José María González-Sinde

José María González-Sinde (Burgos, Espainia, 1941eko urriaren 12a - Madril, Espainia, 1992ko abenduaren 21a) espainiar zinema-ekoizle eta zinema-zuzendaria izan zen.

José María González-Sinde
Bizitza
Jaiotza	Burgos, 1941eko urriaren 12a
Herrialdea	Espainia
Heriotza	Pozuelo de Alarcón, 1992ko abenduaren 21a (51 urte)
Hezkuntza
Hizkuntzak	gaztelania
Jarduerak
Jarduerak	film-zuzendaria, gidoilaria eta zinema ekoizlea

Biografia

Soinu eta Irudian lizentziatu zen Madrilgo Unibertsitate Konplutentsean, eta ekoizpen-ikasketak Zinemako Eskola Ofizialean egin zituen. Telesaio ugaritan ekoizle-esperientzia handia jaso ondoren, filmak produzitzen hasi zen: José Luis Garciren Asignatura pendiente (1976); Solos en la madrugada (1977); Las verdes praderas (1978); eta Sesión continua (1984); Jordi Grauren Chicas de club (1970); José Luis García Sánchezen El love feroz (1973); Basilio Martín Patinoren Queridísimos verdugos (1975). Zuzendari-lanak ere egin zituen, bi film luzetan: Viva la clase media (1980) eta A la pálida luz de la luna (1985).

Bestalde, Espainiako Zinema, Arte eta Zientzietako Akademiako lehen presidentea izan zen, eta berak sortu zituen Goya sariak, zinemako espainiar sari nagusiak. Azken urteetan, Madrilgo telebista autonomikoko zuzendari nagusi izan zen, eta baita Madrilgo Udazkeneko Zinemaldiko zuzendari ere.

Erreferentziak

• Artikulu honen edukiaren zati bat Lur hiztegi entziklopedikotik edo Lur entziklopedia tematikotik txertatu zen 2011/12/27 egunean. Egile-eskubideen jabeak, Eusko Jaurlaritzak, hiztegi horiek CC-BY 3.0 lizentziarekin argitaratu ditu, Open Data Euskadi webgunean.

• Datuak: Q9014411