Рэфэрэндум аб незалежнасьці Каталёніі 2017 году

Рэфэрэндум аб незалежнасьці Каталёніі — рэфэрэндум, праведзены ўладамі Каталёніі (вобласьць у Гішпаніі) 1 кастрычніка 2017 году. Уладамі Гішпаніі разглядаецца як незаконны.

За незалежнасьць прагаласавала 90,18 % (2 044 038 чалавек). Супраць незалежнасьці — 7,83 % (177 547 чалавек). Яўка склала 43,03 % (2 286 217 з 5 300 000 чалавек).

Сіняя «эстэляда» — каталёнскі незалежніцкі сьцяг

Каталёнія — вобласьць на паўночным усходзе Гішпаніі, у якой існуе рух за незалежнасьць Каталёніі. Змаганьне каталёнцаў за выйсьце з гішпанскага каралеўства ідзе некалькі стагодзьдзяў. Нацыянальны дзень Каталёніі, 11 верасьня, напамінае пра тое, што ў 1714 годзе сваю аўтаномію яна страціла; гэта адбылося пасьля Вайны за гішпанскую спадчыну. Аўтаномія была адноўлена толькі ў 1979 годзе пасьля сьмерці дыктатара Франсіска Франка, але цалкам каталёнцаў не задаволіла. Незалежніцтву спрыяе й то, што самапраўная вобласьць Каталёнія з насельніцтвам у 16 % ад агульнага насельніцтва Гішпаніі дае чвэрць валавога нацыянальнага прадукту краіны — у нацыянальны бюджэт Каталёнія плаціць на 16 млрд эўра больш, чым атрымвае назад; абавязак Каталёніі перавысіў 51 млрд эўра. Апроч таго, каталёнская мова заўважна адрозьніваецца ад гішпанскае.

Вынікі галасаваньня

Па афіцыйных выніках, 1 кастрычніка 2017 году за выйсьце Каталёніі са складу Гішпаніі аддалі свае галасы 2 044 038 чалавек, што складае 90,18% ад агульнага ліку сапраўдных галасоў. Супраць прагаласавала 177 547 чалавек (7,83%), 44 913 бюлетэняў апынуліся пустымі (1,98%), яшчэ 19 719 было прызнана несапраўднымі. Усяго было пададзена 2 286 217 галасоў, што складае 43,03% ад агульнага ліку выбаршчыкаў (5 313 564).

Вынікі па абласьцях^[1]

Акруга	Лічба выбаршчыкаў	Прагаласавала	Прыйшло (%)	Сапраўдных гаасоў	Несапраўдных галасоў	За	% за	Супраць	% супраць	Пустых лістоў	% пустых лістоў
Барсэлёна	3 971 666	1 637 401	41,23%	1 622 139	15 262	1 438 682	88,59%	147 294	9,08%	36 163	2,23%
Жырона	496 167	264 537	53,32%	263 083	1454	249 483	94,83%	10 382	3,95%	3218	1,22%
Лейда	298 140	157 501	52,83%	156 197	1304	146 583	93,84%	7485	4,79%	2129	1,36%
Тарагона	547 591	222 445	40,62%	220 749	1696	205 038	92,88%	12 331	5,59%	3380	1,53%
Каталёнія, агулам	5 313 564	2 286 217	43,03%	2 266 498	19 719	2 044 038	90,18%	177 547	7,83%	44 913	1,98%
Галасаваньне па-за Каталёніяй				4330	3	4252	98,2%	55	1,27%	23	0,53%

Абвяшчэньне незалежнасьці Каталёніі

Асноўны артыкул: Абвяшчэньне незалежнасьці Каталёніі

Абвяшчэньне незалежнасьці Каталёніі адбылося 27 кастрычніка 2017 году^[2].

Крыніцы

1. Окончательные результаты референдума
2. Урад Гішпаніі заявіў аб непрызнаньні незалежнасьці Каталёніі і аб роспуску каталёнскага сойму.

Вонкавыя спасылкі

Рэфэрэндум аб незалежнасьці Каталёніі 2017 году — сховішча мультымэдыйных матэрыялаў

• Рэфэрэндум аб незалежнасьці Каталёніі 2017 году
• Catalonia Votes