Naciaj Historiaj Lokoj (Usono)

Naciaj Historiaj Lokoj estas protektataj lokoj en Usono, kiuj havas historian signifon. Tri specoj estas distingitaj en la nomenklaturo de la usona nacia parka sistemo:

• Nacia Historia Loko (National Historic Site, NHS) enhavas iun historie gravan elstaraĵon (ekzemple, konstruaĵon). En 2010 estis 78 Naciaj Historie Gravaj Situoj en la parka sistemo, ampleksantaj entute areon de 87,7 km².^[1]
• Nacia Historia Parko (National Historical Park, NHP) estas pli ĝenerala, kaj ofte iom pli ampleksa, enhavante diversajn historiajn kaj eventuale ankaŭ naturajn elstaraĵojn. En 2010 estis 41 Naciaj Historiaj Parkoj en la sistemo, ampleksantaj entute areon de 481,7 km².^[1]
• Nacia Historia Objekto (National Historic Landmark) estas objekto aŭ loko, kiun la registaro de Usono rekonis kiel aparte historie grava, ekzemple Alcatraz.
• Krom tiuj klasoj, estas ankaŭ preskaŭ 80 000 aliaj lokoj registritaj en la Nacia Registro de Historie Gravaj Lokoj.

Nacia Historia Loko Monteto Sagamore, la hejmo de ŝtatprezidanto Theodore Roosevelt

Misiejo Concepción ĉe Nacia Historia Parko Misiejoj de San Antonio

Naciaj Historiaj Lokoj kaj Naciaj Historiaj Parkoj plejparte estas posedaĵoj de la usona registaro, kaj estas prizorgataj de dungitoj de la sistemo de Naciaj parkoj. La Naciajn Historiajn Objektojn kaj Naciajn Historiajn Lokojn, kontraste, ĝenerale ne proprietas la registaro nek prizorgas la Nacia parka sistemo.

En la anglalingva nomenklaturo, la Nacia parka sistemo eble iom harfendeme distingas inter "historic" (historie grava) kaj "historical" (historia).

La jura bazo de la Historiaj Situoj estas la leĝo "Historic Sites Act" de 1935. La unua establita estis en Salem, Masaĉuseco, en 1937, por konservi kaj interpreti la maran historion de Nov-Anglio kaj de Usono.

Ekzistas unu "internacia historie grava situo" en la usona sistemo, nome Insulo Saint Croix (Majno), ĉe la limo de Nov-Brunsviko, kie la unua konstanta francaro eksetlis en Norda Ameriko. Ĝi rekonas la gravan influon de tiu ekloĝo al la historioj de kaj Kanado kaj Usono.

Ankaŭ inter la naciaj historiaj parkoj troviĝas unu "internacia", nome Internacia historia parko de la Orimpetego Klondike, formale establita de la registaroj de Usono kaj Kanado en 1998. Ĝi konsistas el tri disaj partoj, situantaj en Vaŝingtonio, Alasko, kaj Jukonio.

Referencoj

1. Wright, John W. (ed.); Editors and reporters of The New York Times. (2006) The New York Times Almanac, 2007‑a eldono, New York, New York: Penguin Books. ISBN 0-14-303820-6.

Eksteraj ligiloj

• Kategorio Naciaj Historiaj Lokoj (Usono) en la Vikimedia Komunejo (Multrimedaj datumoj)

• U. S. National Park Service (anglalingva retejo de la Usona nacia parka sistemo