From Wikipedia, the free encyclopedia
Jarrai Euskal Herriko gazte erakunde independentista eta sozialista zen. 1979ko maiatzaren 6an sortu zen, aurrekari bezala Euskadiko Gaztedi Abertzaleen Mugimendua (EGAM) eta Gazteria Abertzale Iraultzailea (GAI) izan zituen. Hego Euskal Herriko gazteen artean, Euskal Nazio Askapenerako Mugimenduaren, ezker abertzalearen erreferentea zen. Halaber, KASen gazteriatzat kontsideratua zegoen.
| Jarrai | |
|---|---|
 | |
| Datuak | |
| Mota | gazte erakunde politikoa |
| Herrialdea | Espainia |
| Ideologia | Eusko abertzaletasuna, Marxismoa, Sozialismo iraultzailea eta independentzia |
| Jarduera | |
| Honen parte | ezker abertzale eta Koordinadora Abertzale Sozialista |
| Historia | |
| Sorrera | 1979ko maiatzaren 6a |
| Ondorengoak | Haika |
| Desagerpena | 2000 |
| Koloreak | |
1978ko udan HASI eta LAIA alderdietako (Garaiotan bi hauek KASen barruan zeuden) gazteak KASekin bat egiten zuten gazteak bilduko zituen erakunde bat sortzeko oinarriak jarri zituzten, gerora beste gazte independiente batzuk atxikitu zirelarik, behin-behinean KAS gazteriak izena hartu zuen antolakunde honek. Bizkaia eta Gipuzkoan hasi zuen bere jarduna eta gutxira Hego Euskal Herriko beste herrialdeetara ere zabaldu zen. Erakundea zabaltzen joan zen heinean eztabaida eta hausnarketak zabalduz joan ziren Euskal Herriko gazte mugimenduaren historia, EGAM eta GAI bezalako erakunde abertzaleen esperientzien inguruan, erakundearen izaeraren inguruan eta beste hainbat gaien inguruan.[1]
1979an Jarraik bere Sorrera Biltzarra burutu zuen bi zatita egin zena. Urte bereko apirilean Leioako Unibertsitatean egindako lehenengo zatia delegatu izaera izan zuen eta Jarrai gazte erakunde abertzale sozialista eta autonomo bezala definitu zen eta eskubide osoko kide gisa KASen barneratzea erabaki zen, ulertuta "Euskal Herrian KASek osatzen zuela alternatiba demokratiko eta apurtzaile bakarra". Maiatzaren 6an Beasainen burututako bigarren zatian, militante guztiak parte hartu zuten eta lehen zatian onartutakoa berrestu egin zen. Sorrera Biltzar hau bukatuta Jarraik bere aurkezpen publikoa egin zuen urte bereko maiatzaren 10ean Bilbon.[1]
1979an KAS gidaritza bloke bezala definitu zenean (KAS gidaritza blokea ponentzia onartzean) Jarrai gazte mugimendurako KASeko erakunde bezala definitu zen, gazteriaren problematika lantzeko bere izaera guztietan. Gidaritza Blokearen kide gisa bere estruktura militantea hertsia, kohesio handikoa eta barne homogenizazio altukoa zen, bere barnean jarduera zatikatzaile eta korronterik gabekoa.[2]
1992an HASI alderdia disolbatzean KASen barruan birmoldatze prozesu bat hasi zen 1994an Txinaurri izeneko dokumentu bat osatzera eraman zuena eta ordurarteko KASen antolakuntza ereduari kritika sakonak egiten zuena, honek ASKren disoluzioa ekarri zuen eta KASetik LAB eta Jarrairen irteera.[3]
2000. urtean Gazteriakekin batu zen Kanbon egin zen Gazte Topagunean, Haika erakundea sortuz[4]. Haikaren ilegalizazioaren ondorioz gazte talde bat bildu eta Segi izeneko erakundea antolatu zuten. Espainiako Auzitegi Nazionalak ETArekin zerikusia duen talde terroristatzat hartzen du 2007tik.
2007ko otsailaren 4ean, Espainiako Auzitegi Goreneko deklarazio batetik ihesita zeuden Jarrai, Haika eta Segiko 19 lagunetik 18 atxilotu zituen Ertzaintzak Bilbon.
1996an, Juan Maria Atutxak, Jarrai ilegalizatzearen alde agertu zen publikoki.
Atutxaren iritzian KAS, Egizan, Jarrai eta Amnistiaren aldeko batzordeak legez kanpo uztea gauza on bat izango zen[5].
| « | Nik ulertzen dut agian ez dela zuzenena baina zera esan ahal dut: legez kanpo utz ditzagun sigla alegal horiek. Ilegaltzat har ditzagun. Eta hauek legez kanpo uztea diot: Jarrai, Egizan, Amnistiaren Aldeko Batzordeak eta KAS. Gutxienez sigla hauek. Beraz, komunikabideen aurrean erakunde hauen siglen ordezkari, bozeramaile edo arduraduna ustezko delitugilea dela adierazi dezagun | » |
| Juan Maria Atutxa, Eusko Jaurlaritzako Segurtasun Sailaren burua, 1996 | ||
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
