From Wikipedia, the free encyclopedia
Miranduléś|
C'l artìcul chè 'l è scrit in
Miranduléś |
.jpg)
La Chanelle Scheepers (Harrismith, 13 ad Mars dal 1984, a s lèś [ʃəˈnɛl ˈskɛpərz] in Ingléś) l'è na tenìsta sudarficàna prufesiunìsta da 'l 2000. L'è élta 174 cm e la péśa 62 chilo. La dróa al bras dèstar e la tira 'l arvèrs a dū maṅ.
A gh piàś dimóndi lèśar, far dal còmpri e guardàr di film. Al 10 'd Utóbar dal 2011 l'è rivàda a èsar la nùmar trénta-sèt dal mónd.
In dla sò caréra l'à vins dódas tìtui ITF e òṅ ad qvéi WTA.
Dòp dū turnèo ITF śugâ in dal Śugn dal 2000, la sudafricàna la in pòrta a cà tri in dal 2001. 'L an dòp la tōś part a 'l sò prim turnèo WTA a Gold Coast pasànd al qualificasiòṅ. A 'l prim tùran la fà fóra la śugadōra ad cà, la Samantha Stosur, par 6-4 7-6 par pò cédar a l'itagliàna Tathiana Garbin in dū sét.
Dòp un 2004 pasâ in dal sōl sircùit ITF, in dal 2005 la próa a pasàr al qualificasiòṅ in nóṿ turnèo WTA (cun in mèś i quàtar dal Gran Slam) ma la n gh la cava briśa e alóra in dal 2006 la tórna a impgnàr-as in di ITF e basta. In dal 2007 la riva in semifinàl a Indian Harbour Beach, turnèo ITF ad sinquànta-mila dòlar, ma la vèṅ spasàda via par 1-6 0-6 da la Bethanie Mattek-Sands. In Śugn la śōga dū finàli ITF in di Stat Unî vinsénd-an òṅ. In Dicémbar la in pòrta a cà 'n àtar a Lagos (al nùmar dū) cóntar la Zuzana Kučová.
In dal 2008 la tórna a śugàr 'n incóntar WTA in sla tèra vérda ad Charleston ma la Viktoryja Azaranka la la sćiànca a 'l prim tùran par 6-1 6-0. A Stucàrda la n pasa minga al qualificasiòṅ parchè dòp avér batû la Maria Elena Camerin la céd a la Sara Errani par 6-4 1-6 4-6.
In dal 2009, baténd la Stefanie Vögele 3-6 6-3 6-4, la pōl śugàr gl'Australian Open ma al sò prim tùran cun la Dominika Cibulková 'l è 'n arbgàt parchè la gh pèrd par 0-6 0-6. A Memphis la tórna a vìnsar na partìda cun la Lucie Hradecká ma pò la gh'à la pèś cun la francéśa Pauline Parmentier in di utàṿ. In Maǵ la pasa 'l qualificasiòṅ a 'l Roland Garros par pò però far al valìś subìt cun l'Elena Dement'eva par 4-6 3-6. A Birmingham la pasa 'l prim tùran cun la Jaroslava Švedova ma pò la céd a la Magdaléna Rybáriková.
La Scheepers la riva par la prima vòlta in di quàrt 'd un WTA in dal Favràr dal 2010 a Kuala Lumpur quànd la pèrd par 3-6 5-7 da la giapunéśa Ayumi Morita. Dòp avér mancâ al qualificasiòṅ a Róma, la sudafricàna la i pasa invéci a 'l Roland Garros par pò rivàr anc in di utàṿ (1-6 3-6 da l'Elena Dement'eva). Cun i tarśènt-quarànta punt mis in bisàca, la Chanelle la gh la cava par la prima vòlta a dvintàr una dal primi sènt śugadōri dal mónd. In Istâ la mùcia sù tri prim tùran, a Wimbledon cun la Na Li e a Stanford e a San Diego cun l'Agnieszka Radwańska.
La taca la stagiòṅ 2011 a n pasànd minga al qualificasiòṅ a Brisbane e a Sydney andànd sóta cun la Sorana Cîrstea e cun la Barbora Záhlavová-Strýcová. A Melbourne invéci la riva a 'l tèrs tùran pardénd pò cun la Viktoryja Azaranka par 3-6 3-6. In Dubai la bat a 'l prim tùran la Marija Kirilenko 6-2 6-2 prima ad cédar a la Jelena Janković par 2-6 3-6, cun la sèrba ch'la la bat anc in di utàṿ ad Charleston. In Agóst la Scheepers la và fóra a 'l secónd tùran cun la Petra Kvitová par 6-7 3-6 e pò la fà 'n tùran da piò a gl'US Open (7-5 6-7 3-6 cun la Francesca Schiavone dòp avér dâ la paga a la Mona Barthel). Al 24 ad Setémbar dal 2011 la vins al sò prim tìtul WTA a Cantón (Cina) cóntar la Magdaléna Rybáriková par 6-2 6-2. La finìs 'l an pardénd in di quàrt a Uśàka cun la Samantha Stosur par 2-6 3-6.
In dal 2012 la fà sudàr la Na Li in di utàṿ a Sydney lasànd-ag strada sōl a 'l tèrs sét. A Indian Wells e a Miami la riva a 'l tèrs tùran cun la Marion Bartoli e cun la Samantha Stosur. A Madrid la pèrd subìt da la Sara Errani 6-4 2-6 3-6, méj a Róma in dua la cata incóra la Na Li in di utàṿ, cun la cinéśa ch'la và avànti sèg 7-6 6-2. In Luj e Agóst la pèrd in di quàrt a Stanford da la Serena Williams e a Dallas da la Roberta Vinci. La gh riva incóra anc a Cantón (1-6 5-7 da l'Urszula Radwańska) e a Uśàka (6-2 1-6 3-6 da la Misaki Doi).
'L inìsi dal sò 2013 'l è da daśmindgàr ma a Marrakesch l'è bòna ad rivàr facilmènt in semifinàl baténd la Sorana Cîrstea 6-3 6-1, la María Teresa Torró Flor 6-2 6-1 e la Kristina Mladenovic 6-1 6-2 prima ad lasàr strada a la milanéśa Francesca Schiavone, pò vinsidōra dal turnèo maruchèṅ, par 6-7 1-6. In Maǵ, pasànd p'r al qualificasiòṅ, la fà fóra la Jelena Janković a Madrid ma pò la céd a cl'atra sèrba, l'Ana Ivanović, par 2-6 2-6. Dòp un prim tùr'n a Wimbledon (2-6 1-6 da la Roberta Vinci), la Chanelle la riva in semifinàl a Bùdapest in dua la pèrd da l'Yvonne Meusburger par 2-6 2-6. In Luj la mùcia sù dū secónd tùran, pardénd cun l'Elina Svitolina a Bad Gastein e cun la Shahar Peer a Baku.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
