El Wing Tsun (詠春) ye un sistema de defensa personal dientro de les artes marciales chines, que deriva del Wing Chun según la llinia marcada por Leung Ting.
| Wing Tsun | |
|---|---|
| Tamién | WingTsun Kungfu |
| País d'orixe |  China |
| Fundador | Leung Ting |
| Cabezaleru actual | Leung Ting |
| Artes enseñaes | Principalmente defensa personal a mano vacía, y unes poques armes tradicionales (piértiga y cuchiellos de mariposa sobre too) |
| Métodos téunicos | Chi Sao, Lat Sao, combate, formes |
| Ancestros | Wing Chun |
| Escueles derivaes | Wing Tjun, Wing Tzun, etc. |
| Deporte olímpicu | Non |
| Sitiu Oficial | International WingTsun Association (IWTA) |
La organización que dirixe l'estilu a nivel internacional ye l'Asociación Internacional de WingTsun (IWTA), presidida por Leung Ting, que tien rexistrada la marca WingTsun (ensin l'espaciu). La romanización Wing Tsun foi escoyida por Leung Ting pa estremalu d'otros estilos de Wing Chun.
El principal oxetivu del Wing Tsun (acurtiáu WT davezu) ye ser un sistema realista de defensa personal. El WT nun pon l'acentu nes “téuniques” de combate, sinón que se sofita nos principios de combate y nos principios enerxéticos, principios toos ellos qu'han siguise tol tiempu.
La idea central ye que, baxo presión, ye imposible reconocer visualmente la direición y velocidá exautes d'un ataque y tomar una decisión consciente a respeutive la manera eficaz de reaicionar, precisamente nel tiempu percurtiu que se tien enantes de que l'ataque del adversariu faiga contautu. Pela cueta, hai que contratacar darréu d'una manera bien direuta y segura y enfotase nos reflexos pa determinar cómo reaicionar si l'ataque del oponente sigue siendo un problema. El Chi Sao, o “manes pegañoses” entrena a los estudiantes pa retrucar usando los reflexos a la velocidá, fuercia y direición d'un ataque, basándose na información táctil, que’l cerebru humanu procesa muncho más rápido que la información visual.
La diferencia principal ente’l Wing Tsun y otros estilos de Wing Chun ye’l métodu d'enseñanza del WT. El creador del estilu Leung Ting desendolcó’l sistema pa que fuera más fácil d'aprender y enseñar en comparanza colos estilos más tradicionales de Wing Chun. Esta idea enantóla dempués Keith Kernspecht n’Alemaña al introducir munches de les formes específiques del WT (como les de pierna). En comparanza con otros estilos el WT tien un programa d'enseñanza muncho más modernu y académicu.
Como deriváu del Wing Chun, el Wing Tsun comparte muncho de la mesma hestoria. La dixebra llega dempués de la muerte de Yip Man, cuando’l so alumnu Leung Ting decide enseñar lo qu'aprendiera del so maestru d'una forma muncho más direuta que la que se siguía tradicionalmente nel Wing Chun.
El principiu d'enseñanza direuta foi enantáu por Keith Kernspecht n’Alemaña, y el so programa ye’l que más s’enseña güei. Arriendes de crear dalgunes de les formes modernes, Kernspecht tamién desendolcó una versión más práutica y aplicable de delles téuniques de WT, llamada en xunto “BlitzDefence”, enfocada na defensa contra un atacante d'estilu occidental tradicional y en finar la engarrada lo más rápido posible, amenorgando’l dañu de cualesquier parte implicada. Tres organizar l'Asociación WingTsun, Kernspecht aidó a esparder l'estilo pel mundu occidental.
Llinax
El llinax oficial del Wing Tsun, hasta Leung Ting, ye como sigue:
Ng Mui(五梅)
- Yim Wing Chun (嚴詠春)
- Leung Bok Chau (梁博儔)
- Leung Lan Kwai (梁蘭桂)l
- Wong Wah Bo (黃華寶) y Leung Yee Tei (梁二娣)
- Leung Jan (梁贊)
- Chan Wah Shun (陳華順)
- Yip Man (葉問)
- Leung Ting (梁挺)
- Yip Man (葉問)
- Chan Wah Shun (陳華順)
- Leung Jan (梁贊)
- Wong Wah Bo (黃華寶) y Leung Yee Tei (梁二娣)
- Leung Lan Kwai (梁蘭桂)l
- Leung Bok Chau (梁博儔)
Los ocho principios del Wing Tsun formen un sistema de defensa personal agresiva que nos permite adautanos nel actu al tamañu, fuercia y estilu de llucha d'un atacante. Hai munches formes d'espresar los principios, pola mor de que son simples de manera. Pero lleva años prauticar les formes y el chi sao con un instructor espertu pa entrenar el cuerpu al envís de que siga los principios automáticamente y pa pescanciar les sos aplicaciones en situaciones concretes.
Principios de Combate
- Avanzar (問路尋橋手先行). Avanzar darréu al envís de facer contautu colos miembros (lo que permite imponese polos reflexos del Chi Sao), o, tovía meyor, de golpiar primero. Esta reaición intuitiva de contra sorpriende de cutiu al atacante, pasando la llucha a una distancia zarrada onde los reflexos táctiles dominen sobre les reaiciones visuales, situación na que suel tener ventaya’l prauticante de Wing Tsun.
- Apegase al contrariu (手黐手,無埞(地方)走). Si nun yes quien a cutir y incapacitar al contrariu, pero sí a facer contautu con dalguna parte del so cuerpu (sacantes la cara, gargüelu, etc.), apégate a ella. Davezu será un brazu del oponente; si caltienes el contautu constante colos sos brazos, él nun va ser pa solmenate un ataque sin que te decates d'ello. Esto pue facese namái cuando l'oponente ta bloquiando la to vía más curtia d'ataque. N’habiendo oportunidá, dexa d'apegate y pasa darréu al ataque.
- Ceder a una fuercia mayor (用巧勁，避拙力-即借力）. Como nun podemos esperar ser más fuertes que cualesquier atacante, tenemos qu'entrenanos de forma que seyamos quien a ganar hasta al más fuerte de los oponentes. El Chi Sao apriende los reflexos necesarios pa reaicionar a los ataques d'un enemigu. Cuando un ataque ye más fuerte que’l to, los tos reflexos entrenaos van dici-y al to cuerpu qu'esquite de la vía d'ataque y atope otru ángulu d'ataque.
- Rematar (迫步追形). Como amestadura del primer principiu, si un oponente zalla, la respuesta inmediata d'un prauticante de Wing Tsun ye siguir avanzando ensin dexar al oponente recuperase y tener la oportunidá de repensar la so estratexa d'ataque. Munchos estilos que se sofiten n’entraes visuales prefieren salir de distancia y esperar y calcular los sos ataques, como suel vese nos combates deportivos.
Principios Enerxéticos
- Llibrase de la propia fuercia. Hai que se relaxar al envís de movese dinámicamente y reaicionar a les aiciones del oponente. Cuando ún ta tensu, la "propia fuercia" actúa como un frenu, qu'hai que soltar si ún se quier mover rápido.
- Llibrase de la fuercia del enemigu. Netu al tercer principio de combate, cuando un atacante quier usar la fuercia pa superar al contrariu, la respuesta nun ye oponer fuercia escontra fuercia sinón amatagala sacando la fuercia del atacante fuera d'ún o moviéndose fuera d'ella.
- Usar la fuercia del enemigu contra él. Sacar ventaya de la fuercia que l'oponente emplega contra ún. Si l'oponente tira de ti, usa esa enerxía como parte del to ataque. Si l'oponente emburria la parte izquierda del to cuerpu, puedes actuar como una puerta xiratoria y usar esa fuercia nun ataque del to brazu derechu.
- Añader la propia fuercia. Amás de sacar puxu del ataque del otru, puedes añader la to propia fuercia nun ataque cuando la to mano ta llibre.
L’entrenamientu del Wing Tsun básase en desarrollar los reflexos. Esti entrenamientu consta de distintes formes, masque hai munches que s’aprienden namái cuando l'artista marcial pasa de los niveles d'estudiante.
Lat Sao (甩手)
El programa Lat Sao ye particular de la rama europea del estilu d'enseñar Wing Tsun de Leung Ting; les otres rames de Wing Chun, incluyendo la rama de Ḥong Kong de la organización de Leung Ting, polo xeneral progresen d'una manera más tradicional dende les formes al entrenamientu del Chi Sao pal combate llibre. Lat Sao tórnase aproximao a entrenamientu de les "manes que bancien" o "manes que cayen".
El Lat Sao ye un exerciciu de sensibilidá p'algamar respuestes automátiques específiques de chi sao. Anque pue asemeyar un combate, nun hai que lu tracamundiar col combate llibre. El Lat Sao ye un xuegu, onde un compañeru xuega’l papel d'atacante y l'otru’l de defensor. Entrambos cambien los papeles davezu, o dempués d'un númberu fixu d'ataques. Si unu nun ta sollerte, o si’l profesor nun esplica l'exerciciu correutamente, l'entrenamientu llega a acelerase y a volvese competitivu; si pasa esto, los estudiantes escaecen dafechu l'oxetu del exerciciu. El Lat Sao nun va de cutir al otru, sinón de llanza-y ataques pa que pueda entrenar los contrataques. Según el compañeru va ameyorando, los ataques pueden ser pasu ente pasu más difíciles de responder faciéndolos más rápidos o más apotaos. Sicasí en cuantes se llogra que l'ataque llegue siempre hai que dir baxándolu otra vuelta, en visu a que’l defensor pueda identificar el so error o “furacu” na defensa.
El Lat Sao pue ser tanto beneficiosu como dañible si nun se prautica con conocimientu de los sos beneficios y riesgos. Polo xeneral los beneficios vense nun estilu más téunicu y más apotáu, pola mor de qu'al estudiante-y lleva xera probar les sos llendes y atopar los sos errores. Un beneficiu secundariu ye un mayor enfotu del estudiante y un menor choque cuando s’enfrenta per primer vez a los programes de combate llibre. Los riesgos tán na escesiva dependencia de patrones deprendíos n’exercicios y na execución mecánica de memoria, en cuenta de sentir la presión del oponente y reaicionar a ello. Ye beneficioso enfrentar a los estudiantes con soluciones inesperaes a problemes que plantega’l Lat Sao, como exerciciu y pa demostrar que cada exerciciu de Lat Sao solo ye una de les munches soluciones posibles a un problema dau. Un bon exerciciu ye tamién pidir a un estudiante que resuelva problemes de Lat Sao usando téuniques recién aprendíes en cada programa; inclusive si les soluciones qu'atopen nun funcionen, el vezu de pescudar el problema dende diferentes ángulos y nun tener el Lat Sao como daqué escritu en piedra aidarálos a esquitar los riesgos.
L’estilu alemán de Lat Sao nos años 1990 y primeros de los 2000 usóse muncho n’Europa y América. Nel Lat Sao alemán los oponentes tenten de facer una secuencia más llarga y complexa desendolcándola col tiempu. Nel Lat Sao chinu l'acentu ponse más nun ataque potente realista, colo que la secuencia polo xeneral termina con dos o tres golpes.
Nun Lat Sao más avanzáu los dos oponentes enfréntense y tenten entrambos d'algamar la mano cimera, permitiendo que les sos reaiciones de Chi Sao se produzan.
Chi Sao
El Chi Sao (黐手) o "manes pegañoses" ye’l conxuntu d'exercicios usáu pa desendolcar reflexos automáticos de combate. Naz direutamente de los principios fundamentales del Wing Tsun. Nel Chi Sao, dambos tienen que caltener presión haza alantre, apegase pa prevenir que la presión del oponente pase y golpie, ceder cuando l'oponente ataca con una fuercia superior al equilibriu de les dos, y siguir cuando s’abre una vía p'avanzar. El fluxu d'ataque y contrataque nel Chi Sao va alternando, y en realidá pue ser mui rápidu. Sicasí’l Chi Sao ye un exerciciu d'entrenamientu en pareya, non un exerciciu de combate llibre, y nun hai que lu tracamundiar con ello. El propósitu del Chi Sao ye entrenar los reflexos que permiten al cuerpu pescanciar lo que fai l'otru, y reaicionar automáticamente a ello.
Les formes básiques del Wing Tsun estúdiense nos graos d'estudiante, con más esixencia d'aplicación y téunica nes formes cimeres. El propósitu del Wing Tsun ye ser una forma "redundante", u la enseñanza va desendolcando movimientos y reaiciones previamente deprendíes pa permitir rápidamente un mayor entendimientu de la materia. Cada lladriyu d'esi edificiu igual nun se abarca dafechu cuando s’enseña (anque sí tenía que comprendese dientro de les llendes de la esplicación en cada nivel), pero l'entrenamientu del principiu va actuar como base pal entrenamientu nos niveles cimeros.
Siu Nim Estáu (小念頭)
El Siu Nim Estáu o "forma de la pequeña idea" del Wing Tsun introduz una forma de pierna metanes los movimientos de manes tradicionales. El propósitu ye dar a les piernes la mesma base que los movimientos de manes dan a los brazos.
Chum Kiu (尋橋)
El nome de la forma significa brazos “ponte” o “que busquen”. Céntrase en pontiar la distancia ente unu mesmu y l'otru, esviando los sos ataques. Carauterízase por un patrón de defensa-contrataque un-dos. Nel Chum Kiu, cuando tas a puntu de ceder al ataque del otru, úseslu como una ponte pa entrar y contratacar.
Biu Tze (標指)
El Biu Tze (llit. "deos dardu") carauterízase pol usu de téuniques de mano abierta (en cuenta de los golpes a puñu zarráu), y d'ehí’l nome. La forma apriende cómo pasar les defenses del contrariu si les sos reaiciones de Chum Kiu son lo bastante acionaes como pa nun atopar un error na so defensa del que sacar ventaya. Tamién apriende cómo recobrar y crear una nueva llinia central una vez que se pierde, y por eso a veces dizse que ye un conxuntu de “téuniques d'emerxencia”. El Biu Tze añade movimientos de tol troncu a les téuniques de brazu y pierna de les formes Siu Nim Estáu y Chum Kiu, anque (como coles otres formes) dellos movimientos del Biu Tze apriéndense nos graos d'estudiante de WT, construyendo’l so sistema d'enseñanza "redundante".
Moñecu de Madera (木人樁)
.jpg)
Muk Yan Jong significa lliteralmente "poste de persona de madera", y s’emplega pa sustituyir a un compañeru imaxinariu col que prauticar. Pero nun ye la semeya exauta d'una persona, sinón una representación de la fuercia y enerxía d'una persona.
Na forma del moñecu de madera, el prauticante ataca y contrataca en munchos planos y direiciones. Onde’l Chum Kiu ataca y defende en llinia, y el Biu Tze pasa sobre les defenses del oponente dende diferentes ángulos, el Moñecu de Madera céntrase n’atacar dende munchos ángulos a un tiempu, moviéndose alredor del oponente. Por exemplu un ataque de moñecu de madera pue incluyir a la vez una patada a la rodiya, tirar con un brazu y cutir col otru. Esto ye perdifícil de contratacar, porque les defenses tamién tienen que ser simultánees a los tres ataques. Pese a ello, l'entrenamientu en moñecu de madera inda ye útil munchos enantes de que l'estudiante pueda aplicar realmente los principios, porque ayuda a la precisión y depura les téuniques de nivel más baxu.
Piértiga (長棍), o Luk Dim Boon Kwun Fa (六點半棍法)
Conocida formalmente como forma de "Palu de Seis Puntos y Mediu" esta ye la penúltima forma del sistema. Esta forma contién una montonera de trabayu de pasos y entrenamientu de la precisión. Ye tamién un abona xera, yá que tratar d'apotar cola punta d'una piértiga de 2,7 m. nun círculu de 51 mm. rique muncha precisión y fuercia de tol cuerpu. D’esta miente, anque l'usu d'esta arma ye raru, entrenala ameyora en xeneral el puxu y precisión de la téunica.
Bat Cham Dao (八斬刀), o Cuchiellos de Caparina (雙刀)
Traducida como Sable d'Ocho Cortes, esta ye la forma cabera del sistema.
La organización que dirixe a nivel global el Wing Tsun, la International WingTsun Association (IWTA), presidida por Leung Ting, tien la sede n’Hong Kong. La IWTA tien escueles en más de 60 países, y ta perespardida pel mundu occidental. N’Europa hai anguaño más de 2.000 escueles de Wing Tsun, la mayoría n’Alemaña y países vecinos. Con más de 1.000.000 de prauticantes en tol mundu, la IWTA ye güei una de les organizaciones d'artes marciales más grandes del mundu.[1] Esta medría débese principalmente al alumnu avanzáu alemán de Leung Ting, Keith R. Kernspecht. La sede de la EWTO (European WingTsun Organization), onde’l Wing Tsun s’enseña tolos díes más de seis hores al día, allegase en Langenzell, Alemaña.
Wikiwand in your browser!
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
