![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/7/7e/Gemini_IAU.svg/langast-640px-Gemini_IAU.svg.png&w=640&q=50)
Rho Geminorum
From Wikipedia, the free encyclopedia
Rho Geminorum (ρ Geminorum / 62 Geminorum / HD 58946 / HR 2852) ye un sistema estelar na constelación de Xéminis de magnitú aparente +4,16. Alcuéntrase a 59 años lluz del Sistema Solar.
La componente principal del sistema, Rho Geminorum A (GJ 274 A),[9] ye una estrella blancu-mariella de la secuencia principal blanca de tipu espectral F0V. Tien una temperatura superficial de 7000 K y ye 5,4 vegaes más lluminosa que'l Sol. El so diámetru ye un 60% más grande que'l diámetru solar y, como correspuende a una estrella de les sos carauterístiques, rota muncho más apriesa que'l Sol —el so velocidá de rotación proyeutada ye de 63 km/s—, siendo el so periodu de rotación igual o inferior a 1,3 díes. Presenta un conteníu metálico (metalicidá) aproximao la metá que la solar. Con una masa llixeramente inferior a 1,5 mases solares, la so edá envalórase en 6000 millones d'años.[10]
Rho Geminorum A tien una compañera estelar de magnitú +12,5 visualmente a 3,4 segundos d'arcu. Denominada Gliese 274 B,[11] ye una nana colorada de tipu M5. La separación real ente les dos estrelles ye de siquier 60 UA y el so periodu orbital supera los 370 años.[10]
Una tercera componente paez completar el sistema. Bien alloñada del par interior —visualmente a 12,6 minutos d'arcu de Rho Geminorum A— ta dixebrada d'ésti siquier 13.500 UA, lo que correspuende a un periodu orbital de más d'un millón d'años.[10] Ye una nana naranxa de tipu K2V y magnitú +7,7.[12] Ye una variable BY Draconis con un periodu de 11,63 díes que recibe la denominación de V376 Geminorum.[13]