Šuto Orizari

Шуто Оризари, makedone jen en la kutima cirila alfabeto, latine Šuto Orizari, cigane Shuto Orizari, aŭ simple Шутка respektive Šutka estas unu el la 10 komunumoj, kiuj konsistigas la la komunumaron Granda Skopjo ĉirkaŭ la ĉefurbo Skopjo kaj unu el sume 17, kiu konsistigas la statistikan regionon Skopjo. Laŭ la stato de 2021 en la komunumo vivis 25 726 loĝantoj sur areo de 7,48 kvadrataj kilometroj, kio rezultigas loĝdenson de 3 439 loĝantoj/km². La municipo estas la laŭ la stato fine de 2023 inter la tre malmultaj lokoj de la mondo kie la cigana lingvo estas oficiala komunikilo (aliaj kazoj estas kunoficiala statuso en 79 komunumoj de Rumanio inkluzive de Budeşti, statuso de regiona lingvo de Kosovo, kaj statuso de minoritata lingvo en Svedio kaj Finnlando). Kialo por la oficialeco en Šuto Orizari estas, ke temas pri la sola municipo en la respubliko en kiu la romaoj konsistigas la plimulton de la loĝantaro: Laŭ la censo de 2002, el tuta loĝantaro de 17 357 homoj, 13 311 homoj, do 76,6 procentaĵoj, estis romaoj, pli ekzakte subgrupo de ĥoraĥanaj ciganoj, do subgrupo de islamaj romaoj.^[1] Aliaj signifaj etnaj grupoj estis albanoj (2 594 homoj aŭ 14,9 procentaĵoj, kaj makedonianoj (962 homoj aŭ 5,5 procentaĵoj.^[1] Dum la konfliktoj de la la Kosova milito multaj romaaj rifuĝintoj trovis novan vivlokon ĉi-tie. La vasta plimulto inter la komunumanoj - sendepende de la etneco - religie estas islamanoj.^[2]

Šuto Orizari
Komunumo de Nord-Makedonio vd
Flago	Blazono
Administrado
Lando	Nord-Makedonio
Regiono	Granda Skopjo
Komunumaro	Granda Skopjo
Poŝtkodo	1000
En TTT	Oficiala retejo [+]
Demografio
Loĝantaro	25 726  (2021) [+]
Loĝdenso	3 439 loĝ./km²
Geografio
Geografia situo	42° 3′ N, 21° 25′ O (mapo)42.04194444444421.421944444444 [+]
Alto	297 m [+]
Areo	7,48 km² ( 748 ha) [+]
Šuto Orizari (Nord-Makedonio) DEC Situo de Šuto Orizari
Alia projekto
Vikimedia Komunejo Šuto Orizari Municipality [+]
v • d • r

Politiko

Koresponde al la demografio, kaj la cigana kaj la makedona lingvo estas oficialaj lingvoj en Šuto Orizari. La albana ankaŭ estas multe uzata en la publika vivo, sed ne estas oficiala lingvo. La urbestro de la komunumo laŭ la stato fine de la jaro 2014, Elvis Bajram, estis romao.

En 2009, la registaro de la Respubliko de Makedonio intensigis siajn klopodojn pli forte integrigi la lokajn romaajn infanojn en la edukajn programojn de la lando. Ŝtate pagita mezlernejo en Šuto Orizari, en kiu la cigana kaj la makedona estas la instruaj lingvoj, ekkonstruiĝis la 10-an de februaro 2009 kaj fine signifis investon de 1,6 milionoj da Eŭroj.^[3]

Referencoj

1. pdf-dosiera listo pri la demografio de makedoniaj municipoj laŭ etnaj grupoj, datumoj de la censo de 2002, libro C, tabelo 2, paĝo 65, eldonita per la statistika departemento de la Respubliko de Nord-Makedonio (makedone, kaj iom angle)
2. Factsheets on Roma (angle: "informoj pri la romaoj") en paĝo de la Universitato de Graz, jen arkivigita laŭ stato de oktobro 2022
3. reta informo de la registaro de la Respubliko de Makedonio en 2009 Arkivigite je 2011-09-28 per la retarkivo Wayback Machine (makedone)

Eksteraj ligiloj

• Kategorio Šuto Orizari en la Vikimedia Komunejo (Multrimedaj datumoj)

• enirpaĝo de la komunuma retejo, en la makedona, arkivigita en majo 2013. Pli poste ne estas arkivaj kopioj, kaj plej laste en 2017 la retejo estis frakasita.