Deforestación
From Wikipedia, the free encyclopedia
La deforestación o balta d'árboles ye un procesu provocáu xeneralmente pola aición humana, nel que se destrúi la superficie forestal.[1][2] Ta direutamente causada pola aición del home sobre la naturaleza, principalmente por cuenta de baltar o quemes realizaes pola industria maderera, según pol llogru de suelu pa l'agricultura, minería y ganadería.
La deforestación afara los montes y les selves de la Tierra de forma masiva causando un inmensu dañu a la calidá de los suelos. Los montes inda cubren alredor del 30% de les rexones del mundu.
Baltar árboles ensin una eficiente reforestación resulta nun seriu dañu al hábitat, en perda de biodiversidá y en aridez. Tien un impautu adversu na fixación de dióxidu de carbonu (CO2). Les rexones deforestadas tienden a una erosión del suelu y frecuentemente degrádense a tierres non granibles.
Ente los factores que lleven a la deforestación en gran escala cúntense: el descuidu ya inorancia medieval del valor intrínsecu, la falta de valor atribuyíu, el manexu pocu responsable de la forestación y lleis medioambientales deficientes.
Los motivos de baltar indiscriminada son munchos, pero la mayoría tán rellacionaos col dineru o la necesidá de los granxeros de caltener a les sos families. El inductor subxacente de la deforestación ye l'agricultura. Los llabradores balten los montes col fin de llograr más espaciu pa los sos cultivos o pal llendo de ganáu. De cutiu, ingentes cantidaes de pequeños llabradores estenen hectárees de terrén arboláu, p'alimentar a les sos families, por aciu balta y fueu nun procesu denomináu «agricultura de raspia y quema».
Les operaciones madereres comerciales, qu'apurren productos de magaya de papel y madera al mercáu mundial, tamién participen en baltar d'innumberables montes cada añu. El lleñadores, inclusive de forma furtiva, tamién constrúin carreteres p'aportar a montes cada vez más remotos, lo que trai una medría de la deforestación. Los montes y selves tamién cayen víctimes de la crecedera urbana constante.
Non tola deforestación ye consecuencia de la intencionalidad. Dalguna ye causa de factores humanos y naturales como les quemes forestales y el llendo intensivu, que puede tornar la crecedera de nuevos biltos d'árboles.
La deforestación tien munchos efeutos negativos pal mediu ambiente. L'impautu más dramáticu ye la perda del hábitat de millones d'especies. Setenta per cientu de los animales y plantes habiten los montes de la Tierra y munchos nun pueden sobrevivir la deforestación que destrúi'l so mediu.
La deforestación ye tamién un factor coadyuvante del cambéu climáticu. Los suelos de los montes son húmedos, pero ensin la proteición de la cubierta arbórea, ensúguense rápido. Los árboles tamién ayuden a perpetuar el ciclu hidrolóxicu devolviendo'l vapor d'agua a l'atmósfera. Ensin árboles que desempeñen esi papel, munches selves y montes pueden convertise rápido en grebos desiertos de tierra desierta.
La eliminación de la capa vexetal arrampuña a los montes y selves los sos palios naturales, que bloquien los rayos solares mientres el día y caltienen el calor mientres la nueche. Esti trestornu contribúi a l'apaición de cambeos de temperatura más estremu, que pueden ser nocivos pa les plantes y animales.
Los árboles desempeñen un papel crucial na absorción de gases d'efeutu ivernaderu, responsables del calentamientu global. Tener menos montes significa emitir más cantidá de gases d'efeutu ivernaderu a l'atmósfera y una mayor velocidá y gravedá del cambéu climáticu.
En munchos países la deforestación causa estinción d'especies, cambeos nes condiciones climátiques, desertificación y desplazamientu de poblaciones indíxenes.