Petón de coral
From Wikipedia, the free encyclopedia
Un petón de coral o petón coralín ye una estructura subacuática fecha del carbonatu de calciu secretáu por corales. Ye un tipu de petón bióticu formáu por colonies de corales pedreses, que xeneralmente viven n'agües marines que contienen pocos nutrientes. Los corales pedreses son animales marinos que consten de pólipos, arrexuntaos en delles formes según la especie, y que se paecen a les anémonas de mar, coles que tán emparentaos. A diferencia de les anémonas de mar, los pólipos coralinos del orde Scleractinia secreten exocadarmes de carbonatu que sofiten y protexen a los sos cuerpos. Los petones de coral crecen meyor n'agües templaes, pocu fondes, clares, soleyeres y solmenaes.
De cutiu los petones de coral son llamaos "selves del mar", yá que formen unu de los ecosistemes más diversos de la Tierra. Anque ocupen menos del 0,1 % de la superficie total de los océanos, equivalente a la metá de la superficie de Francia, son l'hábitat de 25 % de toles especies marines,[1][2][3] incluyendo pexes, moluscos, viérbenes, crustáceos, equinodermos, esponxes, tunicaos y otros cnidarios.[4] Paradóxicamente, los petones de coral espolleten a pesar de tar arrodiaos per agües oceániques qu'apurren pocos nutrientes. Son más comúnmente atopaos n'agües tropicales pocu fondes, pero tamién esisten, en menor escala, corales d'agües fondes y corales d'agües fríes n'otres zones.
Pola so situación estratéxica ente la mariña y el mar abiertu, los petones sirven de barrera que protexe a los manglares y les praderíes de yerbes marines escontra los embates del aguaxe; los manglares y praderíes de yerbes, de la mesma, protexen al petón escontra la sedimentación y sirven como árees de reproducción y crianza pa munches de les especies que formen parte del ecosistema del petón.
Los petones de coral apurren servicios del ecosistema pal turismu, la pesca y la proteición de la mariña. El valor económicu total añal de los petones de coral envaloróse en US$ 375 mil millones. Sicasí, los petones de coral son ecosistemes fráxiles, en parte porque son bien sensibles a cambeos de temperatura de l'agua. Tán en peligru pol cambéu climáticu, l'acidificación de los océanos, la pesca con esplosivos, pesca con cianuru p'acuarios, usu escesivu de los recursos de los petones, y usos perxudiciales de la tierra, incluyendo escorrentía agrícola y urbana, y contaminación de l'agua.[5][6][7]