Llanbedrog

Pentref, cymuned a phlwyf eglwysig yn ne-orllewin Llŷn, Gwynedd yw Llanbedrog ( ynganiad ). Mae'n gorwedd ar lan Bae Ceredigion tua hanner ffordd rhwng Pwllheli i'r dwyrain ac Abersoch i'r de. Rhed y ffordd A499 trwy'r pentref.

Llanbedrog

Math	cymuned, pentref
Poblogaeth	841
Daearyddiaeth
Sir	Gwynedd
Gwlad	Cymru
Cyfesurynnau	52.8577°N 4.4848°W
Cod SYG	W04000068
Cod OS	SH328318
Gwleidyddiaeth
AS/au Cymru	Mabon ap Gwynfor (Plaid Cymru)
AS/au y DU	Liz Saville Roberts (Plaid Cymru)
Ffeiliau perthnasol ar Comin

Am yr eglwys a phlwyf o'r un enw ger Penfro, gweler Llanbedrog, Sir Benfro.

Cynrychiolir yr ardal hon yn Senedd Cymru gan Mabon ap Gwynfor (Plaid Cymru)^[1] ac yn Senedd y DU gan Liz Saville Roberts (Plaid Cymru).^[2]

Mae penrhyn Mynydd Tir y Cwmwd (343 troedfedd) yn ei gysgodi i'r de. O'r copa ceir golygfeydd braf dros Fae Ceredigion ac Ynysoedd Tudwal ac i fryniau Eryri yn y gogledd-ddwyrain. Mae cerflun 'Y Dyn Haearn' i'w ganfod ar Fynydd Tir y Cwmwd.

Mae traeth Llanbedrog yn ddeniadol ac yn boblogaidd gan ymwelwyr. I'r gogledd ceir craig isel Carreg y Defaid.

Mae Llwybr Arfordir Cymru yn cysylltu Llanbedrog a Phwllheli.

Mae eglwys y plwyf yn bur hynafol. Fe'i cysegrir i Sant Pedrog. Eglwys un siambr hir ydyw, sy'n dyddio yn rhannol i'r 13g. Ychwanegwyd clochdy yn y 19g pan gafodd ei hatgyweirio'n sylweddol a'i thrawsnewid gan golli llawer o'i chymeriad hynafol. Mae'r bedyddfaen yn dyddio i'r 15g.

Mae Plas Glyn-y-Weddw, plasty Fictoraidd rhestredig Gradd II a chanolfan ddiwylliannol, wedi'i leoli yn y pentref.^[3]

Traeth Llanbedrog o Fynydd Tir y Cwmwd.

Plas Glyn-y-Weddw

Cyfrifiad 2011

Yng nghyfrifiad 2011 roedd y sefyllfa fel a ganlyn:^[4][5][6]

Cyfrifiad 2011
Poblogaeth cymuned Llanbedrog (pob oed) (1,002)			100%
Y nifer dros 3 oed sy'n siarad Cymraeg (Llanbedrog) (526)			54%
:Y ganran drwy Gymru			19%
Y nifer sydd wedi'u geni yng Nghymru (Llanbedrog) (488)			48.7%
:Y ganran drwy Gymru			73%
Y nifer dros 16 sydd mewn gwaith (Llanbedrog) (273)			53.8%
:Y ganran drwy Gymru			67.1%

Enwogion

• Huw Llŷn (bl. 1532-1594), bardd; brawd Wiliam Llŷn
• John Owen Williams (Pedrog) (1853-1932), bardd. Cafodd ei fagu'n blentyn amddifad yn Llanbedrog gan ei fodryb.