HR 4523
From Wikipedia, the free encyclopedia
HR 4523 (HD 102365 / HIP 57443) ye una estrella binaria de magnitú aparente +4,89 na constelación de Centaurus, asitiada al noroeste de δ Centauri. Alcuéntrase a 30,1 años lluz de distancia del Sistema Solar, siendo V857 Centauri y Gliese 433 —a 4,3 y 4,4 años lluz respeutivamente—, les estrelles conocíes más cercanes a ella.[2]
![]() | |
---|---|
estrella binaria | |
Datos d'observación | |
Magnitú absoluta | 5,07 |
Constelación | Centaurus[1] |
Carauterístiques físiques | |
Radiu | 0,96 Radius solars |
Masa | 0,889 M☉ |
![]() |
La componente principal, HR 4523 A (LHS 311 / GJ 442 A), ye una nana mariella de tipu espectral G2V[3] y 5650 ± 100 K de temperatura efectivo. De menor masa que'l Sol —la so masa envalórase en 0,85 mases solares—, tien un tamañu llixeramente más pequeñu qu'ésti. Xira sobre sigo mesma con una velocidá de rotación proyeutada de namái 0,3 km/s.[4] La so lluminosidá equival al 82% de la lluminosidá solar y la so metalicidá ye significativamente menor que la del Sol, ente un 20 y un 33% de la mesma. Nun amuesa actividá cromosférica y paez ser una estrella muncho más antigua que'l Sol, con una edá de más de 9000 millones d'años.[2] Considerada miembru del Grupu d'Épsilon Indi, lo más probable ye que seya una intrusa dientro del mesmu, una y bones la estrella ye más antigua y tien una composición distinta a la d'otros miembros.[5]
La componente secundaria, HR 4523 B (LHS 313 / GJ 442 B), ye una nana colorada de tipu M4[6] con una masa envalorada igual al 7% de la masa solar y una lluminosidá de 7 cenmilésimes de la del Sol. La separación media ente les componentes A y B ye d'unes 235 UA, casi 8 vegaes la distancia esistente ente Neptunu y el Sol.