Альбіцыя

Альбіцыя (Albizia) — род трапічных дрэў і кустоў сямейства бабовыя. Для раслін характэрныя шарападобныя суквецці, кветкі якіх маюць вельмі доўгія тычачкі. Каля 125 відаў.

Альбіцыя
Навуковая класіфікацыя
прамежныя рангі Дамен:  Эўкарыёты Царства:  Расліны Аддзел:  Кветкавыя[1] Клас:  Двухдольныя[2] Парадак:  Бабовакветныя Сямейства:  Бабовыя Падсямейства:  Mimosoideae Трыба:  Ingeae Род:  Альбіцыя
Міжнародная навуковая назва
Albizia Durazz.
Сістэматыка на Віківідах Выявы на Вікісховішчы ITIS   26448 NCBI   3812 EOL   1271473 IPNI   21602-1

Назва

Назва паходзіць ад імя італьянца Філіпа дэль Альбіцы, які пазнаёміў у XVIII стагоддзі Еўропу з гэтай раслінай.

Апісанне

Дрэвы ці кусты з двойчыперыстаскладанымі лістамі і кветкамі з непрыкметным венчыкам і шматлікімі доўгімі ярка афарбаванымі тычынкавымі ніткамі. Суквецці галоўчатыя або коласападобныя.

Альбіцыя серпападобная (Albizia falcata) — адно з самых хуткарослых дрэў у свеце (гадавы прырост больш за 5 м).

Пашырэнне

Растуць у тропіках і субтропіках, пераважна ва Усходнім паўшар’і. Альбіцыя ленкаранская (Albizia julibrissin), ці «шаўковая акацыя», трапляецца ў талышскіх лясах на поўдні Азербайджана. Як дэкаратыўную расліну разводзяць на поўдні Еўропы, у Крыме, на Каўказе і ў Сярэдняй Азіі.

Выкарыстанне

Некаторыя віды маюць каштоўную драўніну і кару, багатую дубільнымі рэчывамі або сапанінамі. Выкарыстоўваюцца як тэхнічныя, сідэратныя, кармавыя, лекавыя (лісце і кветкі ў Індыі ўжываюцца для лячэння праказы) і фарбавальныя расліны, а таксама для зацянення і ветрааховы плантацый чаю і кавы, аблясення пустэчаў, стварэння прысад, вытворчасці камедзі; з насення альбіцыі вырабляюць каштоўны алей для фарбаў.

Зноскі

1. Ужываецца таксама назва Пакрытанасенныя.
2. Пра ўмоўнасць аднясення апісанай у гэтым артыкуле групы раслін да класа двухдольных гл. артыкул «Двухдольныя».

Літаратура

• Беларуская энцыклапедыя: У 18 т. Т.1: А — Аршын / Рэдкал.: Г. П. Пашкоў і інш. — Мн.: БелЭн, 1996. — 274 с.: іл.