Белкард

Не блытаць з БелКарт.

ААТ «Белкард» — беларуская кампанія па вытворчасці карданных валоў^[en], якая размешчана ў Гродна.^[1]

Белкард
Тып	фабрыка і прадпрыемства
Заснаванне	1951
Ранейшыя назвы	Рамонтна-падшыпнікавы завод завод «Автозапчасть» Гродзенскі завод карданных валоў
Заснавальнікі	Міністэрства аўтамабільнай і трактарнай прамысловасці СССР
Краіна	Беларусь
Размяшчэнне	Беларусь, Гродна
Адрас	Гродна
Ключавыя постаці	Андрэй Леанідавіч Яначкін
Галіна	аўтамабільная прамысловасць
Прадукцыя	шарнір Кардана[d], карданны вал[d], рулявая цяга[d] і газавая спружына[d]
Колькасць супрацоўнікаў	2 500 чал.
Матчына кампанія	Міністэрства прамысловасці Рэспублікі Беларусь
Сайт	belcard-grodno.com

Апісанне

Вырабляе універсальныя шарніры, карданныя перадачы і валы, рулявыя цягі, гідраўлічныя амартызатары, тармазныя камеры і газавыя спружыны для грузавой, аўтатрактарнай, пасажырскай, сельскагаспадарчай, дарожна-будаўнічай, спецыялізаванай і іншай тэхнікі. Пастаўляе сваю прадукцыю на канвееры найбуйнейшых вытворцаў аўтатэхнікі Расіі (АТ «АЗ УРАЛ», ПАТ «КАМАЗ», ТАА «АЗ ГАЗ», ТАА «ПАЗ», ТАА «ЛіАЗ», ТАА «КАВЗ»), Беларусі (ААТ «МАЗ», ААТ «МТЗ», ААТ «БелАЗ», ААТ «МЗКЦ», ААТ «Амкадор», ААТ «Гомсельмаш», ААТ «Белкамунмаш»), Украіны (АТ «ХТЗ», ПАТ «АвтоКрАЗ»). Сістэма менеджменту якасці прадпрыемства сертыфікавана па ISO/TS 16949.^[2]

Гісторыя

У жніўні 1951 года Міністэрствам аўтамабільнай і трактарнай прамысловасці СССР быў падпісаны Загад аб арганізацыі рамонтна-падшыпнікавага завода ў горадзе Гродна. У пасляваенны час Беларусь нарошчвала тэмпы аднаўлення народнай гаспадаркі, павялічвала аб’ём аўтатрактарнага парка і задача забеспячэння яго запчасткамі стаяла асабліва востра. У кароткі тэрмін былі падрыхтаваныя вытворчыя плошчы, і ўжо ў снежні 1951 гады новы прамысловы аб’ект быў уведзены ў эксплуатацыю. У 1952 годзе было адрамантавана 10000 падшыпнікаў, а ў 1955 — больш за 226 000 штук. У 1955 годзе Пастановай Савета Міністраў СССР, Гродзенскі рамонтна-падшыпнікавы завод быў рэарганізаваны ў завод «Аўтазапчасткі».

У 1959 годзе завод выпусціў першую партыю карданных валаў для аўтамабіляў ЗІЛ-120. Паўстала пытанне рэканструкцыі і пашырэння вытворчых плошчаў. Пачалася разгортванне шырокамаштабнага капітальнага будаўніцтва (1957), мантаж новага абсталявання (1959) і запуск уласнага кавальнапрэсавага цэха (1965). Падрыхтаваўшы неабходную вытворчую базу, прадпрыемства пачало спецыялізавацца на выпуску кардану, і ў 1969 годзе атрымала назву «Гродзенскі завод карданных валаў». Яго прадукцыя пастаўлялася па ўсім СССР на канвееры заводаў-вытворцаў аўтатэхнікі: МАЗ, ЗІЛ, УралАЗ, ЛАЗ.

У 1970 годзе здадзена першая чарга механазборачнага цэха, у 1975 годзе завершана будаўніцтва новага кавальскага корпуса магутнасцю 150 000 тон паковак ў год. Была засвоена прадукцыя для Кіраўскага трактарнага завода, падрыхтавана вытворчасць карданных валаў для аўтамабіляў БелАЗ, наладжвалася супрацоўніцтва з МТЗ, КамАЗам і іншымі заводамі. У 1989 годзе створана галаўное спецыялізаванае канструктарскае бюро.

28 лютага 1995 года загадам Міністэрства па кіраванні дзяржмаёмасцю і прыватызацыяй Рэспублікі Беларусь «Гродзенскі завод карданных валаў» ператвораны ў Адкрытае Акцыянернае Таварыства «Белкард». Рашэннем Гродзенскага гарадскога выканаўчага камітэта № 258 ад 14 красавіка 2007 года ААТ «Белкард» рэарганізавана шляхам далучэння да яго ААТ «Гродзенскі завод аўтамабільных агрэгатаў».

Зноскі

1. Белкард, ОАО (Гродненский завод карданных валов) (руск.)(недаступная спасылка). 1info. Архівавана з першакрыніцы 9 сакавіка 2017. Праверана 18 верасня 2018.
2. Открытое акционерное общество «Белкард», г. Гродно (руск.)(недаступная спасылка). Министерство промышленности Республики Беларусь. Архівавана з першакрыніцы 16 верасня 2018. Праверана 18 верасня 2018.

Спасылкі

• На Вікісховішчы пакуль няма медыяфайлаў па тэме, але Вы можаце загрузіць іх
• Афіцыйны сайт
• Афіцыйная старонка «Белкард» у сацыяльнай сетцы «VK»
• «Белкард» на сайце grodno.in
• Афіцыйны прадстаўнiк Белкард у Расіі