Comunismu
From Wikipedia, the free encyclopedia
El comunismu (de común),[1] entendiu como organización social i económica, es una associación basá ena comunidá delos medius socialis de produción i los bienis que con ellus se proucin, medianti la participación direta delos sus biembrus en un ámbitu de via coletiva. A deferencia de lo que passa en el socialismu, el comunismu implica el fin dela especialización ena devisión del trebaju[2][3] i del dineru.[4][5][6][7][8]
El comunismu, entendiu comu movimientu socio-políticu, es un conjuntu de corrientis i agrupacionis cuyu prencipal ojetivu estóricu es —particularmenti dendi l'adopción dela dotrina marsista— la supresión revolucionaria dela sociedá capitalista en tantu última horma de sociedá con crassis, i el establecimientu de una sociedá socialista comu passu previu ala construción gradual de una organización social comunista. Las dotrinas delas diversas corrientis comunistas coincidin ena necessidá de acabal cola propiedá privá (especialmenti la delos medius de produción socialis) i ena emancipación del proletariau comu la primel crassi oprimia sin economía propia,[9] negación de toa possibli apropiación privá i por endi tendienti a desaparecel como crassi en una comunidá comunista.[10]