![cover image](https://wikiwandv2-19431.kxcdn.com/_next/image?url=https://upload.wikimedia.org/wikipedia/commons/thumb/d/d8/Kappa_Cassiopeiae.jpg/640px-Kappa_Cassiopeiae.jpg&w=640&q=50)
Kappa Cassiopeiae
From Wikipedia, the free encyclopedia
Kappa Cassiopeiae (κ Cas / 15 Cassiopeiae / HD 2905 / HR 130) ye una estrella na constelación de Cassiopeia de magnitú aparente +4,17. Ye una superxigante azul de tipu espectral B1Iae.[8]
Anque namái la novena más brillosa de la constelación, Kappa Cassiopeiae ye una estrella estraordinariamente lluminosa, unes 420.000 vegaes más que'l Sol. Si tuviera nel centru del Sistema Solar, la Tierra tendría que tar 650 vegaes más alloñada de como ta güei por que'l ser humanu pudiera sobrevivir.[9] Solamente la gran distancia que nos dixebra d'ella, en redol a 4100 años lluz, fai que nun sía una de les estrelles más brilloses del firmamentu.
Amás de ser bien caliente —tien una temperatura de 24.000 K—, Kappa Cassiopeiae ye una estrella bien masiva, con una masa de 40 mases solares nel momentu de la so formación. Anguaño, debíu al vientu estelar de más de 1000 km/s que sopla dende la so superficie, pierde masa a razón de 2 millonésimes de la masa solar cada añu; esta perda de masa estelar ye más de 10 millones de vegaes mayor que la causada nel Sol pol vientu solar. Estrelles asina tienen una vida bien curtia; la edá de Kappa Cassiopeiae envalórase nunos 5 millones d'años, y yá ta na fase final de la so evolución, probablemente tresformando heliu en carbonu nel so nucleu.[9] Esti tipu d'estrelles son llixeramente variables, tando clasificada como una variable Alfa Cygni. Ye seguro'l so final como supernova y ta na llende nel cual el nucleu remanente estelar pueda colapsar nun furacu prietu.[9]