Ateisma
From Wikipedia, the free encyclopedia
Ateisma marupakan sabuting pandangan filosofi nang kada mamparcayai adanya Tuhan wan déwa-déwi[1] atawa jua ba'indah (manampik) lawan téisma.[2][3] Dalam pangartian nang paling luas, inya tutih kadada kaparcayaan lawan adanya diwa atawa Tuhan.[4][5]
Istilah atéisma baasal tumatan Bahasa Yunani ἄθεος (atheos), nang sacara marandahakan diguna'akan gasan manunjuk lawan siapa haja nang kaparcayaannya balawanan lawan agama/kaparcayaan nang sudah nahap di lingkungannya. Sawayah manyabaknya pamikiran bibas, sképtisisma ilmiah, wan kritik lawan agama, istilah atéis bamula dikhususakan gasan manunjuk lawan bubuhan nang kada parcaya lawan Tuhan. Urang nang panambaian mangaku sabagai "atéis" mancungul wayah abad ka-18. Di jaman wayah ini, ada pang bangsa 2,3% populasi dunia mangaku sabagai atéis, bubuhan nang lain pulang 11,9% mangaku sabagai nontéis.[6] Ada bangsa 65% urang Japang mangaku sabagai atéis, agnostik, atawa jua urang nang kada ba-agama; dan bangsa 48%-nya di nagara Rusia.[7] Parsintasi komunitas nangitu di Uni Irupa baantara 6% (Italia) sampai 85% (Swedia).[7]
Banyak urang atéis basikap curiga lawan adanya paristiwa paranormal marga kurangnya bukti émpiris. Bubuhan nang lain mambari'i alasan badasar pada filosofis, susial, atawa sajarah.
Di kabudayaan Barat, atéis karancakannya dianggap sabagai kada ba-agama (ireligius).[8] Babarapa aliran Agama Buddha kada suah manyambat istilah 'Tuhan' dalam bamacam upacara ritualnya, tagal dalam Agama Buddha konsép katuhanan nang dimaksud hintadi mangguna'akan istilah Nibbana.[9] Marga kaitu pang agama nangini rancak disambat agama atéistik.[10] Tapi pang banyak jua tumatan bubuhan urang nang ma-artiakan dirinya sabagai atéis bacundai lawan filosofi sékular pariannya humanisma,[11] rasiunalisma, dan naturalisma[12], kadada idéologi atawa kalakuan bakurinah nang dijunjung ulih samunyaan atéis.[13]