Mensaxe d'Arecibo
From Wikipedia, the free encyclopedia
El mensax d'Arecibo ye un mensax unviáu dende'l radiotelescopiu d'Arecibo en 1974. El mensax tenía una llonxitú de 1679 bits y unvióse na direición del cúmulu d'estrelles de M13, ensamáu por mediu millón de soles. Caltién información sobre l'allugamientu del Sistema Solar, de la Tierra y del ser humanu. El mensax foi diseñáu por Frank Drake, Carl Sagan y otros.
Los "ceros" y los "unos" foron tresmitíos por desplazamientu de frecuencia con una cadencia de 10 bits per segundu. Nuna llonxitú d'onda comparatible, la faza d'enerxía emitío dende la pequeña islla caribeña foi demientres 169 segundos, un millón de vegaes más potente que la lluz del Sol (3 billones de vatios (3x10^12)).
El númberu 1679 elixóse porque ye'l productu de dos númberos primos, poro namái pue descomponese en 23 fileres y 73 columnes, ó tamién en 23 columnes y 73 fileres. Sicasí, esto supón que quien lu llea, pescancie cómo axeitar los datos en forma de rectángulu. La información concasada de la primera mena, nun xenera nengún tipu d'información con xacíu, pero de la segunda mena caltién información sobro la Tierra y la especie humana. Lleíu d'esquierda a drecha (la imaxe d'esti artículu tá invertida respeutu al mensax orixinal) presenta:
- los númberos del unu al diez,
- los númberos atómicos del hidróxenu, carbonu, nitróxenu, oxíxenu y fósforu,
- los componentes qu'ensamen l'ADN del Homo sapiens sapiens, (la especie qu'unvia el mensax);
- les fórmules de los zucres y bases nos nucleótidos del ADN;
- el númberu de nucleótidos nel ADN y la so cadarma helicoidal duble;
- la figura d'un ser humanu y el so altor;
- la población de la Tierra;
- el nuesu Sistema Solar;
- y una imaxe del radiotelescopiu d'Arecibo col so diámetru.
Darréu qu'al mensax tomará-y 25 milenios p'aportar al so destín (y la rempuesta otros 25 milenios), el mensax d'Arecibo foi más una muestra de los llogros teunolóxicos humanos qu'un intentu real d'afitar contautu con estraterrestres.
Per otru llau, ye dable que nin siquier M13 tea ehí pa cuando aporte la faza de lluz, darréu que les estrelles, como la nuesa, muévense. Si daquién detectare la señal, alcontraríala na frecuencia de 2380MHz con una potencia diez millones de vegaes superior a la que la nuesa estrella emite nesa frecuencia, y namái demientres 169 segundos. De toes toes, si daquién tá adicando, dende llueu decataráse que daqué especial asocede.