Marlene Dietrich
From Wikipedia, the free encyclopedia
De Marlene Dietrich (* 27. Dezemba 1901 z Schöneberg (heit a Oatstei vo Berlin) ois Marie Magdalene Dietrich; † 6. Mai 1992 z Paris) wor a deitsch-amerikanische Schauspuiarin und Sängarin.[1]
De Dietrich ghead zu de wenign deitschsproching Schauspuiarinnen und Sängarinnen, de wo a Wejdkarriere gmochd hom. Se wor ia ganze Karrier duach populea und hod se imma wieda neieafundn. Ian internationaln Duachbruch hods midm Fuim "Der blaue Engel" (Da blaue Engl), unta da Regie vom Josef vo Sternberg, ois Lola ghobd. No im sejm Joar hod se an Vadrog mid Paramount Pictures griagt und is midm Sternberg af Hollywood ganga. Mid Fuim wia Marokko (1930 midm Gary Cooper), Shanghai-Express (1932) und Der große Bluff (1939) is se zum Wejdstar und zu oane vo de bestbezoitasdn Hollywoodschauspuiarinna worn.
Zwengan Nationalsozialismus in Deitschland is de Dietrich 1939 amerikanische Stootsbiagarin worn.[2] Im zwoatn Wejdkriag is se fia de amerikanischn Soidotn an da Front afdredn. Nochm Kriag hod de Dietrich neama vui Fuim gmochd. In den 1950a, 60a und 70a Joar hod se voa oim Wejdtourneen ois Sängarin gmochd.
Iare Marknzoachn worn iare langa, sexy Haxn, ia rauchig-erotische Stimm und de Hosnozig, de wo se populea gmochd hod.