中國福建省其省會 From Wikipedia, the free encyclopedia
福州（
Hók-ciŭ 幫助·信息）市，復號榕城、三山、左海、閩都，簡稱榕，是中國福建省其省會，敆福建省東部其閩江下游共沿海地區，現在有6萆區、1萆縣級市、6萆縣，全市常住總人口有720萬，其中市區常住人口296.3萬。當地居民以漢族其福州族群為主，母語是閩東語福州話。福州敆公元前202年建城，遘今旦有2200幾年，是中國其歷史文化名城，歷史懸頂長期作為福建其政治中心，是中國東南沿海重要其貿易港口共海上絲綢之路其門戶，同時復是重要其文化中心，趁宋朝開始，文化教育就野發達，是產生進士狀元、兩院院士第一価其城市臺中其蜀萆。敆近現代史上，福州是中國第一早開放通商其五萆城市之一，固是中國近代海軍其搖籃，也是中國工業、科技發源地之一。嚽塊其習俗、文化、傳統藝術、建築形式都自成風格，有野強烈其地區特徵。福州故是300幾萬海外華人其祖籍地，是福建第一大其僑鄉。
 | |
| 別稱 | 榕城、三山 |
| 面積 | 11,968 km² |
| 人口 | 六百萬 |
| 人均GDP | ¥31,582 |
| 民族 | 漢族、滿族、畲族、回族 |
| 語言 | 閩東語福州話、普通話 |
| 市樹 | 榕樹 |
| 市花 | 茉莉花 |
| 市果 | 福橘 |
「福州」其名字趁唐開元十三年（725年）起就有了，因為州郡西北有福山其原因，故此共原底其閩州都督府改成福州都督府。[1][2]但是茲唐朝其福山其具體位置敆其地方，遘现在固𡅏無定論。清朝乾隆年間刻印其《福州府志》指出長樂其董奉山舊底叫做福山，[3]但是因為董奉山其位置伓是敆福州城其西北，故此有侬見覺講福山是福州西北其蓮花山（復叫做永福山）[4][5]，固有見覺講福山可能是福州西郊其保福山。[6]
歷史上，特別是敆宋朝以前，福州其名字有過野価回變更。福州最早是公元前202年建立其閩越國其都城冶，復叫做東冶。 西漢始元二年（公元前85年），設冶縣。 東漢建安元年（196年），冶縣改名侯官縣。
西晉太康三年（282年），設晉安郡，同時析侯官縣其東部地置原豐縣為郡治。 陳永定元年（557年）設閩州，是福建單獨建州其開始，侯官縣共原豐縣都是州治。陳天嘉六年（565年），撤閩州，光大二年（568年），復設原閩州豐州 ，侯官共原豐固是州治所。
隋開皇九年（589年），因為豐州境內有泉山，改名泉州，敆隋開皇十二年（592年），原豐縣改名閩縣。隋大業二年（606年），泉州改名閩州，大業三年，廢閩州，改名建安郡，郡治敆閩縣。
唐武德元年（618年），共建安郡改名建州，州治敆閩縣。武德六年，建州析部分地置泉州（就是今旦其福州），州治敆閩縣。武德八年（625年），改名豐州，置豐州都督府。 貞觀元年（627年），豐州改名泉州，屬嶺南道。 景雲二年（711年），共泉州（就是今旦其福州）改叫閩州都督府，開元十三年（725年），閩州都督府因為州西北有福山，改名福州都督府，屬江南東道，福州其名字趁嚽塊開始。 天寶元年（742年），改名長樂郡。 乾元元年（758年），復叫做福州都督府。以後，後唐長興四年（933年），閩國國王王延鈞（王鏻）稱帝，共福州升為長樂府。 945年，閩王王延政曾共福州做為東都。
南宋景炎元年（1276年），宋端宗趙昰敆福州做皇帝，故此共福州升為福安府，定做行都。
明洪武元年（1368年），設福州府。 南明隆武元年（清順治二年，1645年），朱聿鍵敆福州做皇帝，定都福州，稱福京，福州府更名天興府。
清順治三年（1646年），天興府復稱福州府。
民國二年（1913年）府制取消。1946年，福州市政府成立。 [2][7]
趁1980年代末開始，使羅馬字母其國家比較普遍使Fuzhou來作「福州」名稱其拼寫，茲蜀種拼法是趁漢語拼音Fúzhōu來其，就是即漢語普通話臺中「福州」其發音。[8]敆茲以前，「福州」其名字敆西方文獻臺中有野価種𣍐蜀様其拼寫方式。13世紀其《馬可波羅遊記》共福州寫作Fugiu，茲種拼寫可能是趁當時其官話來其。[9][10]明末其荷蘭儂趁福州話借音，共「福州」拼成Hocsieu，茲蜀種固有Hockzieuw，Hoksieu，Hochsieu等野価種變體，[11]法文臺中拼做Hoksyeu。[12]同樣使福州話臺中其音，英語臺中以前共「福州」寫做Hokchew[13]、Hockchew[14][15]、Hokchue[10]、Hokchiu[16]、Hokcheu[17]等， 臺中有Hokchew、Hockchew敆東南亞其華人社群臺中今旦固𡅏敆𡅏使。[13][15]16世紀其幾隻西班牙其歷史學家（比如講貢薩列斯·德·門多薩等儂）曾共福州拼成西班牙文其Aucheo或者Ucheo。[16]固有，19世紀末福州平話字共閩南語白話字發明以後，也有使Hok-ciu來寫「福州」其案例。[18]英語文獻臺中使漢語官話其發音來寫譯「福州」其寫法固有Foochow、Fuchow、Fuhchau、Fuhchoo、Fou-chou、Fou-chou-fou等，法文臺中使Fou-Tchéou，德文臺中使Futschau。19世紀末Foochow、Fuchow和Fuhchau其使法都有，但是Foochow已經慢慢變成主流其詞，固加直頭使遘中國推廣漢語拼音拼寫地名其規則以前（敆民國三十八年以前福州郵政局使其郵戳懸頂一般都有FOOCHOW或者FOOCHOWFU其英文地名）。[10]
福州菜是閩菜其代表[19]。
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
