کۆپا ئەمریکا
From Wikipedia, the free encyclopedia
کۆپا ئەمریکا کە تا ساڵی ١٩٧٥ بە پاڵەوانێتی تۆپی پێی ئەمریکای باشوور ناسرا بوو،[1] پاڵەوانێتییەکی تۆپی پێیە لە نێوان ھەڵبژاردەکانی ئەمریکای باشووردا کێبڕکێی لەسەر دەکرێت. کۆنترین پاڵەوانێتییە کە تا ئێستا بەڕێوەدەچێت، ھەروەھا سێیەم پێشبڕکێیە کە زۆرترین بینەری ھەیە لە جیھاندا.[2] پێشبڕکێکە پاڵەوانەکانی ئەمریکای باشوور دیاری دەکات.[2][3][4] ھەروەھا لە ساڵانی نەوەدەکانەوە ھەڵبژاردەکانی ئەمریکای باکوور و ئاسیا بانگھێشت کراون بۆ بەشداریکردن لە پێشبڕکێکان.
کۆپا ئەمریکا | |
---|---|
دامەزران | ١ی کانوونی دووەمی ١٩١٧ |
وەرزش | تۆپی پێ |
کیشوەر | ئەمەریکاکان |
ڕێکخەر | CONMEBOL |
وێبگە | http://www.copaamerica.com/ |
مانگ | حوزەیران |
لە ساڵی ١٩٩٣ەوە، پاڵەوانێتییەکە بەگشتی١٢ ھەڵبژاردە بەشداری دەکەن- ھەر ١٠ ھەڵبژاردەی کۆنمێبۆڵ و دوو ھەڵبژاردەی نیشتمانی لە یەکێک لە کیشوەرەکانی دیکە بانگھێشت دەکرێن. وڵاتانی دیکە کە لە دەرەوەی ئەمریکای باشوورەوە بانگھێشت کراون بریتین لە: کۆستاریکا (١٩٩٧، ٢٠٠١، ٢٠٠٤ و ٢٠١١)، ھندۆراس (٢٠٠١)، ژاپۆن (١٩٩٩ و ٢٠١٩)، ئەمریکا (١٩٩٣، ١٩٩٥، ٢٠٠٧)، و قەتەر (٢٠١٩).[5] پێشبڕکێکە نزیکەی مانگێک دەخایەنێت.
لە کۆی دە ھەڵبژاردەی کیشوەری ئەمریکای باشوور ھەشت ھەڵبژاردە لە دوای دەستپێکردنی پاڵەوانێتییەکە لە ساڵی ١٩١٦ەوە لانیکەم جارێک نازناوەکەیان بەدەستھێناوە، تا ئێستا تەنھا ئێکوادۆر و ڤێنیزوێلا نازناوەکەیان بەدەستنەھێناوە. ئەرژەنتین و ئوروگوای زۆرترینجار نازناوەیان بەدەستھێناوە لە مێژووی پاڵەوانێتییەکەدا، ھەریەکەیان ١٥جار بوونەتە پاڵەوان. ئەرژەنتین لە ساڵی ١٩١٦، تا ئێستا ٩ جار میوانداری پاڵەوانێتییەکەی کردووە. ئەمریکا تاکە وڵاتی دەرەوەی کیشوەرەکە کە میوانداری ئەم چالاکییە دەکات، لە ساڵی ٢٠١٦دا بۆ یەکەمجار میوانداری کرد و لە ساڵی ٢٠٢٤دا بۆ جاری دووەم میوانداری ئەم چالاکییەدەکاتەوە.