From Wikipedia, the free encyclopedia
Miranduléś|
C'l artìcul chè 'l è scrit in
Miranduléś |
La Monica Niculescu (Slatina, 25 ad Setémbar dal 1987) l'è na tenìsta ruména prufesiunìsta da 'l 2002 ch'l'è stada bòna ad rivàr a èsar la nùmar vint-i-òt dal mónd al 27 ad Favràr dal 2012. La stà a Bùcarest.
L'è élta 168 cm e la péśa 63 chilo. La dróa al bras dèstar ma la tira drit e arvèrs c'n al dū maṅ. A gh piàś scultàr la mùśica, far dal còmpri, la mòda e guardàr di film, Il gladiatore 'l è al sò preferî.
In dla sò caréra 'l à vins un turnèo dla WTA al 5 'd Utóbar dal 2008 a Florianópulis cóntar l'Ol'ga Alekseevna Pučkova par 6-2 4-6 6-4 e sédas ad qvéi d'l ITF.
La taca a śugàr i sò prim turnèo ITF in dal 2002 e in Agóst l'è bèla bòna ad far suo qvél ad Bùcarest, al nùmar òṅ, baténd in finàl la Cvetana Pironkova par 6-1 7-6. La in vins dū da déś-mila dòlar anc in dal 2003 e pò quàtar in dal 2004.
In dal 2007 la tōś part a 'l turnèo WTA dal Dubai cun na carta salvàdga ma la và fóra subìt par maṅ dla Marija Kirilenko. In d'l an la vins tri ITF da vintsìnc-mila dòlar ma la n è mai bòna ad pasàr al qualificasiòṅ par śugàr un quàlc WTA. La 'l taca però a far in dal 2008. A gl'Australian Open e a Bangalore la và fóra a 'l prim tùran mént'r a Doha la gh'à da pigàr-as a la Sybille Bammer un tùran dòp. A Róma la s qualifìca mandànd a cà l'Ekaterina Makarova, pò la bat la Jill Craybas in tri sét ma la n pōl far gnint cun la Viktoryja Azaranka mént'r a 'l Roland Garros l'è la sérba Jelena Janković a bat'r-la. Dòp gl'utàṿ a New Haven (3-6 3-6 da la Caroline Wozniacki), la riva in di quàrt a Taškent (7-6 2-6 4-6 da la Shuai Peng) e pò incóra in di utàṿ a Śurîg in dua però la vèṅ stlada da la Viktoryja Azaranka par 6-0 6-0. La finìs 'l an listés a la puśisiòṅ quarànta-sèt dal mónd.
La taca mâl al 2009 pardénd tri di quàt'r incóntar śugâ in Austràglia, pò la fà secónd tùran a Parì a 'l quèrt e a Dubai. Dòp soquànt prim tùran, a Straśbûrg la riva in di quàrt ma la céd a la Aravane Rezaï par 6-0 1-6 2-6. La fà quàrt anc a Taškent cun la Jaroslava Švedova e pò gl'utàṿ a Mósca in dua la ciàpa un 2-6 5-7 da la Francesca Schiavone. In dla prima mità dal 2010 la fà sù pôc. A Wimbledon la bat a 'l prim tùran la Gisela Dulko ma pò la patìs na scòpla da la Flavia Pennetta par 1-6 1-6. La tenìsta 'd Brìndaś la la bat anc a 'l secónd tùran ad Cincinnati lasànd-ag sōl un śōg dòp che la ruména l'iva fat fóra la Sabine Lisicki par 6-3 6-0 e pasâ 'l qualificasiòṅ. A gl'US Open la pòrta via 'n sét a la Viktoryja Azaranka ma la pèrd listés a 'l prim tùran. A Taškent la riva par la prima vòlta in semifinàl in un turnèo WTA ma cun l'Elena Vesnina la céd par 3-6 6-3 4-6.
In dal 2011 la riva fàcil a 'l tèrs tùr'n a Melbourne par pò lasàr-'g al péni cun la Francesca Schiavone par 0-6 6-7. A Indian Wells la pasa 'l qualificasiòṅ ma la céd a 'l secónd tùran a la Marion Bartoli par 6-2 3-6 2-6, stés riśultâ anc a Miami in dua la lasa strada a la Jelena Janković. A Esturìl la bat la Bethanie Mattek-Sands 6-4 5-7 6-3, la Sloane Stephens 6-4 6-4 e la Jarmila Gajdošová 5-7 6-4 6-2 prima ad pèrdar in dū sét cun l'Anabel Medina Garrigues. A New Haven la pésc' incóra la Francesca Schiavone in di utàṿ e la milanéśa la gh lasa 'l briśi, 6-2 6-1 al puntéǵ. La ruména la śōga pò a la granda gl'ùltim tri turnèo dla stagiòṅ. A gl'US Open la bat la Patricia Mayr-Achleitner a 'l prim tùran par 6-3 6-3, pò la sténd l'Alexandra Dulgheru par 6-3 6-0 e la Lucie Šafářová par 6-0 6-1. In di utàṿ però a và avànti l'Angelique Kerber par 6-4 6-3. A Pechîn la mandà a cà subìt la Na Li 6-4 6-0 e pò la dà la paga anc a la Chanelle Scheepers, a la Virginie Razzano e a la Marija Kirilenko prima ad cédar a la tedésca Andrea Petković par 2-6 0-6. In Lussembûrgh la riva par la prima vòlta in finàl ma 'l tìtul la s al pòrta a cà la Viktoryja Azaranka par 6-2 6-2. La Niculescu la s cunténta 'd èsar rivàda a èsar la nùmar trénta dal mónd.
In dal 2012 la pòrta a cà i sò riśultâ più bèi a Melbourne (tèrs tùran cun la Caroline Wozniacki) e a Doha (quàrt baténd l'Elena Vesnina, la Vera Zvonarëva e la Kateryna Bondarenko prima ad cédar a la Samantha Stosur 2-6 6-2 3-6) ma pò la mét in fila sōl di prim e di secónd tùran. La ruména la pèrd a Dubai cun la Marija Kirilenko, a Stucàrda cun la Francesca Schiavone, a Madrid cun la Lourdes Domínguez Lino, a Róma cun la Christina McHale, a 'S-Hertogenbosch cun la Roberta Vinci, a Wimbledon cun la Stéphanie Foretz Gacon, a gl'US Open cun l'Ayumi Morita, a Taškent cun la Karin Knapp, a Tokyo cun la Julia Görges e a Linz cun l'Ana Ivanović. Crudàda śò in clasìfica a 'l stantéśum pòst, la Monica la tórna a vìnsar soquànti partìdi ad fila in Lussembûrgh, in dua la pèrd in finàl cun la Venus Williams par 2-6 3-6, e in d'l ITF ad Poitiers, rivànd chè in di quàrt (7-5 4-6 2-6 da l'Elena Vesnina). La fà anc in tèmp a mét'r-as in bisàca al tìtul ITF ad Nantes dand la paga ion finàl a la Julija Putinceva par 6-2 6-3.
La ruména la taca la stagiòṅ 2013 in Cina a Shenzhen rivànd in semifinàl cun la Klára Zakopalová. A Hobart la pèrd in di quàrt da la Kirsten Flipkens par 6-2 4-6 0-6 e pò l'è dasfurtunàda a gl'Australian Open parchè la pésca subìt la nùmar òṅ dal mónd, la Viktoryja Azaranka, ch'la la bat par 6-1 6-4. A Doha la bat la Jelena Janković 6-4 6-1 ma minga la Samantha Stosur in dal tùran dòp. In Favràr la vins in Braśìl al sò prim tìtul WTA baténd in finàl l'Ol'ga Alekseevna Pučkova par 6-2 4-6 6-4. In Avrìl a Monterrey la céd in semifinàl a l'Anastasija Pavljučenkova e pò la riva in di utàṿ a Esturìl in dua la s férma cun l'Elena Vesnina par 4-6 4-6. Da lè in avànti la pèrd sèt di òt incóntar śugâ. La s tira sù a Washington in dua la bat la Madison Keys in di utàṿ par 6-1 2-6 7-6 prima ad bandunàr in di quàrt cun l'Ekaterina Makarova dòp un śōg sōl. A Linz e in Lussembûrgh la cata a 'l prim e a 'l secónd tùran l'Angelique Kerber e la Caroline Wozniacki ch'i ér'n in lòta par catàr sù i punt p'r andàr a 'l master e la ruména la gh'à da lasàr-ag strada cun la tedésca e la danéśa che pò i vins'raṅ i tìtui.
In dal 2014 la Niculescu la pòrta la Na Li a 'l tèrs sét in di quàrt ad Shenzhen ma pò la pèrd cun la cinéśa. A Hobart la bat la Magdaléna Rybáriková e pò anc la Mona Barthel prima ad cédar a l'Estrella Cabeza Candela in di quàrt par 6-3 6-7 4-6. A Melbourne la ruména la bat la Shahar Peer par 6-4 6-1 e pò la finalìsta ad Wimbledon d'l an prima, la Sabine Lisicki, par 2-6 6-2 6-2.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
