Уладзімір Паўлавіч Хадаровіч

У Вікіпедыі ёсць артыкулы пра іншых людзей з прозвішчам Хадаровіч.

Уладзімір Паўлавіч Хадаровіч (нар. 27 жніўня 1947, Слуцк, Мінская вобласць) — беларускі мастак.

Уладзімір Паўлавіч Хадаровіч
Дата нараджэння	27 жніўня 1947(1947-08-27) (77 гадоў)
Месца нараджэння	Слуцк, Слуцкі раён, Бабруйская вобласць, БССР, СССР
Дзеці	Павел Уладзіміравіч Хадаровіч
Род дзейнасці	мастак
Месца працы	Беларуская акадэмія мастацтваў
Жанр	нацюрморт
Вучоба	Мінскае мастацкае вучылішча (1967) Беларускі дзяржаўны тэатральна-мастацкі інстытут (1977)
Уплыў	Анатоль Васільевіч Бараноўскі
Член у	Саюз мастакоў БССР

Біяграфія

Нарадзіўся 27 жніўня 1947 года ў Слуцку. З другой паловы 1950-х гадоў жыве ў Мінску. Скончыў у 1967 годзе Мінскае мастацкае вучылішча, у 1977 годзе — аддзяленне жывапісу Беларускага дзяржаўнага тэатральна-мастацкага інстытута. Вучыўся ў А. Бараноўскага. У выстаўках удзельнічае з 1977 года^[1].

У 1985—1989 гг. працаваў кіраўніком студыі выяўленчага мастацтва СШ № 75 г. Мінска. У 1996—1997 гадах выкладаў на кафедры жывапісу Беларускай акадэміі мастацтваў^[1].

Сябра Беларускага саюза мастакоў з 1988 года^[1].

Творчасць

Працуе пераважна ў жанры нацюрморта. Яго творы адметныя кампазіцыйнай завершанасцю, нацыянальным характарам і каларытам, пабудаваным на згарманізаваных колеравых адценнях з перавагай серабрыстага, часам залацістага: «Хлеб», «Лён» (абодва 1987), «Народная скульптура», «Вясковы нацюрморт» (абодва 1988), «Травы майго дзяцінства» (1989), «Нацюрморт з яблыкамі», «На Каляды», «Слыннаму беларускаму вестуну прысвячаю», «Памяці Францыска Скарыны» (усе 1990), «Нацюрморт з сотамі» (1991), «Бацькава скрыпка» (1998). «Лета», «Старадрукі» (абодва 2000), «Нацюрморт з клубніцамі і шыпшынай» (2001), «Вясна. Вясковы нацюрморт» (2003)^[2].

Работы мастака знаходзяцца ў Нацыянальным мастацкім музеі Беларусі, Музеі сучаснага мастацтва, фондах БСМ, Магілёўскім абласным мастацкім музеі імя П. Масленікава, шэрагу іншых дзяржаўных, грамадскіх і прыватных збораў рэспублікі і іншых краін^[1].

Сям’я

Мае сына Паўла (нар. 1987), таксама мастака.

Зноскі

1. Хадаровіч Уладзімір Паўлавіч // Ціткоўскі І. А. «Мастакі Случчыны» (Слуцк. 2006)
2. БелЭн 2003.

Літаратура

• І. Л. Чэбан. Хадаровіч Уладзімір Паўлавіч // Беларуская энцыклапедыя: У 18 т. Т. 16: Трыпалі — Хвіліна / Рэдкал.: Г. П. Пашкоў і інш. — Мн. : БелЭн, 2003. — Т. 16. — 576 с. — 10 000 экз. — ISBN 985-11-0035-8. — ISBN 985-11-0263-6 (т. 16).

Спасылкі

• Хадаровіч Уладзімір Паўлавіч // Ціткоўскі І. А. «Мастакі Случчыны» (Слуцк. 2006)