músicu y cantante folk asturianu From Wikipedia, the free encyclopedia
Alberto Fernández Varillas (1969, Xixón), más conocíu como Berto Varillas, ye unu de los principales músicos del panorama de la gaita y la música tradicional y folk asturiana.
Alberto Varillas | |
|---|---|
 | |
| Vida | |
| Nacimientu | Xixón, 1969 (54/55 años) |
| Nacionalidá |
 España |
| Familia | |
| Padre | Alberto Fernández Velasco |
| Familia |
ver
|
| Estudios | |
| Llingües falaes |
asturianu castellanu |
| Oficiu | músicu |
| Premios |
ver
|
 | |
 | Esti artículu necesita wikificase. |
Nacíu en Xixón (Asturies) en 1969, empecipia con 10 años na música tradicional asturiana, aprendiendo a tocar el tambor col gaiteru y tamborileru Pepe Blanco. De so padre, Alberto Fernández Velasco, recibe la tradición de la gaita asturiana -la so gran pasión-, y con él da los sos primeros pasos col instrumentu… Al añu viniente, col maestru gaiteru Xuacu Amieva, recibe clases de téunica instrumental y de l'aplicación de metodoloxíes nueves pal so estudiu.
Empecipia llueu una brillosa etapa de competiciones, nes modalidaes de gaiteru solista o de gaita y tambor, ganando la mayoría de los certámenes de gaita celebraos n'Asturies a lo llargo de la década de los años 80. Empieza asina un periodu d'estudiu sobre la gaita de forma autodidacta, que combina colos estudios de música nel conservatoriu y nos que toma como referencies direutes a prestixosos gaiteros de la dómina. Recibe, clases maxistrales de dalgunos d'ellos, como José Antonio García Suárez "El Gaiteru Veriña", José García Tejón Fariñas y bien especialmente, de José Remis Ovalle “Gaiteru Mayor d'Asturies y d'España”, pol que siempre sintió una especial almiración artística. Son años nos que s'integra como gaiteru n'estremaes agrupaciones folclóriques de baille tradicional, dientro y fuera d'Asturies, como Los Mariñanes, Aires d'Asturies, Alitar, Los Collacios, Los Xustos -toos ellos de Xixón-; San Félix, de Valdesoto; El Nocéu, de Trubia; o Reija, de La Felguera; ente otros.
Coles mesmes, actúa como gaiteru acompañante de tonada en munches romeríes, festivales y concursos, ente los que destaca la so participación como gaiteru oficial del Concursu de Canción Asturiana de Xixón dende 1989. La so vinculación cola tonada rescampla nes sos numberoses grabaciones al par de la mayoría de los principales cantantes d'esti xéneru. A lo llargo de la primer década del dos mil recibió'l Premiu del Memorial Silvino Argüelles al Meyor Gaiteru Acompañante de Tonada, siendo'l gaiteru que mayor númberu de vegaes recibió esti gallardón, el más prestixosu de la música asturiana tradicional.
En 1988 proclámase vencedor del Troféu McCallan nel Festival Intercélticu de Lorient, tres una reñida competición col gallegu Carlos Núñez y los asturianos José Ángel Hevia y José Manuel Tejedor, convirtiéndose d'esta forma, nel tercer gaiteru en consiguir esti premiu p'Asturies, depués de Xuacu Amieva y de Vicente Prado "El Pravianu".
Esi mesmu añu entama'l so llabor docente impartiendo clases de gaita y tambor en Trubia, Sariegu y Xixón, siendo ún de los primeros maestros de gaita n'introducir una metodoloxía específica pal estudiu d'estos instrumentos, meciéndolo con otres fórmules más tradicionales d'enseñanza. Colos sos alumnos de Xixón fundaría la Banda de Gaites Noega. Darréu, participa na fundación de la Banda de Gaites La Salle, de la Felguera, y la Banda de Gaites Alitar, de Bruxeles.
Nel añu 1990 collabora con dalgunos de los principales gaiteros de la nueva xeneración na creación de la primer asociación d'intérpretes y simpatizantes del istrumentu, a la que se denominó Conceyu de Gaiteros d'Asturies, -del que sería presidente ente los años 1994 y 1997-. Un añu más tarde, recibe de l'administración rexonal la acreditación de Maestru Gaiteru, tres superar les pruebes de capacitación nel Conservatoriu Superior de Música Eduardo Martínez Torner d'Uviéu.
A lo llargo d'estos años collabora con so padre -el reconocíu artesanu de gaites asturianes Alberto Fernández Velasco, Berto Velasco-, na evolución de les cualidaes tímbriques y tonales del instrumentu.
En 1993, participa como gaiteru solista nun eventu que marca un primero y un dempués pa la historia de la gaita asturiana, siendo la primer vegada que l'instrumentu protagoniza una pieza sinfónica, acompañáu pola Orquesta Sinfónica del Principáu d'Asturies -OSPA-, y baxo la batuta del maestru Antón García Abril. La ocasión yera entá más especial por coincidir cola estrena de la gaita cromática, prototipu instrumental creáu pol artesanu Alberto Fernández Velasco. Esti instrumentu únicu, en manes de Berto Varillas, protagoniza'l discu "Día de Fiesta n'Asturies", rescamplando les peramplies posibilidaes musicales de la gaita cromática, o acompañáu pola citada orquesta sinfónica y una agrupación coral como'l Coro de Amigos de la Ópera d'Asturies. Esta grabación recueye una memorable versión del himnu d'Asturies, de Leoncio Diéguez Marcos, pa orquesta, coru y gaita.
En 1996 estrena nel Teatru Campoamor d'Uviéu, otra vuelta xunta la OSPA y con ocasión del Conciertu del Día d'Asturies, la obra del compositor asturianu Manuel Fernández Avello, "Tres variaciones sobre un tema de gaita", obra que tamién se recueye nel discu "Día de Fiesta n'Asturies".
Dos años más tarde, l'estrenu de l'adaptación sinfónica de la obra "La Nueche Celta", del compositor Ramón Prada, ufierta una nueva ocasión pa esfrutar de la combinación d'instrumentos sinfónicos y tradicionales, con protagonismu especial de la gaita asturiana. "La Nueche Celta" convirtióse nel cumal de la presencia d'Asturies como rexón convidada y protagonista de la edición del Festival Intercélticu de Lorient de 1998, con un conciertu qu'entá munchos recuerden y nel que la gaita asturiana cautivó a les delegaciones presentes de la mano de Berto Varillas. Esti conciertu repitiríase nel Teatru Campoamor d'Uviéu con ocasión del Día d'Asturies de 1998 y nel Teatru Xovellanos de Xixón, en marzu de 1999.
En 1998 intégrase na Asturiana Mining Company, grupu que lidera xunto al músicu norteamericanu afincáu n'Asturies, Michael Lee Wolfe, y nel que compaxina les facetes de gaiteru y cantante. Una de les sos collaboraciones foi la participación na grabación de la BSO de la película “Pídele cuentas al Rey”, ópera prima del direutor asturianu José Antonio Quirós, na que s'inclúi tamién “La Trova del Mineru”, tema principal del discu "Patrimoniu" de l'Asturiana Mining Company, (2000). Dos años dempués, con músicos d'esta formación y col nome d'Ástura, saca'l discu “Tradición”.
En 2004 participa al par d'Anabel Santiago y el grupu Ástura, na grabación de "Torner" (proyeutu realizáu coincidiendo col 50 aniversariu de la muerte del pernomáu músicu y folklorista Eduardo Martínez Torner).
Apocayá, participó na grabación de la BSO de la última película de José Antonio Quirós, "Cenices del Cielu". Nella interpreta'l tema tradicional "Que m'escurez", grabáu nel CD Torner, que termina siendo'l tema más reconocible de la película.
Na actualidá, compaxina la so faceta de profesor, (na Escuela de Música de la Mancomunidá Cinco Villes y la Escuela Municipal de Música de Salas, nel Aula de Música Tradicional de l'Agrupación Folklórica Teixo-Manolo Quirós y nel aula de Música Tradicional de la Banda de Gaites Noega, de Xixón), cola faceta d'artista, collaborando en grupos de folk como los citaos con anterioridá, cola Orquesta Sinfónica del Principáu d'Asturies n'ocasiones puntuales, y de productor musical.
Como productor entama dende l'añu 2003 espectáculos musicales pal Teatru Xovellanos de Xixón, con temátiques rellacionaes cola música tradicional asturiana: "Buscando’l norte" (2003); "Nel Camín" (2004); "Sones de Danza" (2005); "Un añu en Xixón" (2006); "Alborá en Xixón: Homenaxe a Manolo Quirós" (2007); "1808: Cantares de la Francesada" (2008); "Xixón con Xota" (2009); y "Yá suena la gaita: homenaxe a José Remis Ovalle" (2010).
Nel añu 2012, al mandu de l'Asturiana Mining Company, gana'l Premiu al Meyor Cantar 2012, col cantar "Si nun conoces Val.louta", de Macu González, del so cd "Sones por Berto Velasco". Darréu, col mesmu cantar, representó a Asturies nel festival Liet Internacional, llogrando'l Premiu del Públicu.
| Año | CD |
|---|---|
| 1993 | CD Agua de la fonte clara, con Nuberu. |
| 1994 | CD Día de Fiesta n'Asturies, cola Orquesta Sinfónica del Principado de Asturias. |
| 1995 | CD La Noche Celta, música orixinal de Ramón Prada. |
| 1997 | CD Canción Asturiana, con Ismael Tomás. |
| 1997 | CD Canción Asturiana, con Jorge Tuya. |
| 1997 | CD Canción Asturiana, con José Manuel Collado. |
| 1999 | CD La Noche Celta, cola Orquesta Sinfónica del Principado de Asturias. |
| 2000 | CD Patrimoniu, con l'Asturiana Mining Company |
| 2001 | CD BSO Pídele cuentas al Rey, música orixinal de Juan Carlos Cuello |
| 2002 | CD Tradición, con Ástura |
| 2003 | Buscando'l Norte, con Juan Carlos Casimiro e Ismael González Arias. |
| 2004 | Nel Camín, con Ismael González Arias. |
| 2005 | CD Torner, como Ástura |
| 2005 | Sones de danza, con Xaime Arias e Ismael González Arias. |
| 2006 | Un añu en Xixón, con Xaime Arias e Ismael González Arias. |
| 2007 | Alborá en Xixón: Homenaxe a Manolo Quirós, con Xaime Arias e Ismael González Arias. |
| 2008 | 1808: Cantares de La Francesada, con Xaime Arias e Ismael González Arias. |
| 2009 | BSO Cenizas del cielo |
| 2009 | Xixón con Xota, con Xaime Arias e Ismael González Arias. |
| 2010 | Yá suena la gaita: homenaxe a José Remis Ovalle, con Xaime Arias e Ismael González Arias. |
| 2011 | CD Sones por Berto Velasco, con l'Asturiana Mining Company. |
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.
