: nol jere plui un sisteme di vilaçs che a jerin dongje dai flums, ma di pôcs insediaments che a controlavin un grande part di teritori, forsit lant daûr di un ordin politic militâr precîs.

Periodi roman

Tal cors dai secui si è conservât cualchi toponim che nus testemonie il fat che il teritori di Gonârs al jere abitât in epoche romane: prin di dut Antognan, che al è un toponim prediâl. I prediâi (propite dal latin praedium, ‘proprietât teriere’, ‘fonts’) a indichin i fonts agricui che a cjapavin il non (pal solit che de ''gens'' di apartignince) dal colon che al veve vût il teren: po il toponim prediâl si lu costruìs scomençant di un element onomastic e zontant un sufìs. Al è sigûr che il prediâl Antognan al rivedi di Antonius e a chel si tache il tipic sufìs latin -anum. Si puedin atribuî ae epoche romane ancje altris toponims, par esempli «Sacavan», che al è il non di un teren logât a nord dal paîs di Gonars e de Stradalte e che ancje chel al è un prediâl che al ven forsit di Saccavus o Saccavius. Un altri esempli al è il toponim «Jevade», un non atribuît a une strade e che apont al indiche che cheste e jere stade fate sù in rilêf, suntun strât di pieris e glerie, daûr dal tradizionâl sisteme che i Romans a dopravin par fâ lis stradis. Al è une vore probabil che tal periodi roman i teritoris di Gonârs a fossin abitâts di cualchi famee di contadins, che a scomençarin a bonificâ e a mondâ il teren di mût di rindilu adat ae agriculture. Dut chest al è testemoneât di tancj reperts di ete romane, conservâts li dal Museu Civic di Udin e di cualchi urnis pes cinisis, che invezit a son conservadis a Gonârs, te sede de Scuele secondarie «Tita Marzuttini».

Ete di mieç

I tancj reperts langobarts che a son stâts cjatâts te zone tra Porpêt e Gonârs nus fasin pensâ che al fos un insediament militâr; di fat a son stâts cjatâts pontis di lance e di frece, spathae e umbons di scût. A son di particolâr interès la spatha cjatade a Gonârs e un umbon di scût, definît “di parade” pes decorazions di lus, cjatât a Porpêt, e che forsit al fo di un nobil o di un comandant militâr. Chescj reperts a podaressin lâ indaûr ae II metât dal secul VII. Invezit il sarcofac cjatât tal 1968 tra Gonârs e Favuîs al è dal secul VIII; dentri a jerin i rescj di doi scheletris (forsit om e femine langobarts) e une crôs di bronç une vore interessante parcè che al somee che podedi jessi chê di un relicuiari dal tesaur dal Domo di Cividât. Chest al fâs crodi che e podarès jessi il so model. Cussì une ipotesi e je chê che l’om cjatât a Gonârs al fos un oresin e che la crôs di bronç e sedi un strument de sô art. Cuant che i Langobarts a rivarin in Friûl a puartarin gnovis fuarcis e gnûfs stanziaments. Cussì, ancje tes campagnis ator dai trê paîs di Gonârs, Favuîs e Antognan a tornarin a tacâ la ativitât agricule e, une vore probabil, ancje la ativitât artesanâl e comerciâl. Daspò de dominazion langobarde ancje Gonârs al fo sometût, cussì come dute la Basse Furlane a chê dai Francs e po e patì lis invasions dai Ongjars (899-952). Un document dal 1028 dulà che l’imperadôr Conrât II al concedeve al Patriarcje il guvier di chestis zonis, che a jerin deventadis cuasi disabitadis e patrie di boscs e terens no coltivâts, al testemonie la cundizion di scjars svilup e di degrât che e jere te planure furlane daspò des incursions dai Ongjars. Il periodi patriarcjâl al scomence mostrant scjars svilup e desolazion, ma i Patriarcjis si impegnin intune azion energjiche par tornâ a popolâ e par recuperâ dal pont di viste economic e sociâl ducj i teritoris dal Friûl che a jerin sot dal lôr podê. Il patriarcje Poppo (o Popon) al tornà a fâ sù la basiliche di Aquilee, inaugurade ai 13 di Lui dal 1031. Cu la istituzion dal cjapitul di Aquilee, i da une part dai teritoris de Glesie aquileiese, che a son elencâts intune bole che e à la date de inaugurazion de basiliche. Cheste bole e je il document plui vecjo dulà che si ateste la esistence des vilis di Gonârs e di Antognan, che però a restin fûr da la donazion, probabilmentri parcè che a fasevin za part de jurisdizion dal cjistiel di Porpêt. Vie pai secui X e XI, intant che si viodeve progrès sociâl e economic, si definissin lis comunitâts rurâls locâls, cjapadis dentri ancje chês che al dì di vuê a fasin part dal comun di Gonârs che si pense che al ves une popolazion intor dai 200-300 abitants cirche, invezit al è probabil che in chês che vuê a son lis frazions e fos a stâ mancul int. Ae fin de ete patriarcjâl tai agns subite prime che e rivàs la Serenissime in Friûl (1420), i paîs di Antognan e Favuîs a jerin sot de jurisdizion dai conts di Castel Porpeto, invezit Gonârs al dipendeve da la podestarie di Maran.

La ete moderne

Il 1420 al segnà l'inizi de ocupazion veneziane in Friûl e duncje i paîs di Gonârs, Favuîs e Antognan cun dute la lôr campagne a larin sot dal guvier venit, ancje se in maniere no direte. Di fat la Serenissime e ricognossè la invistidure feudâl dal cont di Gurize su Antognan e Favuîs fin ae muart dal ultin dissendent, invezit di chê altre bande Gonârs al fo sot de protezion dal Patriarcje, come ancje la podestarie di Maran. In contemporanie cul inizi dal domini de Republiche di Vignesie in Friûl, sul confin orientâl si presentà la menace dai Turcs. Propite lis invasions dai lôr esercits in Friûl a segnarin in maniere dolorose la seconde metât dal secul; la scorsade dal 1477 e fo di particolâr rilêf pe storie di Gonârs parcè che e puartà a la distruzion di dut il paîs e ancje di chel di Antognan, disdrumâts come tantis altris vilis dongje de Stradalte. A ruvinâ ancjemò di plui la situazion di chescj puescj, il 1500, an cuant che al murì Lenart, ultin dissendent de dinastie dai conts di Tirôl-Gurize, al segnà l'inizi di une dispute violente tra la Cjase de Austrie e la Republiche veneziane pal domini de Basse planure furlane. I austriacs a ereditarin i bens dai conts di Gurize (par vie che a jerin lôr), invezit Vignesie e pretindè di slargjâ il so guvier su chê part dai bens che no masse decenis prime e veve dât in concession feudâl propite ai conts di Gurize. Il risultât al fo une vuere tra la Serenissime republiche di une bande e la Austrie, judade di Spagne, France e cualchi princip talian (a formâ la leghe di Cambrai) di chê altre. La situazion si definì cui pats di Noyon dal 1516 e la diete di Worms dal 1521, dulà che si stabilì che la Austrie, gjavâts fûr i dirits risiervâts al Patriarcje, e ves il guvier di une buine part de Basse planure furlane, cjapâts dentri i paîs di Gonârs, Favuîs e Antognan, adun cu lis vilis di Cjistiel, Porpêt, Vilegnove, Cjarisà, San Zorç, Noiâr e Cjarlins. Cheste definizion però si concretizà dome cul 1546, daspò che la contraposizion tra Vignesie e Austrie e jere deventade plui aspre: di fat la prime e veve ocupât une altre volte la fuartece di Maran (1542), invezit la seconde e veve fat sù dongje di cheste fuartece il presidi di Maranut, par controlâ la zone. Cussì al scomençà il guvier austriac sui teritoris di chel che al dì di vuê al è il Comun di Gonârs e al le indenant cuasi cence interuzions plui o mancul par trê secui, ancje se i contrascj continuâts tra Serenissime e Imperi a forin la cause di tensions fuartis. Oltri a chestis discordiis politichis a jerin ancje lis cuistions continuis che a vignivin fûr tra paîs tacâts che però a jerin sot di guviers diferents: la cause principâl des cuistions e jere chê dai dirits par doprâ pascui, flums, palûts e ducj chei bens che a podevin doprâ ducj i doi. Cheste continue cundizion di tension e degjenerà in maniere inevitabile: tal 1615 e sclopà une gnove vuere tra Vignesie e Austrie, la “vuere di Gradiscje”, clamade cussì parcè che lis operazions a forin dutis ator di cheste fuartece. Daspò cirche di trê agns di scuintris, tal 1618 a firmarin la pâs a Madrid di mût che a tornarin lis divisions teritoriâls che a jerin prime de vuere e duncje al fo confermât il domini austriac su Gonârs, Favuîs e Antognan. Par vie di cheste situazion tese e instabile, la cundizion economiche e sociâl di chestis tieris tra il ‘500 e il ‘600 no si presentave par nuie prospere. La cressite des tassis, l’indebitament ancje chel in cressite des fameis cuntun redit medi bas, la vendite progressive dai bens comunâi e l'insiorament des fameis nobilis e benestantis e di conseguence il lôr potenziament, a jerin dome il segnâl evident de puaretât difondude e dal malstâ che al zirave tra i contadins e i piçui artesans. Dome cu la seconde metât dal ‘600 la situazion e là un pôc miôr, soredut pe introduzion di dôs inovazions fondamentâls pe economie agricule: la coltivazion dai morârs cul relatîf arlevament di cavalîrs e la coltivazion de blave. In pôcs decenis a deventarin dutis dôs la base economiche fondamentâl de sussistence des classis puaris di chescj paîs; in particolâr la blave, che e veve une rese nete plui grande di chê dal forment, e fo la base primarie de alimentazion par i trê secui dopo. Però il domini assolût tal setôr alimentâr di chest cereâl, che al jere une vore util par slontanâ la pôre de fam, al causà la difusion de pelagre e dal cretinisim in dutis chestis zonis e chestis malatiis a tormentarin Gonârs, Favuîs e Antonian fin al inizi dal Nûfcent. Adun cul decjadiment e cul bloc economic dai secui, ancje il podês des istituzions al là al mancul: il patriarcjât al veve pierdût dutis lis funzions civîls in pratiche za al inizi de dominazion veneziane: cualchidun dai siei teritoris al jere sopognet al control di Vignesie e cualchidun altri al control de cjase de Austrie; lis gastaldiis e lis podestariis a jerin deventadis di man in man jurisdizions di caratar privât, lassadis in ereditât di pari in fi, e leadis a interès cuasi dome familiârs; la fuarce e la libertât des comunitâts rurâls si jerin lentementri degradadis e ridusudis, fracadis dal pês sociâl e economic des fameis dai siôrs. Par volê dal imperadôr Ferdinant II, dal 1647 Gonârs, Favuîs e Antognan a jentrarin te autonome contee dai princips di Gradiscje, che dal 1717 e jere sot de dipendence direte de cjase de Austrie e daspò unide, tal 1754, ae contee di Gurize cul titul di “Contee di Gurize e Gradiscje”. Intun ciert sens in chescj agns si definì il procès di definizion dai confins tra i teritoris venits e chei de cjase de Austrie, leâts intun gredei di jurisdizions e dirits che nol jere facil di disgropâ. La sopression dal patriarcjât di Aquilee tal 1751 e fo il stimul par risolvi il probleme, che al lave indenant di plui di doi secui, di definî il confin tra i teritoris de Republiche e chei dal Imperi. Chest confin al veve un andament intorteât leât prin di dut al percors dai flums e dai cors di aghe de zone (soredut il flum Ausse). La fin dal Patriarcjât al fo ancje la origjin de realizazion des dôs Arcidiocesis di Gurize e di Udin e la definizion dai teritoris dulà esercitâ la lôr competence religjose. La testemoneance concrete, e che e esist ancjemò, dai acuardis di metât Sietcent e je la piere confinarie metude tal 1753 sul confin che al divideve l'abitât di Gonârs di chel di Morsan, po tirade vie tal 1808 par ordin dal Dipartiment di Passarian istituît dai francês e conservade al dì di vuê tal curtîl de canoniche di Gonârs. Su di cheste e je incidude, in latin, la sô funzion: Confin de Austrie Interiôr e dal Friûl Venit, daspò de pâs di Worms mai colocât, metût tal timp dai dominis di Marie Terese romane imperadore simpri auguste, regjine di Ongjarie e di Boemie, Arciduchesse di Austrie e Franz Laurean dôs di Vignesie, cu la mediazion di Ferdinant Filip cont di Harrsch e Zuan Donât pe definizion dai confins. 1753. Però, a diference dal dì di vuê, in chê volte il confin inte plui part des voltis nol veve definizions precisis e di no podê contestâ. Par chest motîf si spieghe il continui conflit di interès tra i doi Stâts confinants.

La ete contemporanie

Cuant che tal 1797 Napoleon al rivà in Friûl, a forin cambiaments profonts, come pardut culà che a jerin rivadis lis armadis dai francês. Il gnûf secul al scomençà sot de tutele de dominazion francês, che e tignì il guvier dal Friûl dal 1805 al 1813. Daspò di jessi passâts sot de aministrazion dal distret di Palme e dal dipartiment di Passarian, i trê abitâts di Gonârs, Favuîs e Antognan a subirin in pôcs agns une profonde ristruturazion aministrative ma ancje politiche e sociâl. Il dât plui impuartant al fo la unificazion dai trê abitâts intun nucli sôl dal comun di Gonârs, fissant la struture atuâl di un cjâf lûc cu lis frazions anetudis, guviernât di un sindic e di conseîrs nomenâts dal prefet dal dipartiment. In chest periodi a forin fondamentâi ancje la introduzion dal codiç civîl, che si sostituì a ducj i dirits e a lis jurisdizions ereditâts ancjemò de ete feudâl, la realizazion di un catastic, clamât propit napoleonic, par une distribuzion plui ecuilibrade de tassazion sul teritori e il miorament des rêts des stradis, prime di dutis la Stradalte (clamade apont ancje “Napoleoniche”), fate plui drete e facile par podê passâ. Cu la sconfite di Napoleon e, plui di precîs dal 1813, al scomençà il secont periodi de dominazion austriache, slargjât in pratiche a dut il Friûl. Par mieç di un proclame, ai 7 di Avrîl dal 1815 al fo istituît il Ream Lombart Venit, che al cjapave dentri dai siei confins ducj i teritoris furlans che prime a jerin stâts sot Vignesie. Dongje di chest e par dâi continuitât, la part dai teritoris furlans che e reste (e che e jere za sot de tutele austriache dai timps prime de Rivoluzion francês) invezit si unì dal pont di viste aministratîf ai “Paîs de Corone”. Però chest confin imagjinari, che al passave propite tes vicinancis di Palme, nol creave nissun stac o separazion tra il Ream Lombart Venit a pene nassût e i dominis ereditaris de Cjase dai Asburc; lis misuris aministrativis a jerin plui o mancul lis stessis, lis misuris fiscâls a jerin cuasi compagnis, la leç comunâl e provinciâl e jere compagne, cussì come lis disposizions che a rivuardavin la istruzion, la justizie e i oblics militârs. Ancje se e jere cheste organizazion positive e un caric fiscâl inferiôr in maniere nete rispiet a chel dai agns di Napoleon, no si pues dî che chestis tieris a acetassin di biel voli e in maniere trancuile il domini de Cjase de Austrie. Lis lamentelis, lis contestazions e lis protestis a jerin numerosis e cualchi a deventavin rivoltis o azions armadis. La concomitance di chescj cambiaments politics e di avigniments dolorôs cuntune sucession di carestiis, leadis a une pessime circostanze climatiche (il 1816 al è clamât “l'an cence Istât”, come i agns dopo che a forin frêts compagn e duncje sfavorevui a la agriculture), a puartarin dute la regjon a nivei di vite pardabon bas, testemoneâts in maniere significative da la definizion di chest piçul periodi, 1813-1821, come «i agns de grande fan». Infratant e nassè la provincie di Udin (1814), che e cjapà dentri ancje i paîs di Gonârs, Favuîs e Antognan che prime a jerin sopognets ae Contee di Gurize e Gradiscje, invezit il Sindic al fo sostituît di un podestât e il catastic che a vevin realizât i francês al fo completât e di conseguence a forin fatis la revision e la perecuazion des tassis. Al fo abolît il Codiç napoleonic, sostituît cul Codiç civîl austriac (par tancj aspiets plui moderni di chel francês), che al restà in vore in Friûl fin al 1871. Soredut però si tornarin a definî lis aministrazions locâls e provinciâls e i siei membris a forin sielzûts pe plui part te classe medi alte locâl par fâ guviernâ i siei sotans di personis leadis diretementri a lôr. Però la situazion economic sociâl des classis medi bassis e continuà a lâ in piês. La ativitât principâl e jere la agriculture che e ocupave la maiorance grandone de popolazion in cualitât soredut di zornadîrs, metadiaris e fituâi. Chescj, sopognets a pats colonics simpri plui pesants, a lavin di man in man a incressi il numar dai contadins che no vevin la tiere. Stant che chestis personis a jerin par fuarce leadis in maniere direte ai flus variabii de ativitât agricule, a costituirin la categorie di int che e fasè scomençâ il fenomen de imigrazion, che al fo clâr e evident soredut da la seconde metât dal secul. Invezit il possediment dai terens al jere, soredut te zone de Basse furlane, in man ai grancj proprietaris, che no ju aministravin in maniere direte, ma par mieç di gastalts e fatôrs, che come impegn principâl a vevin la gjestion e il control de ativitât dai contadins sopognets, pal plui paiâts par mieç dal pat di metadrie. Dongje de agriculture, l'artesanât e la industrie si presentavin tant che ativitâts margjinâls e diretis a une dibisugne dal dut locâl. Il malstâ che al derivave di cheste situazion ferme e puare dal pont di viste economic, adun cui ferments di caratar indipendentist e iredentist, al alimentà i mots dal 1848, che a traviersarin ancje il Friûl lassant segns indelebii soredut te zone di Palme e dai paîs dongje e che a forin la spie plui evidente e significative de unitât de Italie che e vignarà. Di fat tal procès di unificazion nazionâl i teritoris furlans, jessint une zone di confin, a cjaparin une significative impuartance strategjiche; prin di dut lu dimostre la ossilazion dal confin tra il Ream di Italie a pene nassût e la cjase de Austrie, fissât tal Avost dal 1866, ae fin de Tierce Vuere di Indipendence, dilunc di une linie che e passave tra Morsan e Gonârs, e puartât cualchi chilometri a est di Palme tal mês di Otubar di chel stes an. Di chê date indenant il teritori dal dì di vuê dal Comun di Gonârs al fo in maniere stabile teritori talian. Però chest profont cambiament politic, acetât cuntun entusiasim avonde flap, nol puartà une mutazion significative des cundizions economichis e sociâls de Basse planure furlane. La maiorance grandonone de popolazion e lavorave ancjemò te agriculture, che però no rivave a furnî il nudriment che al coventave par dâ di mangjâ in maniere complete dute la popolazion. Cheste situazion di ferme e fo la origjin e la cressite dal fenomen de emigrazion, che e viodè tra la fin dal Votcent e la prime metât dal Nûfcent un numar grandon di zornadîrs partî a cirî fortune e lavôr no dome in Europe, ma ancje tal rest dal mont. Chest al fo il fenomen plui rilevant di un periodi, chel tra il 1866 e il 1914, segnât di decenis di pâs, ma caraterizât di une storie opache, cence acjadiments di significât e di cualsisedi progrès di rilêf. Chescj flus migratoris, soredut temporanis e stagjonâls, ma che un pôc a la volte a cjaparan la forme di emigrazions definitivis, soredut di là dal ocean, a puartarin in Friûl un contribût finanziari consistent par mieç di chel che a mandavin i emigrâts. Tal stes timp al’inizi dal Nûfcent tai teritoris comunâi al nassè un ciert svilup artesanâl e comerciâl, caraterizât in mût particolâr pal teritori di Gonârs da la ativitât des cjalçaduris. Par dut il secul vincjesim, ancje se cun alts e bas inevitabii, chest al fo un dai setôrs economics principâi di cheste zone, adun cun altris ativitâts, come par esempli la lavorazion dal fier e dal len, la masanadure, la sartorie e un numar considerevul di ostîrs e casulins.

La prime vuere mondiâl

Il lent progrès economic de zone e cognossè un moment di ferme tai doi agns prime dal inizi de prime vuere mondiâl. Tra il 1913 e il 1915 e capità une crisi gjenerâl: in pratiche si fermarin i pôcs cumierçs cul forest, la agriculture no jere tes cundizions di fâ invidie, invezit chês pocjis iniziativis sostignudis dai consorzis e dai privâts te Basse furlane, soredut lis bonifichis e la coltivazion di terens gnûfs, a jerin dentri intun contest di cundizions economichis e sociâls masse disastradis par podê modificâlis in curt. Cheste e je par tancj trats la situazion delicade e precarie di dut il Friûl, soredut la Basse planure, su la puarte dal prin conflit mondiâl. Al inizi des ostilitâts in gjenerâl la popolazion e ve une disposizion risiervade e contrarie in mût fuart a la vuere e une idee difondude di jê tant che “calamitât tremende” par un teritori puar che fin da la antichitât al jere stât une tiere di passaç e ancje un cjamp di bataie di numerôs esercits. Propite dilunc dal confin tra Friûl e Austrie si combatè cualchidune des bataiis fondamentâls di dut il conflit. Sul teritori di Gonârs a forin realizâts un ospedalut militâr e un cjamp di aviazion, che al ve la funzion di base di supuart di azions impuartants azions dai aeris militârs talians cuintri dal teritori austriac ongjarês. In particolâr a Gonârs si memore une di chestis azions tal monument ae Aviazion: al è un imponent basrilêf in bronç, realizât tal 1968 dal artist furlan Gigi Di Luca, che al vise de azion di vuere dai 18 di Fevrâr dal 1916 dal Maiôr pilote Oreste Salomone, che, unic superstit dal ecuipaç dal so bombardîr “Caproni”, al ve di rivâ a tiere in emergjence tal cjamp di aviazion di Gonârs. La disfate di Cjaurêt dal Otubar dal 1917 e fasè lâ in piês cence misure i efiets za tragjics de vuere e e fasè colâ dut il teritori furlan tes mans dai esercits dai Imperis Centrâi. La fin dal conflit e consegnà ai furlans, sfinîts e avilîts dai agns di vuere, un teritori devastât: al jere impussibil doprâ il 50% de superficie agrarie, il procès di industrializazion al jere interot e tornât indaûr di plui di trente agns, la popolazion decimade, soredut tes sôs fassis plui produtivis, e obleade ae disocupazion o a migrâ par vie des cundizions di puaretât estreme e des prospetivis di vore che cuasi no jerin. In chest contest il Comun di Gonârs nol jere une ecezion par vie che se di une bande al veve cualchi piçule aziende artesane che si svilupave, di chê altre e subive distès il fenomen de emigrazion. La fin dal conflit e puartà ancje cambiaments sociâi impuartants, prin di dut il sfantament dal mont dal Votcent cui siei privileçs e lis sôs prerogativis. Si lu viôt soredut tai teritoris agricui de Basse furlane dulà che, par vie dai lavoradôrs catolics e socialiscj che a “sburtavin” adun, si concretizà la abolizion de metadie e di ducj chei pats colonics simii a jê e une vore gravôs pal mont dai contadins e dai zornadîrs.

Il fassisim

Tai agns vincj dal Nûfcent al scomençà e al deventà simpri plui fuart il periodi dal fassisim e di chel si pues visâ dal discors famôs che Mussolini al fasè a Udin tal Setembar dal 1922. Di chel an indenant il duce al fasè un acentrament progressîf che al puartà ae afermazion dal stât totalitari, su la fonde di une gjestion acurade dal consens e de repression, e che al prevalè su dutis lis sburtadis viers la autonomie locâl che a saran un pôc a la volte metudis dentri e fracadis dal gnûf stât autarchic e centralizât in maniere fuarte. Dal pont di viste economic par vie de puaretât dai piçui proprietaris de planure furlane, soredut te Basse, a scugnirin ipotecâ lis puaris tieris dulà che a jerin parons. Cun di plui la emigrazion e fo di gnûf un fatôr fondamentâl de vite economiche di dute la regjon, daspò di cualchi an cuant che al someave che e fos stade une regression. Invezit a forin fatis oparis di bonifiche e e fo realizade cualchi opare publiche leade soredut ae viabilitât e ai progjets di sistemazion dai bacins idrografics. Si fasè pôc par promovi la industrie furlane, che no passà, se no di râr, il nivel di piçule aziende, come che al dimostre in mût larc ancje l’artesanât de chê volte nassût tal teritori di Gonârs e tai comuns dongje. Un câs a part al fo l'intervent diret dal Stât cui siei capitâi te realizazion dal stabiliment di Tor di Zuin, bacin di racuelte par dut il secul di un grum di lavoranzie che e rive dai paîs di Gonârs, Favuîs e Antognan. Buine part de opinion publiche si preocupà pe jentrade in vuere de Italie di Mussolini. La ostilitât profonde tai confronts de vuere e dal regjim fassist si manifestà daspò dai 8 di Setembar dal 1943 a traviers de rivolte dai partesans, che e fo fuarte e significative in dut il teritori furlan, e in gjenerâl a traviers dal moviment de Resistence, sostignût dal consens e da la colaborazion de maiorance de popolazion. Par chel che al rivuarde in particolâr il paîs di Gonârs e il so teritori, lis vicendis de seconde vuere mondiâl si learin in maniere une vore strete cu la vite de comunitât locâl par vie che tal autun dal 1941 il regjim fassist al realizà un cjamp di concentrament, dulà che da la vierte dal 1942 a forin internadis miârs di civîi caturâts tai teritoris ocupâts dal esercit talian te ex Jugoslavie.

Il cjamp di concentrament 1942-1943

Par chel che al rivuarde il paîs di Gonârs e in mût particolâr il so teritori, i avigniments de seconde vuere mondiâl si lein in mût une vore stret cu la vite de comunitât locâl par vie che il regjim fassist al realizà tal autun dal 1941 un cjamp di concentrament, dulà che te primevere dal 1942 a forin internâts miârs di civîi cjapâts tai teritoris ocupâts dal esercit talian te Jugoslavie di chê volte. Il cjamp di Gonârs, fat sù a pene fûr dal paîs intun teren dilunc de “Napoleoniche”, al jere formât di dôs centis distintis a cirche un chilometri une di chê altre, il cjamp A e il cjamp B, che al jere dividût in trê setôrs, Alfa, Beta e Gamma. Al jere circondât di un fîl spinât alt, cun toretis di vuardie cun metraiis e fârs potents che lu iluminavin tant che di dì. Il cjamp al jere stât fat sù tal autun dal 1941 in prevision che a rivassin i presonîrs di vuere rus, ma no si lu doprâ mai par chest fin. Invezit te primevere dal 1942 al fo destinât al internament dai civîi di chê che a clamavin la “Provincie taliane di Lubiane”, cjapâts dal esercit talian te aplicazion de malfamade Circolâr 3C dal gjenerâl Roatta, comandant de II Armade, dulà che si stabilivin lis misuris repressivis di meti in vore tai teritori ocupâts che la Italie e veve anetût daspò de agression nazifassiste ae Jugoslavie fate ai 6 di Avrîl dal 1941. Lis dôs massimis autoritâts civîls e militârs de provincie di Lubiane, l'Alt Comissari Emilio Grazioli, scuadrist fin dal prin moment, e il gjenerâl Mario Robotti, comandant dal XI Cuarp di Armade, a meterin in vore lis misuris repressivis cuntune atente ferocitât: cussì a forin fusilazions di ostaçs, fûcs di paisuts e deportazions di popolazions interiis. Te gnot tra i 22 e i 23 di Fevrâr dal 1942 la citât di Lubiane e fo circondade dal dut cul fîl spinât, ducj i oms a forin arestâts, sopognets a controi e la plui part di lôr e fo destinade al internament. In curt ancje chês altris citâts de "provincie" a faserin la stesse fin. I arestâts a forin puartâts tal cjamp di concentrament di Gonârs, dulà che tal Istât dal 1942 a jerin presints za plui di 6000 internâts, ben oltri lis pussibilitâts ricetivis dal cjamp, che al jere stât prontât par mancul di 3000 personis. Par vie de soreconcentrazion, des precariis cundizions igjienichis e de brute alimentazion, ca di pôc si difonderin tantis malatiis, come la dissentarie, che a scomençarin a fâ lis primis vitimis. In chest prin periodi tal cjamp a jerin concentrâts inteletuâi, insegnants, students, operaris e artesans; duncje ducj chei che a jerin considerâts potenziâi opositôrs de ocupazion e tra di lôr a jerin ancje un grum di artiscj che a àn dedicât tantis des lôr oparis ae detenzion tal cjamp. Sot dal pseudonim a jerin internâts ancje esponents dal Front di Liberazion sloven, che po a saressin deventâts dirigjents de Resistence jugoslave. Cualchidun di lôr tal Avost dal 1942 al organizà une fughe clamorose dal cjamp, cul sisteme plui classic: il sgjâf di une lungje galarie sot de barache XXII. Daspò de fughe, la plui part dai internâts e fo trasferide in altris cjamps che tal stes timp a jerin stâts istituîts in Italie, in particolâr a Monigo di Treviso, a Chiesanuova di Padova e a Renicci di Anghiari te provincie di Arezzo e po a Visc, in provincie di Udin, a pôcs chilometris di Gonârs. Ma il cjamp di Gonârs si jemplà in curt di un gnûf gjenar di internâts: oms, feminis, vielis e fruts caturâts tai paîs dal Gorski Kotar, la regjon di mont a nord-est di Fiume, e prime depuartâts a Kampor, te isule di Rab (Arbe). Ca tal Lui dal 1942 il gjenerâl Roatta al veve predisponût la istituzion di un cjamp di concentrament grandon, destinât a jessi une des tapis de "bonifiche etniche" programade dal regjim fassist tai teritoris jugoslâfs ocupâts. Tal Istât dal 1942 a forin internâts plui di 10.000 slovens e cravuats, in cundizions di vite spaventose, in tendis fruiadis, cence servizis igjienics ni cusinis. Di fat i cjamps di concentrament par jugoslâfs a jerin organizâts dai comandants dal esercit talian daûr dal principi esprimût dal gjenerâl Gambara: "Campo di concentramento non è campo di ingrassamento. Individuo malato = individuo che sta tranquillo". In curt la mortalitât a Rab e rivà a nivei une vore alts e il gjenerâl Roatta al decidè di trasferî feminis, vielis e fruts a Gonârs, dulà che, tal autun invier 1942-43, a rivarin miârs di personis in cundizions di debilitazion estreme. Cussì, ancje se l'impegn uman di cualchidun dai uficiâi e soldâts dal contingjent di vuardie, come il miedi Mario Cordaro, tal cjamp di Gonârs plui di 500 personis a muririn di fam e di malatiis. Almancul 70 di lôr a jerin fruts che no vevin nancje un an, nassûts e muarts tal cjamp di concentrament. Come ducj chei altris cjamps fassiscj par internâts jugoslâfs, il cjamp di Gonârs al funzionà fin tal Setembar dal 1943, cuant che, cu la capitolazion dal esercit talian, il contingjent di vuardie al scjampà e i internâts a forin lassâts libars di lâ vie. Tai mês dopo la popolazion di Gonârs e dismantelà il cjamp doprant i materiâi par altris costruzions, come l'asîl infantîl, e cussì vuê des struturis dal cjamp nol reste plui nie. A memorie di chest cjamp di concentrament, par iniziative des autoritâts jugoslavis tal 1973 il scultôr Miodrag Živković al realizà un Sacrari tal cimitieri citadin dulà che in dôs criptis a forin trasferîts i rescj di 453 citadins slovens e cravuats internâts e muarts tal cjamp di concentrament di Gonârs.

I agns de Republiche

Cu la conclusion de seconde vuere mondiâl, cuant che tal teritori furlan si cjatin lis fuarcis armadis che a rivavin dal front talian e chês dal esercit popolâr jugoslâf, a nasserin numerosis problematichis che a costituirin lis liniis vuide dal dopovuere furlan e talian, primis tra dutis chês leadis ae definizion dai confins, che aromai di secui a jerin un pont critic di cheste zone, e al câs particolâr di Triest e dal so teritori. Il fat plui impuartant dal secont dopovuere al fo la determinazion, tal moment di fâ il gnûf asset aministratîf e costituzionâl dal Stât talian, da la nassite de Regjon «Friûl-Vignesie Julie», che e puartà aes primis elezions pal Consei de Regjon che al fo fat ai 10 di Mai dal 1964. In chescj agns di ricostruzion e di riprese daspò de vuere si svilupà un progrès economic che pe prime volte al puartà a bandonâ il setôr agricul par indreçâsi di plui viers di chei altris setôrs, prin di dut chel industriâl. Cussì la proprietât dai terens, ancje chê de Basse dulà che lis sburtadis viers di un inmodernament des tecnichis e di dut il setôr a jerin plui fuartis, e viodè pierdi la sô impuartance, a pro di une significative jevade industriâl, soredut tal setôr metalmecanic. Par chel che al rivuarde il bas Friûl, duncje cun chest ancje il Comun di Gonârs, a forin significatîfs i sfuarçs indreçâts aes bonifichis e a realizâ la grande e la piçule viabilitât (soredut te direzion autostradâl Vignesie-Triest, dulà che si tache ancje la direzion Palme-Udin-Tarvis), ma soredut la difusion de piçule industrie che e veve in bande l’artesanât locâl, che però al jere diret in buine part ancje ai marcjâts internazionâi e a chei di un continent a chel altri. Cussì i seconts cincuante agns dal secul a vioderin la difusion progressive di une economie industriâl e artesanâl che e deventà simpri plui ative e vierte ai inflùs internazionâi. Gonârs al jentrà in cheste evoluzion soredut a traviers dal marcjât des cjalçaduris. In chest setôr la creazion di scarpis di piel economichis e puartà a une produzion destinade a un marcjât di masse, direte ancje a la Austrie, ae Gjermanie, ae Olande, ae Belgjiche e a altris paîs diferents. Il taramot dal Mai dal 1976, e lis numerosis scossis seguitivis, che a devastarin la plui part dal teritori de regjon, a lassarin in sostance salfs i teritoris dal Bas Friûl, che però a parteciparin al corot des comunitâts plui cjapadis e si ufririn in maniere ative par judâ i comun plui devastâts e par tornâ a fâju sù. Cheste ricostruzion e rivà in curt e in un ciert sens e de un stimul gnûf ae economie che dut câs no rivà a evitâ la crisi rivade tai doi decenis dopo. Ancje Gonârs cul so teritori al paià cheste situazion economiche negative, cun segnâi di regression te produzion des cjalçaduris. Cumò, in gracie de realizazion di une zone artesanâl, a son nassudis un grum di ativitâts artesanâls e comerciâls dongje de SS252 “Napoleoniche”. Duncje la ativitât economiche e risulte dividude in plui ativitâts e no dome concentrade intun sôl setôr de produzion.

Leams esternis

• (furlan) Sportel pe lenghe furlane

Bibliografie

• Alessandra Kersevan, Un campo di concentramento fascista. Gonars 1942-1943., Kappa Vu Edizioni, Udine, 2003
• Ermanno Dentesano, Gonars. Un comune della bassa friulana, Gonars, Gruppo Culturale Ricreativo di Fauglis, 1981, 8º, 160 p.
• Ermanno Dentesano, Gonars: vie e storie, Gonars, Comune di Gonars, 2003, 82 p.
• Ermanno Dentesano - Barbara Cinausero, I nons locâi dal Comun di Gonârs, Gonârs/Udin, Comun di Gonârs / Societât Filologjiche Furlane, 2005, 247 p.