From Wikipedia, the free encyclopedia
C'l artìcul chè 'l è scrit in
Miranduléś |
La Romina Sarina Oprandi (Jegenstorf, 29 ad Mars dal 1986), cgnusùda méj cuma Romina Oprandi, l'è na tenìsta śvisra, prufesiunìsta da 'l Favràr dal 2005. L'è rivàda a èsar la nùmar trénta-dū dal mónd al 10 ad Śugn dal 2013. L'è bòna ad dascórar in Tedésc, Ingléś, Francéś, Spagnōl e Itagliàn.
L'è élta 172 cm e la péśa 65 chilo. La dróa al bras dèstar e la tira 'l arvèrs cun dū maṅ. Al cōlp ch'a gh piàś da piò l'è la bucìna curta.
In dla sò caréra l'à vins vint-a-dū tìtui ITF in singulàr e ùnd'ś in dópi. Al 27 'd Avrìl dal 2014 l'à śugâ 'l sò primi finàli WTA a Marrakech, vinsénd qvéla 'd dópi ma pardénd in singulàr cun la spagnōla María Teresa Torró Flor par 3-6 6-3 3-6.
La śvisra la taca al 2005 śugànd al turnèo ITF a Majòrca, al nùmar dū, e la 'l vins baténd in semifinàł la Petra Cetkovská e in finàł l'Anna Floris. In Mars la in pòrta a cà àtar tri òṅ adrē a c'l àtar, tut da déś-mila. In Maǵ la s mét in bisàca al tìtul ad Caśàl pò in Luj la s qualìfica p'r al turnèo WTA ad Palèrum ma la pèrd subìt da la Catalina Castaño. In Nuvémbar la vins àtar dū ITF mesicàṅ e la sèra 'l an a la puśisiòṅ 240 dal mónd.
In dal 2006 la vins 'l ITF ad Putignàṅ cóntar l'Alberta Brianti, pò àtar dū in Avrìl e Maǵ in Spaggna e in Turchìa cóntar l'Ekaterina Makarova e la Petra Cetkovská. La stmana dòp la sa spòsta a Róma par śugàr 'l qualificasiòṅ e la i pasa e pò la mòla lè un 6-2 6-2 a la Samantha Stosur e un 6-0 6-1 a la Vera Zvonarëva. La s férma in di quàrt par maṅ dla Svetlana Kuznecova ch'la vins a fadìga par 6-4 5-7 7-6. In Śugn la riva in finàł in 'n ITF da stantasìnc-mila dòlar céc ma la n la pōl minga śugàr lasànd acsè 'l tìtul a l'Anna Smashnova pò la s qualìfica p'r al turnèo ad Wimbledon ma la và fóra a 'l prim tùr'n incóra ad òpra dla Svetlana Kuznecova. In Luj la riva in di quàrt a Bùdapest (3-6 0-6 da la Lourdes Domínguez Lino) mént'r in Agóst la pèrd a 'l prim tùran a gl'US Open cun la Francesca Schiavone par 1-6 2-6. La stmana dòp la vins 'l ITF ad Denain cun la padròna 'd cà, la Stéphanie Foretz Gacon. La śvisra la gh la cava a rivàr a la puśisiòṅ quarànta-siē dal mónd.
In dal 2007 la n gh la cava mai a pasàr al secónd tùran e la và śò in clasìfica anc parchè durànt al sò incóntar cun la Karin Knapp a Bùdapest la sa sćiànca 'l bras dèstar e la pèrd acsè dagnóra tuta la stagiòṅ. D'arcurdàr però la bèla paga ch'l'à dâ a la Viktoryja Azaranka a Amelia Island, 6-1 6-1 al puntéǵ. La tórna a śugàr sōl in d'l Agóst dal 2008. In Germâgna, a Wahlstedt, la vins 'n ITF da déś-mila dòlar cóntar la Giulia Gatto-Monticone, pò in Setémbar la riva in finàł a Mèstar ma la pèrd par 3-6 0-3 bandòṅ cun la rusa Ekaterina Lopes. Anc in dal 2009 la fà dimóndi fadìga, praticamènt la tōś part sōl a di turnèo ITF piculèṅ, in tut al manéri la pasa da la puśisiòṅ 331 dal 2008 a la puśisiòṅ 220.
La Romina la taca bèṅ la stagiòṅ 2010 vinsénd 'l ITF francéś ad Belfort da vinsìnc-mila dòlar cun l'Elena Bovina e rivànd in finàł in qvél da sinquànta-mila dòlar ad Biberach an der Riß vins da la Johanna Larsson. In Mars a Buchèṅ chi lē la và ch'l'è na maravìja, la vins al tìtul lasànd al briśi a tut chi atri. In Maǵ la ciàpa na carta salvàdga par śugàr a Róma ma la và fóra subìt cun la Marija Kirilenko, la gh và méj la stmana dòp in d'l ITF ad Caśèrta che lē la vins baténd la Sloane Stephens par 6-3 6-3. In Śugn la pèrd in finàł 'n ITF a Róma cun la Lourdes Domínguez Lino ma pò la s qualìfica p'r al turnèo ad Wimbledon in dua la bat l'Heather Watson a 'l prim tùran prima ad lasàr strada a l'Alexandra Dulgheru. A la fiṅ dal méś la tórna in Itàglia par śugàr cun na carta salvàdga in bisàca 'l impurtànt ITF ad Cùneo e lè lē la fà magnàr la pólvra a tuti baténd la Corinna Dentoni 6-1 6-1, l'Yvonne Meusburger 6-3 6-3, l'Evgenija Rodina 6-0 6-2, la Lourdes Domínguez Lino 6-0 6-1 e la Pauline Parmentier 6-0 6-2. In Luj la riva in semifinàł in dal turnèo internasiunàł ad Palèrum (3-6 2-6 da la Kaia Kanepi), pò in Setémbar la vins anc a Saint-Malo dand un 6-2 2-6 6-2 a l'Alizé Cornet. La Oprandi la s pòrta acsè a la puśisiòṅ ssanta-siē dal mónd.
La śvisra la partìs dimóndi mâł in dal 2011 quànd la n in bròca una. La pèrd da la Carla Suárez Navarro a Auckland, da la Roberta Vinci a Hobart, da la Marija Kirilenko a gl'Australian Open, da la Galina Voskoboeva a Pattaya City, da la Renata Voráčová a Acapûlc, da la Barbora Záhlavová-Strýcová a Monterrey e da la Sania Mirza a Indian Wells. Śuntànd-'g al quàtar partìdi pardùdi a la fiṅ dal 2010 a sém a quóta ùndas. In Maǵ la pèrd in semifinàł par 6-1 5-7 6-7 da la Paula Ormaechea in d'l ITF ad Praga. In Śugn la fà dimóndi bèṅ in sl'èrba ad 'S-Hertogenbosch in dua la bat la nùmar dū dal mónd, la Kim Clijsters, e la riva in semifinàł cun la Jelena Dokić ma pò a Wimbledon la gh la cava a pèrdar subìt par 0-6 1-6 da cla bucinàra dla Lourdes Domínguez Lino. A gl'US Open la riva a 'l secónd tùran pardénd da la Flavia Pennetta par 0-6 3-6. In Setémbar e Utóbar la śōga sinc finàli ITF vinsénd-an tri.
In dal 2012 la fà 'l tèrs tùr'n a gl'Australian Open baténd la Nastas'sja Jakimava 6-4 6-1 e la Francesca Schiavone par 6-4 6-3 prima 'd cédar in tri set a la Julia Görges. In Luj la vins 'l ITF ad sènt-mila dòlar ad Biarritz cóntar la Mandy Minella, pò la fà àtar tant in dal Bronx cun l'Anna Čakvetadze. A gl'US Open la vins cun l'Andrea Petković par 6-2 7-5 ma pò la céd a la Marion Bartoli par 2-6 6-1 5-7. In Aṿtòṅ a Pechîṅ la riva in di quàrt par via di sucès cun l'Urszula Radwańska, cun la Camila Giorgi e cun l'Ana Ivanović farmànd-as pò cun la Viktoryja Azaranka ch'la gh lasa sōl dū śōg.
A 'l inìsi dal 2013 la mùcia sù soquànt secónd tùr'n a Auckland (3-6 0-6 da la Yanina Wickmayer), a gl'Australian Open (3-6 2-6 da la Julia Görges) a Doha (2-6 3-6 da la Viktoryja Azaranka) e a Acapûlc (4-6 6-7 da la Karin Knapp). A Miami la bat l'Arantxa Rus par 6-4 3-6 6-3 e la Lucie Šafářová par 7-6 4-6 7-6 ma pò la và a cà a 'l tèrs tùran cun la Dominika Cibulková. A Esturìl la gh la cava a rivàr in semifinàł dòp avér batû la Kiki Bertens, la Shuai Peng e la Svetlana Kuznecova. Anc cun l'Anastasija Pavljučenkova la s éra misa bèṅ par lē, esénd ch'l'iva purtâ a cà 'l prim set par 6-0, ma pò la śvisra la s inciòlda e la pèrd par 6-0 3-6 1-6. Anc a Cagnes-sur-Mer, ITF francéś da sènt-mila dòlar, la riva in semifinàł ma chè la pèrd da la Maryna Zanevs'ka. La stmana dòp la sa spòsta a Bruxelles par śugàr un Premier su tèra batùda. Incóra na vòlta la s férma in semifinàł cun la Shuai Peng ch'la la bat par 6-4 2-6 6-4. Purtròp par lē la s fà mâł dimóndi a la schina e l'è custréta a star férma p'r òt méś.
La Oprandi la tórna a pistàr i camp dal sircùit prufesiunìstic in Favràr, pò la śōga a Miami druànd al ranking prutèt e la bat la Bojana Jovanovski prima 'd céd'r a l'Agnieszka Radwańska. In Avrìl la riva in di quàrt a Bugutà pardénd par 1-6 5-7 da la Caroline Garcia. Dòp tant an ad caréra finalmènt la riva in finàł in un turnèo WTA a Marrakech e la la pèrd cun la María Teresa Torró Flor par 3-6 6-3 3-6 ma almànc la s pōl cuntintàr dal tìtul ad dópi vins insém a la Garbiñe Muguruza Blanco. Purtròp al ròbi i cuntìnuan incóra a giràr mâł par la śvisra parchè la và fóra a 'l prim tùr'n in di siē turnèo a vgnir ma anc al rèst dla stagiòṅ 'l è lòfi par lē e la Oprandi la cróda acsè a la fiṅ d'l an a 'l 118śum pòst.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.