Lazuardi
From Wikipedia, the free encyclopedia
Lazuardi adalah batuan metamorf nang bawarna biru. Batuan ngini jadi batu parmata nang dihargai mulai zaman bahari gara-gara warna birunya.
Lazuardi hudah ditambang matan partambangan di Sar-i Sang,[1] di Shortughai, wan partambangan lain di daerah Badakhshan (sakitar timur laut Afganistan) mulai 7.000 tahun sebelum masehi.[2] Sapalihan sumber manyambatakan bahwa lazuardi kawa ditamui jauh di timur sampai dairah parak Danau Baikal di Siberia.
Lazuardi dinilai tinggi ulih Paradaban Lembah Sungai Indus (3300–1900 SM) wan manik-manik lazurdi kawa jua ditamui di kuburan Neolitikum di Mehrgarh, di Kaukasus, maka jua kawa ditamui sampai di Mauritania. Pas zaman bahari, lapis lazuli (ngaran laim Lazuardi) dijualakan sampai ka Masir Bahari wan ka Mauritania. Batuan ngini dipakai dalam topeng Tutankhamun (1341–1323 SM).
Pas pahabisan Abad Patengahan, lazuardi mulai diekspor ka Irupa, tampat lazuardi pacangan diulah jadi bubuk wan pawarna biru laut, pigmen warna nang pambaiknya wan palarangnya. Inya dipakai ulih sapalihan saniman tarkanal matan Abad Renaisans wan waktu Barok, tamasuk Masaccio, Perugino, Titian, wan Vermeer.