![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/5/52/Peter_Sagan_TDF2022.jpg/640px-Peter_Sagan_TDF2022.jpg&w=640&q=50)
Peter Sagan
ciclista eslovacu / From Wikipedia, the free encyclopedia
Peter Sagan (26 de xineru de 1990, Žilina) ye un ciclista de ruta eslovacu, profesional dende 2009 y actual miembru del equipu alemán Bora-Hansgrohe, de categoría UCI ProTeam. Mientres la so carrera profesional corrió nos equipos Dukla Trencin-Merida, Liquigas/Cannondale y Tinkoff. El so hermanu mayor Juraj Sagan tamién ye ciclista profesional nel mesmu equipu.
Consideráu como unu de los mayores talentos del ciclismu y unu de los meyores ciclistes de tolos tiempos,[4][5] Sagan destaca como clasicómano, velocista (especialista en dambos) y como rodador; amás, tien una gran maña sobre'l pavé[6] y nos descensos de los puertos.[7] Ye un corredor polivalente y con gran regularidá (ganador en 5 ocasiones del maillot verde nel Tour de Francia), capaz d'apostar etapes en tou tipu de terrenes salvu nel altu monte, por cuenta de la so medría de masa muscular desque s'empecipió como profesional.[8][9][10] Tien una estraordinaria habilidá sobre la bicicleta.[10][11]
Nel so palmarés, Sagan tien un total de 104 victories como profesional;[12] amás, ye ganador del UCI WorldTour 2016 y el UCI World Ranking 2016.[13] Ente les sos victories más importantes atópense 12 victories en Grandes Vueltes (8 etapes nel Tour de Francia y 4 etapes na Vuelta España), la Vuelta a Polonia 2011, la Gante-Wevelgem 2013, 2016 y 2018, el Gran Premiu de Montreal 2013, la E3 Harelbeke 2014, el Gran Premiu de Quebec 2016, el Tour de Flandes 2016, la Kuurne-Bruxeles-Kuurne 2017, la Paris-Roubaix 2018, el Campeonatu Européu en Ruta 2016 y el Campeonatu del Mundu en Ruta 2015, 2016 y 2017. Colos trés maillot arcoíris consecutivos, l'eslovacu ye'l primer ciclista na historia (84ᵘ ediciones) en llograr tal finxu; ademas, comparte la plusmarca absoluta con Alfredo Binda, Eddy Merckx, Rik Van Steenbergen y Óscar Freire. Tamién ye'l primeru que se proclama Campeón d'Europa y del Mundu el mesmu añu.
En 2016 foi gallardoniáu cola Bicicleta d'Oru como'l meyor ciclista del añu;[14] amás, llogró'l segundu puestu en 2015 y el tercer puestu en 2013[15] y 2017.[16]