Sergio Endrigo

 Miranduléś

C'l artìcul chè 'l è scrit in Miranduléś

«

Mille lire, mille lire avventuriere, mille lire colorate rosso e paglia, mille lire grandi come una tovaglia, un lenzuolo da piegare in otto, una coperta per stare caldi sopra e sotto, mille lire, mille lire un terno al lotto. E volare felice in aeroplano con la tua squadra andare su a Milano, in tribuna come un pascià e la Triestina militava in serie A, mille lire almeno mille lire al mese era un sogno, il sogno piccolo borghese ma per chi ha sempre avuto il culo sul velluto era uno scherzo bruciarle in un minuto.»

(IT)(Mille Lire, 1980)

«

Mila franc, mila franc a l'aventùra, mila franc culurâ 'd rós e 'd paja, mila franc grand cuma na tṿaja, un linsōl da pigàr in òt, na quèrta par star cald 'd sōvar e 'd sóta, mila franc, mila franc un tèr'n a 'l lòt. E vulàr cuntènt in aparéć cun la tò squàdra sù a Milàṅ, in tribùna cuma 'n pascià e la Triestina la śugàva in Sèrie A, mila franc almànc mila franc a 'l méś 'l éra 'n sógn, al sógn pìcul burghéś ma par chi al gh'à sèmp'r abû 'l cûl in sal vlû 'l éra 'n schèrs bruśàr-i in un minùt.»

(MUD)

Sergio Endrigo tòlt śò in dal 1965

Sergio Endrigo (Pòla, 15 ad Śugn dal 1933 - Róma, 7 ad Setémbar dal 2005), 'l è stâ 'n cantaudōr itagliàṅ ch'l à vins al Fèstival ad Sanremo in dal 1968 cun la canta Canzone per te e 'l è rivâ secónd in dal 1969 cun Lontano dagli occhi e tèrs in dal 1970 cun L'arca di Noè, cantàda insém a l'Iva Zanicchi. Da pìcul 'l à patî la casàda via dla sità in du 'l éra nâ, Pòla, pasàda in dal 1947 a la Jugoślàvia dòp la secónda guèra mundiàla, vivénd da pròfug in un camp a Brìndaś insém a sò màdar (sò pàdar 'l éra mòrt quànd al gh'iva siē an).

In dal córs dla sò caréra 'l à laurâ insém a di puéta cuma Pier Paolo Pasolini, Vinicius de Moraes e Giuseppe Ungaretti e cun di muśicìsta cuma Toquinho e Luis Bacalov ma pò cun chi lò al s è quistiunâ in giudìsi p'r un braṅ druâ da 'l Argintèṅ p'r al film Al Pustèṅ ch'al parìva dal tut cumpàgn a la canta 'd Endrigo Nelle mie notti dal 1974.

Sergio al mōr a stanta-dū an, sórd p'r un ìctus patî in dal 2003, p'r un tumōr a i palmòṅ, lasànd la fiōla Claudia, sénsa funeràł e sénsa fiōr ma catànd sù di bèsi p'r al bèsti bandunàdi.

Fra i sò braṅ più famóś a 'rcurdém Io che amo solo te (Mè ch'a vój bèṅ sōl a tè) dal 1962 (al sò prim sucès), Canzone per te (Canta par tè), Marianne, Lontano dagli occhi (Luntàṅ da i òć), L'arca di Noè (prèmi dla crìtica ad Sanremo p'r al tèst), Elisa Elisa, la cansòṅ p'r i putèṅ Ci vuole un fiore (A gh vōl un fiōr) e Mille Lire (Mila franc), druàda cuma siggla dal prugràma ad Raidue Di tasca nostra (Ad bisàca nòstra).

Àlbum

• Sergio Endrigo 1962^[1]
• Endrigo 1964
• Endrigo 1966
• Endrigo 1968
• La vita, amico, è l'arte dell'incontro 1969
• L'arca di Noè 1970
• Nuove canzoni d'amore 1971
• L'arca 1972
• Elisa Elisa e altre canzoni d'amore 1973
• La voce dell'uomo 1974
• Ci vuole un fiore 1974
• Endrigo dieci anni dopo 1975
• Le canzoni di Sergio Endrigo 1976, racòlta
• Canzoni venete 1976
• Sarebbe bello... 1977
• Donna mal d'Africa 1978
• ...E noi amiamoci 1981
• Mari del sud 1982
• E allora balliamo 1986
• Il giardino di Giovanni 1988
• Qualcosa di meglio 1993
• Altre emozioni 2003
• Cjantant Endrigo 2004

Culegamènt estéran

• (IT) Al sit ufisiàł

Referènsi

1. (IT) 'L elèinc di sò disc ins al sit sergioendrigo.it