![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/e/ed/Rotavirus_TEM_B82-0337_lores.jpg/640px-Rotavirus_TEM_B82-0337_lores.jpg&w=640&q=50)
Reobirus
Harizpi bikoitzeko RNAdun animalia-birusak, estalki gabekoak, eta gizakietan digestio-aparatuan eta arnas aparatuan gaitzak eragiten dituztenak / From Wikipedia, the free encyclopedia
Reobirusak Reoviridae familian sailkatzen diren birusak dira. Familia horretan genero desberdinak daude; Rotavirus, Cypivirus eta Orbivirus dira aipagarrienak.
Familiaren izena ingelesezko sigletatik dator: Reoviridae (Respiratory Enteric Orphan Virus), birus hauek arnas traktuan eta digestio-aparatuan sortzen baitituzte gaitzak; Orphan edo Umezurtz terminoa ere gehitu zitzaion, hasieran isolatu ziren lehenengo birusak ez baitzeuden inongo gaitzekin lotuak.
Reobirusak tamaina ertaineko birusak dira (60-80 nm). Material genetikoari dagokionez, harizpi bikoitzeko RNA dute. Hain zuzen ere, animalia-birusen artean reobirusak dira kate bikoitzeko RNA duten bakarrak. Genomaren beste ezaugarri bereziren bat zatituta dagoela izaten da (10-12 zatitan, generoaren arabera), ortomixobirusen antzera. Kapsidea ikosaedrikoa da, kanpoko bilgarririk gabekoa (birus "biluziak" baitira).
Harizpi bikoitzeko RNA-k ezin du zuzenean itzulpen genetikoa garatu. Hori dela eta, RNA horrek RNA-m sortzen du lehen transkripzioaren bitartez, birusak berak dituen entzimei esker.
Reobirusak giza-patogenoak dira. Batzuek digestio-aparatuari eragiten diote, gastroenteritis sortuz (errotabirusak, esaterako); beste batzuek arnas aparatuari, arnas patologiak sorraraziz.