Кішкі (род)

Кі́шкі (Kiški), Кішкі-Цеханоўскія — магнацкі род гербу «Дуброва», прадстаўнікі якога займалі высокія дзяржаўныя пасады ў Вялікім Княстве Літоўскім.

Кішкі
Герб «Дуброва»
Краіна паходжаньня:	Вялікае Княства Літоўскае

Валодалі вялізнымі зямельнымі абшарамі на Падляшшы і Літве. Па згасаньні роду большая частка багацьця перайшла да неаднаразова пародненых зь ім Радзівілаў^[1].

Генэалёгія

Заснавальнік роду — Пашка (Павал) Струміла, які ў пачатку XV стагодзьдзя быў адным з уладальнікаў Дмошына ў Вышагродзкай зямлі (Польскае Каралеўства). Ягоны сын Юшка (Юры) Струміла (? — 1485) напрыканцы валадараньня Вітаўта займаў пры ягоным двары пасаду пасьцельнічага; атрымаў ад вялікага князя для бацькі места Цеханавец, а для сябе Бранск на Падляшшы. Кар’ера Ю. Струмілы прывабіла ў Вялікае Княства Літоўскае ягоныя братоў Мацея (Мацька) і Пятра (Пятрашка Страміла, Цеха-ноўскі-Страміла, Страмілка), якія атрымалі ў спадчыну Цеханавец. Мацей зрабіўся пачынальнікам роду Цеханавецніх, ягоны брат Пётар, імаверна, першым насіў мянушку Кішка, якая зрабілася прозьвішчам роду^[2].

1. Станіслаў (?—1513 або 1514), падстолі вялікі літоўскі (1487—1488), маршалак гаспадарскі і намесьнік лідзкі (1493)
   1. Ганна, 1-ы м. — Крыштап Радзівіл, 2-гі м. — Станіслаў Кезгайла
   2. Барбара (?—1513), м. — Юры Радзівіл
   3. Пётар (?—1534), староста драгічынскі, ваявода полацкі (1521—1532), кашталян троцкі (з 1532)
      1. Станіслаў II (?—1544), староста брацлаўскі (1522), ваявода віцебскі (з 1544); ж. — Ганна з Радзівілаў
         1. Ян (1552—1592), крайчы (з 1569) і падчашы вялікі літоўскі (з 1579), кашталян віленскі (з 1588), ваявода берасьцейскі (з 1589)
         2. Станіслаў III (1549—1619), староства жамойцкі
            1. Станіслаў IV (1584—1626), біскуп жамойцкі (з 1618)
            2. Мікалай III (1588—1644), ваявода дорпацкі (1617—1627) і амсьціслаўскі (1627—1636), кашталян троцкі (1636—1644), падскарбі і канцлер вялікі літоўскі (з 1640])
            3. Крыштап (?—1646), чашнік вялікі літоўскі (з 1632), ваявода амсьціслаўскі (1636—1639) і віцебскі (з 1639)
               1. Альжбета, м. — Т. Жыжэмскі
            4. Януш (1586—1653), ваявода полацкі (з 1621), польны (1635—1646) і гетман вялікі літоўскі (з 1646).
      2. Пётар II (1519—1550), маршалак валынскі і староста ўладзімерскі (з 1548)
      3. Мікалай (?—1587) — крайчы вялікі літоўскі, ваявода падляскі (з 1569)
         1. Мікалай II (? — да 1620), староста дарагічынскі
         2. Барбара, м. — Юры Алелькавіч

Галерэя

• Іканаграфія роду Кішкаў
• 
  Станіслаў Кішка
• 
  Януш Кішка
• 
  Ганна Радзівіл (з Кішкаў)
• 
  Ганна Радзівіл (з Кішкаў)

Крыніцы

1. Станіслаў Думін. Кішкі // ЭГБ. — Мн.: 1997 Т. 4. С. 189.
2. Станіслаў Думін. Кішкі // ВКЛ. Энцыкл. — Мн.: 2005 Т. 2. С. 101.

Літаратура

• Вялікае княства Літоўскае: Энцыклапедыя. У 3 т. / рэд. Г. П. Пашкоў і інш. — Мн.: Беларуская Энцыклапедыя, 2005. — Т. 2: Кадэцкі корпус — Яцкевіч. — 788 с. — ISBN 985-11-0378-0
• Энцыклапедыя гісторыі Беларусі. У 6 т. / Беларус. Энцыкл.; Рэдкал.: Г. П. Пашкоў (гал. рэд.) і інш.; Маст. Э. Э. Жакевіч. — Мн.: БелЭн, 1997. — Т. 4: Кадэты — Ляшчэня. — 432 с. — ISBN 985-11-0041-2

Вонкавыя спасылкі

Кішкі (род) — сховішча мультымэдыйных матэрыялаў