Nuurdwaast (Prowins uun Süüdaafrika)

Det Nuurdwaast Prowins (üüb Ingels: North West Province, üüb Tswana: Bokone Bophirima) as ian faan dön njüügen prowinsen faan Süüdaafrika. At prowins leit uun a nuurd faan't lun. Uun a nuurd an nuurdwaast leit Botsuana, uun a nuurduast det Limpopo Prowins, uun a uast det Gauteng Prowins, uun a süüduast det Freistoot Prowins an uun a süüdwaast det Nuurdkap Prowins. Det hee 3.509.953 lidj (2011)^[1]. At hoodsteed faan’t prowins as Mahikeng.

Tekst üüb Fering

Det Nuurdwaast Prowins uun Süüdaafrika

Geografii

A Magaliesberger lei uun a nuurduast faan't prowins an de Vaal Struum maaget at grens uun a süüd. At süüddial faan a nuurdwaast as en widj gebiit faan flaak lun an a nuurddial hee ei föl buumer.

Steeden

Nuurdwaast (Prowins uun Süüdaafrika) (Nordwest (Südafrika)) Mahikeng Mahikeng Rustenburg Rustenburg Klerksdorp Klerksdorp Potchefstroom Potchefstroom Orkney Orkney Brits Brits Stilfontein Stilfontein Vryburg Vryburg Lichtenburg Lichtenburg

Koord faan det Nuurdwaast Prowins

Dön tjiin gratst steeden uun't prowins san:

#	Steed	Lidj (2011)[2]
1	Rustenburg	311.901
2	Klerksdorp	189.496
3	Potchefstroom	148.804
4	Orkney	91.854
5	Brits	65.113
6	Mahikeng	64.359
7	Stilfontein	63.836
8	Vryburg	46.639
9	Lichtenburg	45.449
10	Letlhabile	41.497

Iindialing faan Ferwalting

Koord faan a Munisipaliteeten faan det Nuurdwaast Prowins

At prowins hee fjauer distrikt-munisipaliteeten:

• Bojanala Platinum
• Dr Ruth Segomotsi Mompati
• Ngaka Modiri Molema
• Dr Kenneth Kaunda

Befölkring

Det letst folksteeling wiar uun't juar 2011. Efter a resultooten hee't prowins 3.509.953 lidj: 1.779.903 faan a lidj san karmen an 1.730.049 san wüfhööd^[3].

Spriiken

Ferdialing faan a Spriiken uun a Nuurdwaast (Folksteeling 2001):

Afrikaans

Ingels

Süüd-Ndebele

isiXhosa

isiZulu

Nuurd-Sotho

Sesotho

Setswana

Xitsonga

Nian spriik hee en grat taal

Efter't folksteeling uun't juar 2001, 65,4 % faan a lidj uun't prowins snaaket Tswana (Setswana) an 7,5 % Afrikaans^[4].

Histoore

At prowins wurd 1994 grünlaanjen, üüs dialen faan det Kapprowins an det Transvaal Prowins mä dial faan't bantustan Bophuthatswana tuplaanjen wurd.

Politiik

Ferdialing faan a Sitsen uun't Parlament faan a Nuurdwaast sant 2019:

ANC (21

EFF (6)

DA (4)

VF+ (2)

Det North West Provincial Legislature as at parlament faan't prowins. Det weelet at kabinet an a premier-minister faan't prowins faan't partei of koalitschuun, wat dön miast lasmaaten uun't parlament hee. A premier-minister faan't prowins sant 2018 as Job Mokgoro faan det African National Congress (ANC). Det ANC as sant 1994 det starkst partei uun't parlament.

Dön ual premier-minister san: Wendy Nelson (Mei-Jüüne 2018), Supra Mahumapelo (2014-2018), Thandi Modise (2010-2014), Maureen Modiselle (2009-2010), Edna Molewa (2004-2009), Popo Molefe (1994-2004).

Wiartskap

At prowins hed uun't juar 2016 en BIP faan 279.733 miljuunen Rand, wat 6,4 % faan't BIP faan Süüdaafrika as^[5]. Det wichtigst sektoor uun't wiartskap faan't a Nuurdwaast as a berigbau, wat muar üüs at heleft faan't BIP faan't prowins bidreecht. A hoodmineraalien san:

• gul, wat uun Orkney an Klerksorp ufbaut wurt;
• platin, wat uun Rustenburg an Brits ufbaut wurt; an
• diamanten, wat uun Lichtenburg, Christiana an Bloemhof ufbaut wurt.

Kwelen

1. South Africa: Provinces and Major Urban Areas, citypopulation.de
2. South Africa: Provinces and Major Urban Areas, citypopulation.de
3. North West: Province in South Africa, citypopulation.de
4. Folksteeling faan 2001 (Resultoot üüs pdf; 624 kB) (Memento faan di 18. Mei 2012 uun't Internet Archive), s. 16.
5. Stats SA, Provincial GDP Figures

Prowinsen faan Süüdaafrika

Freistoot | Gauteng | KwaZulu-Natal | Limpopo | Mpumalanga | Nuurdkap | Nuurdwaast | Uastkap | Waastkap

Prowinsen faan't Süüdafrikoonsk Unioon bit 1994: Kapprowins | Oranje-Freistoot | Natal | Transvaal