Dimensión
cantidá máxima de direiciones independientes nun espaciu matemáticu / From Wikipedia, the free encyclopedia
La dimensión (del llatín dīmensiō astractu de dēmētiri 'midir') ye un númberu rellacionáu coles propiedaes métriques o topolóxiques d'un oxetu matemáticu. La dimensión d'un oxetu ye una midida topolóxica del tamañu de les sos propiedaes de recubrimientu. Esisten diverses midíes o conceptualizaciones de dimensión: dimensión d'un espaciu vectorial, dimensión topolóxica, dimensión fractal, etc.
En xeometría, física y ciencies aplicaes, la dimensión d'un oxetu defínese informalmente como'l númberu mínimu de coordenaes necesaries pa especificar cualquier puntu d'ella.[1] Asina, una llinia tien una dimensión porque namái se precisa una coordenada pa especificar un puntu de la mesma. Una superficie, tal como un planu o la superficie d'un cilindru o una esfera, tien dos dimensiones, porque se precisen dos coordenaes pa especificar un puntu nella (por casu, p'alcontrar un puntu na superficie d'una esfera precisa'l so llatitú y llargor). L'interior d'un cubu, un cilindru o una esfera ye tridimensional porque son necesaries trés coordenaes p'alcontrar un puntu dientro d'estos espacios. En casos más complicaos como la dimensión fractal o la dimensión topolóxica de conxuntos astractos la noción de númberu [enteru] de coordinaes nun ye aplicable y nesos casos tienen d'usase definiciones formales del conceutu de dimensión.
Tamién s'usa'l términu "dimensión" pa indicar el valor d'una midida llinial o llargor recta d'una figura xeométrica o oxetu físicu, anque dichu sentíu nun tien rellación col conceutu más astractu de dimensión, que ye'l númberu de graos de llibertá pa realizar un movimientu nel espaciu.