![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/9/98/Wikipedia-sobibor-2.jpg/640px-Wikipedia-sobibor-2.jpg&w=640&q=50)
Sobibor
From Wikipedia, the free encyclopedia
Sobibor a oa ur c'hamp-diouennañ nazi, nepell diouzh kêr Sobibór e Polonia, e distrig Lublin, a oa bet savet e framm an Aktion Reinhard e 1942. SS-Sonderkommando Sobibor e oa e anv ofisiel en alamaneg. Yuzevien eus Polonia, Bro-C'hall, Alamagn, an Izelvroioù, Tchekoslovakia, pe prizonidi brezel eus URSS a oa kaset di gant trenioù, ha mouget kerkent hag erruet e kambroù gaz leuniet gant gazoù ur c'heflusker. Hervez ur vammenn e vefe bet lazhet betek 200 000 a dud e Sobibor[1]. Thomas Blatt a zisklêr : "E-pad prosez lez-varn Hagen a-enep Nazied Sobibor, e istimas ar c'helenner Wolfgang Scheffler, implijet evel arbennigour, e oa bet muntret 250 000 Yuzev d'an nebeutañ"[2].
![Thumb image](http://upload.wikimedia.org/wikipedia/commons/thumb/9/98/Wikipedia-sobibor-2.jpg/640px-Wikipedia-sobibor-2.jpg)
Goude un emsavadeg eus ar brizonidi a veze implijet da lakaat ar c'hamp da vont en-dro d'ar 14 a viz Here 1943 e tec'has war-dro an hanter eus ar 600 prizoniad a oa e Sobibor. Serret ha distrujet e voe ar c'hamp ha plantet e voe gwez-pin da guzhat al lec'h ma oa un nebeud dvezhioù goude. Hiziv e c'haller gwelet ur mirdi hag ul lec'h-eñvor eno.