Políticu español From Wikipedia, the free encyclopedia
Joan Baldoví i Roda (7 d'agostu de 1958, Sueca) ye un políticu español d'ideoloxía valencianista militante del Bloc Nacionalista Valencià, partíu col que foi alcalde de Sueca ente 2007 y 2011. Ye diputáu nel Congresu de los Diputaos de Coalició Compromís dende les eleiciones xenerales españoles de 2011, llogrando l'escañu por Valencia. Nes Eleiciones xenerales d'España de 2015, Joan Baldoví foi cabeza de llista pola circunscripción de Valencia de Compromís-Podemos-És el moment, llogrando 9 diputaos na Comunidad Valenciana (Valencia 5, Alicante 3 y Castellón 1)[2]
Nació na cai Nueva (el carrer Nou en valencianu) de Sueca, na casa familiar. Recibió la so educación en casa, cola so madre, pos el so padre solía tar fuera por motivos llaborales. Aprendió a escribir con una muyer qu'ayudaba a les monxes de la plazoleta del Conventu (placeta del Convent en valencianu). Con ocho años foi al Institutu Llaboral, colos salesianos, pa realizar el bachiller elemental. Estudió na Universidá Llaboral d'Alcalá de Henares dos años y realizó el COU en Sueca. Estudió dos años economía na Universidá de Valencia, magar se diplomó en Maxisteriu. Trabayó nuna asesoría, foi corresponsal de Levante-EMV, profesor de valencianu pa maestros, y maestru d'escuela.
Militante del BLOC dende la dómina d'Unitat del Poble Valencià, foi la cabeza de cartelu del Bloc Nacionalista Valencià pa les eleiciones llocales de 2007 en Sueca, onde la so llista llogró 5 conceyales y él foi investido alcalde colos votos del PSPV-PSOE y EUPV (dempués IdPV).[3]
En 2011 postulóse como candidatu por Valencia nes eleiciones xenerales españoles de 2011 pola Coalición Compromís, siendo ratificáu pol Conseyu Nacional del Bloc el 24 de setiembre de 2011.[4]
Foi la cabeza de llista de la coalición Compromís-Q por Valencia y salió escoyíu diputáu con 85.725 votos (6,03% de votos), llogrando la coalición 125.150 votos en tola Comunidad Valenciana (0,51% del total estatal).[5]
Nes sos primeres declaraciones públiques en siendo escoyíu candidatu, Baldoví afirmó ver un "futuru esperanzador" ante "la posibilidá de tener per primer vegada dende la Segunda República un diputáu valencianista nes Cortes".[6]
Una de les primeres propuestes que Compromís sacó a alderique nesa campaña eleutoral foi la realización d'un referendu pa camudar la llei eleutoral española. La propuesta de cambéu de llei eleutoral foi bautizada como Referendu Baldoví.[7][8]
Les exes programátiques que defende la candidatura de Baldoví son les infraestructures -especialmente la llegada del Corredor Mediterraneu a tola Comunidad Valenciana-, la reforma de la llei eleutoral -pela vía del referendu Baldoví- y la defensa de la llingua ya identidá valencianes.[9]
Tamién s'amosó bien combatiente a la de pidir que los impuestos non graven descomanadamente a los trabayadores con nómina y autonónomos, pidiendo un mimu especial a estos postreros y a los entamadores (al entender que son quien xeneren la mayor parte del emplegu), llegando a afirmar que "Pa crear emplegu hai qu'ayudar a los currantes".[10][11]
El so programa tamién inclúi una defensa de los servicios públicos, manifestándose en contra de los retayos de los mesmos y del copagu sanitariu (términu que refuga por considerar desafortunáu, pos prefier llamalo repagu).[12]
Na so primer intervención na Cámara Baxa, Joan Baldoví recibió gran atención mediática pol so discursu nel alderique de invistidura de Mariano Rajoy como presidente del gobiernu.[13] El suecano enoxó a Rajoy (y a otros líderes del Partíu Popular, como Rita Barberá) al pronunciar un discursu onde se faía una dura crítica a la xestión del PP nel Comunidad Valenciana, onde llevaba dieciséis años de gobiernu con mayoría absoluta.[14][15][16][17][18]
Nes Eleiciones xenerales d'España de 2015, Joan Baldoví preséntase como cabeza de llista de Compromís-Podemos-És el moment pola circunscripción de Valencia, onde llogra 5 diputaos. Amás, el so partíu llogra 3 diputaos n'Alicante y 1 diputada en Castellón.
Nes Eleiciones xenerales d'España de 2016, Joan Baldoví vuelve presentase como cabeza de llista de Compromís-Podemos-EUPV: A la valenciana (esta vegada al pie de EUPV) pola circunscripción de Valencia, llogrando les mesmes resultancies nos trés circunscripciones de la Comunidad Valenciana.
Seamless Wikipedia browsing. On steroids.
Every time you click a link to Wikipedia, Wiktionary or Wikiquote in your browser's search results, it will show the modern Wikiwand interface.
Wikiwand extension is a five stars, simple, with minimum permission required to keep your browsing private, safe and transparent.