Pablo Gonzálvez González [ˈpaβlo ɣon̟ˈθɑlβeθ ɣon̟ˈθaleθ], maestru, poeta i gramáticu estremeñu naciu en Calçailla.
Es autol de la Primera Gramática Ehtremeña i de várius poemárius. El su trebaju nel campu la Filologia Estremeña á siu la mas enportanti hata el momentu, por sel la primel ententona de normativizal el estremeñu.
Pablo Gonzálvez González tuvu nacéncia en Calçailla (Caçris) nel añu 1934,[1] iju de pairis agricultoris. Cursó los estúdius de Umaniais i Filosofia nel Semináriu Diocesanu de Cória-Caçris por onzi añus. Otuvu el títulu Maestru Nacional de Primel Enseñança endespues d’estudial comu alunu libri ena Escuela Normal de Magistériu de Caçris. Acabó la su hormacion por mé de cursillus de la su especialiá i tamien por mé de várius cursus de Filologia Ispánica ena UNED.[1]
Activiá literária
Escomiençó nel mundu la literatura de nuevu, espubricandu, a vezis con seudónimu, conposicionis poéticas ena revista Alcántara.
En 1981 espubricó un poemáriu entitulau Hojas extremeñas sueltas,[2][1] ondi tendria cabusia poesia lo mesmu en castellanu comu en estremeñu.
En 1982 por conseju dunus amigus, Pablo Gonzálvez se presentó al VI Concursu «Ruta de la Plata» lograndu el primel prémiu ena moaliá de «palra populal» con un poema entitulau La briega. A partil d'esti prémiu esmiençaria a cogechal una notabri sérii de galardonis comu el primel prémiu nel certamin pracentinu poesia en castellanu «Exaltación de la encina» i el primel accesit nel concursu convocau pol Extremadura Unida, dambus los dos nel mesmu añu, con el poema No ehtá la tierra pa hadel indirguih.
Ansimesmu recebi un galardón (accessit) nel certamin literáriu del Martis mayol de la capital el Jerti en 1984 con el poema Alilaya.
En 2002 espubricó un nuevu poemáriu entitulau Nuevah hojah ehtremeñah sueltah.[2][1]
En 2005 feguran angunus los sus poemas ena primel antulogia hecha de poesia en estremeñu a manus de Luis Martínez Terrón.
Activiá envestigaora
Pablo Gonzálvez es unu los mayoris conoceoris el estremeñu, aportandu no comu obra filológica namás, sino tamien comu obra literária la Primera Gramática Ehtremeña en 1995.[3][4] Esta obra pretendi albarcal la idioma duna horma global, çalachandu el sistema lingüísticu el estremeñu enos sus diversus andaris fonéticu, morfológicu i sintáticu. Comu hechu señalabri, destaca la su propuesta ortográfica fonetista ondi letras cumu la x o la j no feguran endrentu el alfabetu estremeñu i gasta pa represental tolos tipus d’aspiracionis la letra h. Se trata de la primel propuesta de normativizal el estremeñu escritu, enque son muchas las deficultais que deja ascapi. Amás la Gramática de Gonzálvez peca d’enfocal una gramática en conparáncia sempri con el castellanu, descudiandu al lionés i al portugués comu luengas mas cercanas a las raizis el sustratu el estremeñu.
Lleva várius añus trebajandu en un veluminosu dicionáriu de mas de 70.000 términus del que entavia se sabi la fecha pubricación. Aprepara tamien una obra de caraiti demosóficu de Calçailla.
Tamien tien participau en dos de los tres congressus celebraus sobri el estremeñu, el primeru ena su localiá natal, Carçailla, nel 2003 i el segundu en San Peiru de Méria (Baajos) nel 2004.
Wikiwand in your browser!
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
