Guerra de Crimea

La guerra de Crimea, conocida tamién na historiografía rusa como Guerra Oriental de 1853-1856, foi un conflictu bélicu que Rusia perdió escontra la alianza formada por Francia, Gran Bretaña, l'Imperiu otomanu y el reinu de Cerdeña. La causa inmediata de la guerra foi la situación de les minoríes cristianes en Tierra Santa, que pertenecía al Imperiu otomanu. Francia defendía los derechos de los católicos, mentantu Rusia facía neto colos de los ortodoxos. La guerra hai que ponela nel contestu de decayencia que vivía l'imperiu otomanu, y na determinación franco-británica de nun permitir a Rusia ganar territorios y poder a costa d'elli. Rusia perdió la guerra, y así l'Imperiu consiguió una pausa de venti años na presión rusa empobinada a sacar provechu de la so decayencia. En Tierra Santa, pela so banda, los cristianos algamaron un estatus d'igualdá con respectu a los musulmanes, y los ortodoxos ganaron el control de les ilesies cristianes que los católicos-yos disputaban^[20].

Soldaos franceses izando la so bandera tres de la rendición de Sebastopol. La prise de Malakoff, d'Horace Vernet.

Guerra de Crimea
Parte de Guerras ruso-turcas (es) y guerres otomanes n'Europa
Fecha	ochobre 1853[1] → febreru 1856[1]
Llugar	Crimea, El Cáucasu, Balcanes, Mar Negru, Mar Bálticu, mar Blancu y Península de Kamchatka
Resultáu	Victoria aliada Tratáu de París de 1856
Belixerantes
Imperiu otomanu Segundu Imperiu francés  Imperiu británicu Reinu de Cerdeña Imanatu d'El Cáucasu  Imperiu rusu Reinu de Grecia
Figures polítiques
Abdülmecit I Napoléon III George Hamilton-Gordon Lord Palmerston Camilo Benso Nicolás I de Rusia Alejandro II de Rusia
Comandantes
Omar Pasha François Certain Jacques Leroy FitzRoy Somerset Alfonso La Marmora Shamil Aleksandr Ménshikov Mijaíl Gorchakov Pável Najímov  † Eduard Totleben
Unidaes militares
250.000 otomanos[nota 1] 310.000 franceses[nota 2] 98.000 británicos[nota 3] 15.000 italianos[nota 4] == | unidaes2 = ~1.200.000 rusos[nota 5] ==
Baxes
~45.000 muertos[15] 135.485 muertos[15] 40.462 muertos[15] 2166 muertos[15] ~450.000 muertos[15][nota 6]
La gran mayoría de les baxes fueron por enfermedaes, sobre too al cólera.[nota 7]
[editar datos en Wikidata]

Detalle de El sitiu de Sebastopol (1904), de Franz Roubaud.

L'Imperiu otomanu declaró-y la guerra a Rusia n'ochobre de 1853, y sufrió una gran derrota que-y dio a Rusia-l control del mar Negru. La llave d'esi control yera la base naval rusa de Sebastopol, na península de Crimea. Los aliaos decatáronse de que si capturaben esa ciudá fadríense col control del mar Negru y ganaríen la guerra. Francia y Gran Bretaña entraron en guerra en marzu de 1854, y llevaron al mar Negru les sos armaes, mayor la francesa y daqué menor la británica. El sitiu de Sebastopol, que duró un añu hasta la so rendición el 9 de setiembre de 1855, costó bien de vides pelos dos bandos, tanto poles aiciones béliques como poles enfermedaes que se propagaron ente los sos exércitos. En cuantes Sebastopol cayó los países neutrales entamaron a xuntase a los aliaos, y Rusia, aisllada y con perspectives permales si siguía la guerra, pidió la paz en marzu de 1856. Les disputes relixoses que sirvieron d'escusa pa la guerra arregláronse, y Rusia perdió'l derechu a tener barcos de guerra nel mar Negru y foi obligada a dá-yos gran autonomía a Moldavia y Valaquia.

La guerra tuvo como escenariu principal a Crimea, con batalles menores n'Anatolia, la rexón del Cáucasu, el Mar Bálticu, el Mar Blancu y l'océanu Pacíficu, y tuvo un impautu permanente visible anguaño. La guerra estimuló la nacencia de movimientos nacionalistes n'Ucraína, Moldavia, Bulgaria, Rumanía, Grecia, Turquía, Azerbaixán, Armenia y Xeorxa^[21], y foi'l primeru de los desencuentros ente Rusia y los países occidentales, que prollongáronse na Guerra Fría y vuelven a aparecer en 2015 cola secesión de Crimea d'Ucraína p'axuntase a Rusia, condenada polos países occidentales.

La guerra foi ún de los primeros conflictos n'usar teunoloxíes modernes como'l ferrocarril pal tresporte de soldaos o'l telégrafu pa les comunicaciones col frente de batalla, y ye una de les primeres nes qu'hebo periodistes que la documentaron con bien de cróniques y semeyes. Foi, tamién, símbolu de los desastres tácticos (la perfamosa Carga de la Brigada Llixera), loxísticos y sanitarios, y abrió un debate n'Inglaterra sobro la necesidá d'afrontar estes cuestiones de forma profesional. Fízose perfamosa a este respectu Florence Nightingale, pionera na aplicación de procedimientos modernos nel cuidáu de los firíos que lleven a considerala como la fundadora de la Enfermería moderna.

Notes

1. Badem menta un informe financieru d'ochobre de 1855 nel qu'apaecen 235.568 soldaos, el total del Exércitu.^[2] Figes afirma qu'unos 120.000 otomanos morrieron nel conflictu, alredor de la metá de los que participaron nél.^[3] Gouttman nun da cifres pa los otomanos, pero calcula qu'unos 100.000 perecieron na guerra.^[4] Edgerton calcula qu'hubo alredor de mediu millón de muertos rusos y una cifra similar d'otomanos.^[5]
2. Figes afirma que 310.000 franceses llucharon en Crimea^[6] y qu'alredor de 100.000 morrieron.^[7] Gouttman indica que fueron 95.000 los finaos.^[4]
3. Figes indica que 98.000 británicos llucharon en Crimea y que d'ellos morrieron 20.813.^[8] Lambert afirma que los muertos fueron 21.097,^[9] y Gouttman, que fueron 22.000.^[4]
4. Figes afirma que 15.000 italianos participaron na campaña de Crimea^[10] y que d'ellos finaron 2166.^[11] Gouttman indica que fueron 18.000 los combatientes^[12] y 2200 los muertos.^[4]
5. Orlando Figes indica que, del 1.200.000 soldaos que componíen l'Exércitu rusu na primavera de 1855, 260.000 taben nel Bálticu, 293.000 en Polonia y en Volinia, 121.000 defendíen Besarabia y la mariña del mar Negru, 183.000 combatíen n'El Cáucaso y 350.000 taben destinaos en Crimea.^[13] Según Totleben, Rusia cuntaba con 1.365.786 soldaos en xineru de 1853.^[14]
6. Gouttman indica que las cifras oficiales de bajas rusas carecen de valor y calcula que entre 100.000 y 200.000 soldados rusos murieron en la guerra.^[4] Pela so parte, Figes calcula que finaron siquier trés cuartos de millón de soldaos nel conflictu y que dos tercios d'ellos fueron rusos; indica amás que les perdes civiles desconócense. Da unes cifres aproximaes d'ente 400.000 y 600.000 muertos pa la guerra nel so conxuntu,^[16] y cita un informe del departamentu médicu del Ministeriu de Guerra rusu que menta 450.015 muertos pal periodu trescurríu ente 1853 y 1856, que cree que ye'l cálculu aproximáu más fiable.^[17] Pal asediu de Sebastopol, afirma que morrieron 127.583 rusos.^[18] Scollins cree qu'hubo 100.000 muertos en combate y 350.000 finaos por enfermedá.^[14][19] Edgerton afirma que fueron probablemente en redol a mediu millón los muertos rusos y otros tantos otomanos.^[5]
7. Lambert afirma que les perdes britániques fueron: 2755 muertos en combate, 2019 d'ellos finaos de les feríes sufiertes, y 16.323 muertos d'enfermedá.^[9] Figes afirma que'l 80% de les baxes britániques tuvieron rellación con enfermedaes.^[8]Tocantes a les baxes franceses, Gouttman calcula que fueron: 10.000 muertos en combate y 75.000 víctimes d'enfermedaes. Indica amás que de los 2.200 muertos sardos, apenes 28 lo fueron en combate.^[4]