![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/c/c7/Viaghju_In_Ascu.jpg/640px-Viaghju_In_Ascu.jpg&w=640&q=50)
Viaghju in Ascu
From Wikipedia, the free encyclopedia
U Viaghju in Ascu (u sottutitulu n'hè "A cuccagna di Bazzicone") hè statu scrittu da Antone Leonardu Massiani (1816-1888) di Nuvella, di u quale hè stata l'opara principale. Hè una puesia comica, cumposta da 114 terzine. U Viaghju in Ascu hè più cunnisciutu per via di u so sottutitulu: A Cuccagna di Bazzicone. U Viaghju in Ascu hè statu publicatu per a prima volta in "Il Pescator di Chiaravalle", un ghjurnale bastiacciu, in circa 1886. Hè statu stampatu dopu in a rivista "U Fucone", in u 1926. Infine, u Viaghju in Ascu fù publicatu in a rivista A Muvra, in u 1936.[1] U pueta di Nuvella ci conta in u Viaghju in Ascu u so viaghju in u paese d'Ascu, accumpagnatu di u so sumere Bazzicone. L'usi di l'abitanti d'Ascu di l'epica sò discritti di manera ridicula, ma senza gattivezza. U puema hà avutu moltu successu in Niolu, in Balagna è in u Ghjunsani.
![Thumb image](http://upload.wikimedia.org/wikipedia/commons/thumb/c/c7/Viaghju_In_Ascu.jpg/640px-Viaghju_In_Ascu.jpg)
Eccu cum'ellu u discrive e "Terzine di u duttore Anton Leonardu Massiani di Nuvella", l'Almanaccu di A Muvra, in a so edizione di 1936:
« Autore di ste belle terzine, capu d'opara di u nostru dialettu, fù un medicu di grande fama in tuttu u Canale ed in Balagna, pruvidenza di i povari è puntellu di u so riccu casale di Nuvella.
Morse in stu paese cinquanta cinqu'anni fà, dopu avè publicata varie lodi religiose chì si cantanu anc'avale in chjesa, essendu state appruvate da l'autorità ecclesiastica. Ma u so nome rimbumbarà in Corsica è altrò per un longu avenire grazie à u so immurtale Bazzicone, duv' elli sò ben' descritti l'usi aschesi di cucinà, di dorme è di marità si. L'almanaccu U Pescatore di Chiaravalle hà publicatu, mezu seculu fà, ste terzine, ma belli pochi devenu esse, in e suffite pulvarose, l'esemplari di sti preziosi libriccioli, postu chì n'emu vistu una rivista corsa, L'Altagna, stampà un testu di Bazzicone tanta scrucifissu chì facia pietà. Speremu dunque sta nova edizione ben accolta da i numerosi Corsi, amici di a so parlata, sparsi in u mondu intieru. » |