Skandinavia

Ur rann eus Europa eo Skandinavia (pe Lec'hlenn), en hanternoz d’ar c’hevandir. Gellout a ra an termen Skandinavia ober dave da veur a dra, diouzh an dro :

• Al Ledenez skandinavat, da lavaret eo Norvegia ha Sveden.
• Hollad ar stadoù eus kevandir Europa ma komzer yezhoù skandinavek : Norvegia, Sveden ha Danmark.
• Hollad ar stadoù-se ha Finland.
• An holl vroioù ma komzer yezhoù skandinavek, pe e vefent war ar c’hevandir pe ne vefent ket : Norvegia, Sveden, Danmark, an inizi Faero hag Island.

Skandinavia er goañv, skeudenn graet gant an NASA

Pa reer gant ar ger Skandinavia e roer dezhañ alies an trede ster, da lavaret eo an teir stad skandinavek o yezh ha Finland ouzhpenn. Ha pa ne vefe ket kar yezh pennañ Finland d’ar yezhoù skandinavek, nag ur yezh indezeuropek zoken, ez eo ar svedeg unan eus ar yezhoù ofisiel er vro-hont ha liammoù strizh ha kozh a zo etre Finland ha Sveden.

Kavout a reer roud eus an anv Skandinavia, evit ar wech kentañ gant Plinius an Henañ (23-79), dindan ar stumm Scadinauia. Moarvat ez eo savet diwar daou c’her germanek kozh : skadin (dañjer, arvar) hag auio (enez). An anv Skania, pe Skåne (ur rannvro eus kreisteiz Sveden), a c'hellfe kaout ar memes orin.

Gwelet ivez

• Lec'hlenn

Commons

Muioc'h a restroù diwar-benn

Skandinavia

a vo kavet e Wikimedia Commons.