Кагальны калодзеж

Кагальны калодзеж — крыніца ў г. Мсціславе Магілёўскай вобласці, гідралагічны помнік прыроды мясцовага значэння. Размешчана ў паўночнай частцы горада, у пачатку вуліцы Леніна, каля падножжа Замкавай гары на беразе ручая Здаравец. З’яўляецца традыцыйным месцам забору крынічнай вады насельніцтвам. Вада з крыніцы па выніках аналізаў адпавядае патрабаванням санітарных правіл і нормаў для пітнай вады^[2]. Ахоўны статус з 2003 года^[1].

Кагальны калодзеж
Калодзеж да рэканструкцыі
Катэгорыя МСАП — III (Помнік прыроды)
Размяшчэнне	Беларусь, г. Мсціслаў, Магілёўская вобласць
Плошча	0,01 га[1]
Дата заснавання	2003[1]
Кагальны калодзеж
Кагальны калодзеж

Даўней з яго яўрэйскія вознікі развозілі ваду па дамах гараджан. У назве захаваны яўрэйскія карані: «кагальны» азначае «грамадскі». Побач з калодзежам праходзіць сцежка, па якой у 1941 годзе нацысты вялі яўрэяў на расстрэл^[3].

У жніўні 2014 года пачаліся працы па добраўпарадкаванні калодзежа. На месцы крыніцы ўзведзена капліца, названая ў гонар Тупічэўскага абраза Маці Божай. У снежні 2014 года крыніца асвечана настаяцелем храма ў гонар Тупічэўскай Маці Божай протаіерэем айцом Цімафеем^[4].

Зноскі

1. Гідралагічны помнік прыроды мясцовага значэння
2. Кагальный колодец в Мстиславле Архівавана 30 красавіка 2019.
3. Аркадий ШКОЛЬНЫЙ * Arkady SHKOLNY. ЕВРЕЙСКИЕ НАЗВАНИЯ * JEWISH NAMES
4. Источник «Кагальный колодец». История возрождения

Спасылкі

• Кагальный колодец в Мстиславле Архівавана 30 красавіка 2019.
• Кагальны калодзеж на сайце Глобус Беларусі (руск.)