![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/4/42/Nin_%2528bura%2529.jpg/640px-Nin_%2528bura%2529.jpg&w=640&q=50)
बोरा (हवा)
एड्रियाटिक तट पर बहे वाली कैटाबैटिक हवा / From Wikipedia, the free encyclopedia
बोरा (अंग्रेजी: Bora) एगो उतरही चाहे उत्तर-पूरुब से बहे वाली लोकल कैटाबैटिक हवा हवे जे एड्रियाटिक सागर के आसपास के इलाका में बहे ले। एह हवा से एड्रियाटिक तट के इटली, स्लोवेनिया आ क्रोएशिया देस प्रभावित होखे लें।[1] आमतौर पर ई एड्रियाटिक के किनारा वाला इलाका में पहाड़ी गैप सभ से नीचे उतरे ले खास क के डिनैरिक ऐल्प्स से।[2]
![Thumb image](http://upload.wikimedia.org/wikipedia/commons/thumb/4/42/Nin_%28bura%29.jpg/640px-Nin_%28bura%29.jpg)
ई हवा ढाल के सहारे नीचे उतरे भा धँसके ले जेकरा चलते एकरा के कैटाबैटिक हवा में गिनल जाला। ई साल भर में कौनों भी सीजन में बह सके ले हालाँकि, एकर सभसे बेसी बहाव जाड़ा के दिनन में होखे ला।[3] जाड़ा में ई पूरा एड्रियाटिक सागर के इलाका में परभावी हो जाले आ माल्टा तक ले पहुँच सके ले।[2] बाकी समय ई खाली भर समुंद्र के किनारा वाला इलाका में महसूस कइल जाला। अपना सबसे भयानक रूप में एह हवा के तेजी घातक होखे ले आ 100 किमी प्रति घंटा के रफ़्तार तक ले के हो सके ले; अदिमी के ढनका देवे आ गाड़ी पलट देवे के ताकत वाली होखे ले।[1]
बोरा शब्द यूनानी भाषा के बोरस शब्द से आइल हवे जेकर अरथ होला उत्तर दिसा। अइसने नाँव के इस्तेमाल भूमध्य सागर आ काला सागर बेसिन में तटीय इलाका सभ में बहे वाली उत्तर-पूरबी हवा सभ खातिर इस्तेमाल होखे ला। नाँव के इस्तेमाल बुल्गारिया में, काला सागर के इलाका में, रूसी आर्कटिक के नोवा ज़ेमिल्या में आ पच्छिमी अमेरिका में रॉकी परबत से पूरबी ढाल पर उतरे वाली हवा सभ खातिर इस्तेमाल होखे ला।[1]