Gliese 784
From Wikipedia, the free encyclopedia
Gliese 784 (GJ 784 / HD 191849 / HIP 99701)[5] ye una estrella na constelación de Saxitariu asitiada mui cerca de la llende con Telescopium, a pocu más de 3º de κ2 Sagittarii. Alcuéntrase a 20,2 años lluz de distancia, siendo una de les 100 estrelles más cercanes al Sistema Solar.[6] La so magnitú aparente ye +7,97.[5]
Gliese 784 ye una nana colorada de tipu espectral M0.0V[6] —enantes catalogada como K7[5]— con una temperatura efectivo de 3930 K.[7] Tien una masa envalorada de 0,58 mases solares[6] y un radiu equivalente a 2/3 del radiu solar. La so lluminosidá bolométrica equival al 6% de la lluminosidá solar;[7] anque comparativamente col Sol ye una cifra baxa, Gliese 784 ye 32 vegaes más lluminosa que Proxima Centauri y 13 vegaes más que Ross 154, nana colorada tamién en Saxitariu. Les sos carauterístiques físiques son bien similares a les de Lacaille 8760 pero, a diferencia d'ésta, nun ta clasificada como estrella acandilante, magar hai nicios de que puede ser una estrella variable.[8]
Les estrelles más cercanes a Gliese 784 son Gliese 783, a 3,2 años lluz, y Gliese 754, a 3,8 años lluz.[9] La brillosa δ Pavonis alcuéntrase a 7,3 años lluz de Gliese 784.