![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/1/12/Sanas.jpg/640px-Sanas.jpg&w=640&q=50)
Gaelicu scuzzese
lingua / From Wikipedia, the free encyclopedia
U gaelicu scuzzese (o Gaelicu scuzzesu), ancu chjamatu simpliciamente scuzzese o anticamente erse (Gàidhlig in a lingua stessa, da paragunà incù u nome Gaeilge di l'irlandese) hè una lingua appartinendu à u ramu gaelicu di e lingue celtiche, chì sò cullegate à a famiglia di e lingue indoeuropee.[1] Hè per u più parlatu in Scozia in i Highlands è l'Ebride. Hè dinù praticatu da une poche di cumunità di Nova Scozia à u Canada, soprattuttu in l'Isula di u Capu Brittone, per via di l'emigrazione di campagnoli scuzzesi cacciati fora per forza da i grandi pruprietarii terrani à u seculu XIX. 'Ssa forma di a lingua hè diventata u gaelicu canadianu.
![Thumb image](http://upload.wikimedia.org/wikipedia/commons/thumb/1/12/Sanas.jpg/320px-Sanas.jpg)
U gaelicu scuzzese hè ricunnusciutu da u Regnu Unitu cum'è lingua regiunale di a Scozia, sient'è a Cartula europea di e lingue regiunale o minuritarie. Dapoi una leghje di u parlamentu scuzzese vutata u 21 d'aprile di u 2005, hè lingua officiale di a Scozia (incù l'inglese). Hè usatu in a signaletica stradale bislingua.
Cum'è lingua tradiziunale di i Gaels, o Scots (i Celti venuti da l' Irlanda chì pupulonu u nordupunente di l'isule Britanniche versu u seculu V), u gaelicu occupa una piazza impurtante in a cultura tradiziunale scuzzese : custituisce a lingua storica di a forza parte di a Scozia attuale.
Però, ùn ci vole micca à cunfonde u gaelicu scuzzese incù u scots, lingua germanica, furmata à parte si da u vechju inglese parlatu in Nortumbria. U scots hè dinù ricunnusciutu cum'è lingua regiunale di a Scozia.
U gaelicu scuzzese hè sturicamente ligatu à l'irlandese, da induve u so nome anzianu di erse, forma scots di a parola inglese Irish. Difatti, i dui idiomi sò oghje menu differenti chì u francese da u talianu. Puru e duie lingue anu cuminciatu à diverge da u seculu V. U gaelicu scuzzese hà cunnisciutu mentre u periodu di e Grande invasione scambii culturali è linguistichi intensi incù l'altri populi di u nordu di l'isula di Brittania. S'è a prussimità ferma evidente, l'intellighjibilità mutua di e duie lingue ùn hè micca evidente.
U Gaelicu scuzzese hè differente in tuttu da l'inglese è un locutore anglofunu ùn capiscerà micca una cunversazione in 'ssa lingua.